Na Veisau e Vukea na Kena Soli Vakatautauvata na Vakasala ni Kosipeli ena iTikotiko kei na Lotu

Noveba 2018

Na Veisau e Vukea na Kena Soli Vakatautauvata na Vakasala ni Kosipeli ena iTikotiko kei na Lotu

Me tiki ni sasagataki tikoga mera vukei na Yalododonu Edaidai mera “vulica na vunau, vaqaqacotaki na vakabauta, ka gutaki na sokalou ni tamata yadua,” sa vakaraitaka raraba kina o Peresitedi Russell M. Nelson na veisau vou me vukea na vakatauvatataki ka semati na sala cecere ka bibi ni nodra sokalou na lewenilotu mera vulica ka bulataka na kosipeli ni iVakabula ena lotu vakakina ena itikotiko.

Era sa vakaraitaka na iliuliu ni Lotu na kena sa veisau na gauna ni soqoni ena Siga Tabu, vakatekivu ena Janueri ni 2019, me sema ki na kena tavoci e dua na lewenivuli vou tokona na Lotu e kena usutu na vuvale.Na veisau oqo kei na so tale era sa yavutaki ena vica na ituvatuva taumada ni Lotu sa cakava tiko mai ena veiyabaki sa oti, mera vukei na lewenilotu mera vakatabakiduataka nodra bula vua na Tamada Vakalomalagi kei Jisu Karisito ka titobu nodra vakabauti Rau. Na ituvatuva oqo era oka kina me raicimatua me vakaibalebale cake na vuli kosipeli ena itikotiko, rokova na Turaga ena kena vakatabui na Siga ni Vakacecegu, ka veikaroni vakai keda me vakataka na iVakabula ena veidusimaki ni Yalo.

E kena inaki mera vakarautaki na tamata ni Turaga ki na Nona lesu mai, ni sa tuvai na veisau oqo me titobu na saumaki ni tamata yadua, a vakamacalataka o Elder Quentin L. Cook ena Kuoramu ni iApisitolo Le Tinikarua, na veisaui oqo ena soqoni ena mataka ni Vakarauwai ni koniferedi raraba.

“Eda kila na igu vakayalo kei na saumaki titobu tudei ena rawa mai vale… ,” a kaya. “Noda inaki me da vakatauvatana na veika e sotavi ena Lotu kei na vuvale ena ivakarau me vakalevutaki cake kina na vakabauta, na bula vakayalo, ka vakatitobutaka na saumaki vei Tamada Vakalomalagi kei na Turaga o Jisu Karisito.”

Na Veisau ena iTikotiko

Era sa veisureti tiko na iliuliu ni Lotu me raicimatua me vakalevutaki na vakaitavi ni tamata yadua kei na matavuvale ena cakacaka ni lotu ena itikotiko, oka kina na vuli kosipeli ena itikotiko ena Siga Tabu kei na loma ni macawa ka vakatudonutaki na lotu vakamatavuvale.

Me sa rumu ni kalasi kei na veivakadeuci, na itikotiko sa vanua bibi me vulici kina na kosipeli ka me bulataki. Na vulici ni kosipeli ena tamata yadua kei na matavuvale ena itikotiko ena Siga Tabu kei na loma ni macawa sa vakarautaka na madigi me kunei na kaukauwa vakayalo ena veisiga ka yaco kina na galala cecere ni vuli kei na ivakatakila ki na tamata yadua. Na vakararavi vakatabakidua ki na gauna yalani e valenilotu baleta na vakasala ni kosipeli e vakavurea me sega ni rawati vakatautauvata me titobu ka tawamudu na saumaki vou.

“Sa noda itavi yadua na tubu ni noda dui bula vakayalo,” a kaya o Peresitedi Nelson. “Na ivolanikalou e vakamatatataka ni itubutubu sa nodra itavi taumada mera vakavulica na vunau vei ira na luvedra.”

Na veisau oqo e oka kina na kena tavoci e dua na ivurevure vou ni vuli kosipeli baleta na tamata yadua kei na vuvale ena itikotiko.Sa rawa mera vakayagataka na tamata yadua kei na matavuvale na Lako Mai, Mo Muri Au—Baleta na Tamata Yadua kei na Matavuvale, kera gadreva, me na dusimaka nodra madigi ni vuli kosipeli ena taudaku ni valenilotu. Ena cakacaka vata na ivurevure vou vata kei na ivurevure veitokani baleti ira na qasenivuli ni Matawilivola ni Siga Tabu kei na Lalai me salavata na lesoni ni Siga Tabu vata kei na vuli ivolanikalou ena itikotiko kei na vakatutu ki na lotu vakamatavuvale.

Me ikuri ni kena uqeti na vuli kosipeli, era sa veisureti vou tiko na iliuliu ni Lotu meda vakaitavi kece ena siga ni Vakacecegu—ena loma ni macawa—na bose vakamatavuvale, lotu vakamatavuvale, tuva kawa kei na cakacaka ni valetabu, veiqaravi, sokalou yadua, kei na gauna rekitaki ni matavuvale.

Na lewenivuli sa soli vei ira na lewenilotu kei na iliuliu e vakamacalataka mera na veiuqeti na iliuliu ni Lotu vei ira na lewenilotu mera cakava dua nodra lotu vakaitikotiko kei na vuli kosipeli ena Siga ni Vakacecegu—se dua tale na gauna era digitaka na tamata yadua se matavuvale. E rawa ni vakayacori e dua na bogi ni itaviqaravi ena Moniti se dua tale na gauna. Ena kena oqo, e dodonu me ra dau vagalalataka tikoga kina na iliuliu na bogi ni Moniti mai na veisoqoni kei na itaviqaravi ni Lotu. Ia, na gauna e vakayagataki ena vuli kosipeli ni itikotiko kei na itaviqaravi ni matavuvale kei na tamata yadua e tuvai me ganita na ituvaki ni tamata yadua kei na matavuvale.

Na sokalou vua na Kalou e valenilotu, na vakaitavi ena cakacaka tabu e kea, ka soqoni vata mai me ia na veivakavulici vata, veivaqaqacotaki ka veiqaravi vei keda yadua sa gacagaca bibi ni kena vakatitobutaki na vakabauta kei na saumaki vou tiko ni tamata yadua.Na vakalailaitaki ni gauna e valenilotu ena rawa me yaga sara vakavo ga kera sa lomadra dina na tamata yadua kei na matavuvale mera vaqaqacotaka na nodra itikotiko.

E vakavulica o Peresitedi Nelson: “Vei keda na Yalododonu Edaidai, sa matau meda nanuma ni ‘lotu’ sai koya na ka e yaco e noda valenilotu, ka tokoni ena ka e yaco ena noda itikotiko. Sa dodonu me veisautaki na ivakarau oqo. Sa gauna oqo na Lotu me kena usutu na vuvale, tokoni ena ka e yaco ena noda tabana, tabanalevu, kei na iteki.”

Na Veisau ena Lotu

Na sotavi ni veisau oqo ena Lotu sa kena inaki me tokoni me tubucake na vuli kei na bulataki na kosipeli ena itikotiko.Na veisau oqo e oka kina na kena moici na gauna ni lotu ena Siga Tabu e oka kina oqo:

Dua na 60 na miniti ni soqoni ni sakaramede,
Dua na 10 na miniti ni veisau ki na kalasi,
Kei na dua na 50 na miniti ni kalasi, me vaka sa tuvai toka oqo e ra:

Oqo na gauna ni lotu ena Siga Tabu vakatekivu ena Janueri 2019
60 na miniti	Soqoni ni sakaramede
10 na miniti	Veisau ki na kalasi
50 na miniti	Kalasi ni qase; kalasi ni itabagone; Lalai

Na 50 na miniti ni gauna ni kalasi ena oka kina na Lalai ni veimacawa baleti ira na gonelalai kei na nodra gauna na itabagone kei na qase ena veimacawa ena kena oqo:

iMatai kei na ikatolu ni Sigatabu: Matawilivola ni Sigatabu.
iKarua kei na ikava ni Sigatabu: kuoramu ni Matabete, Soqosoqo ni Veivukei, kei na Goneyalewa.
iKalima ni Sigatabu: era na soqoni na itabagone kei na uabula ena veidusimaki nei bisopi.

Kevaka era lewe levu na Lalai sa rawa ni ra wasei ki na Lalai gone kei na Lalai qase, ka rawa vei ira na iliuliu mera veisautaka na ituvatuva oqo ki na veimama ni gone ka qai veiveisau me vaka e gadrevi.

iTuvatuva ni soqoni ni Lalai tekivu ena Janueri 2019
25 na miniti	Na masu, na ivolanikalou se na yavu ni vakabauta, vosa (5 na miniti) Gauna ni lagasere: Na sere e tokona na ivolanikalou e vulici ena kalasi (20 na miniti)
5 na miniti	Veisau ki na vei kalasi
20 na miniti	Na Vei Kalasi: lesoni mai na Lako Mai, Mo Muri Au—Baleta na Lalai

Veisau ni Lewenivuli

Na veisau oqo ni gauna ni soqoni e cakacaka vata kei na lewenivuli vou ni Lotu na Lako Mai, Mo Muri Au. Vakatekivu ena Janueri, na lewenivuli vou oqo e tokona na Lotu e kena usutu na vuvale ena sala vata kei na veika era vulica tiko na qase, itabagone, kei ira na gonelalai ena kalasi ni Matawilivola ni Siga Tabu kei na Lalai, sa na rawarawa kina ki na matavuvale mera vuli vata e vale ena loma ni macawa.

Sa rawa mera laurai na ivakasala, ituvatuva ni lesoni, kei na ivurevure ena:

Lako Mai, Mo Muri Au—Me Baleta na Kuoramu ni iTalatala Qase kei na iSoqosoqo ni Veivukei (e tiko ena ilavelave ni Noveba 2018 ni Ensign kei na Liaona)
Lako Mai, Mo Muri Au—Me Baleta na Kuoramu ni Matabete i Eroni
Lako Mai, Mo Muri Au—Me Baleti Ira na Goneyalewa
Lako Mai, Mo Muri Au—Me Baleta na Matawilivola ni Siga Tabu
Lako Mai, Mo Muri Au—Me Baleti Ira na Lalai

Sikova na comefollowme.lds.org me baleta na ikuri ni ivakamacala.

Na veisau bibi tale eso era oka kina oqo:

Na soqoni ni matabose ni qasenivuli sa na vakayacori ena veiyavulatolu ka sega ni veivula.
Na gauna ni lesoni ni kuoramu ni italatala qase kei na iSoqosoqo ni Veivukei sa na sega tale ni okati kina na soqoni ni matabose ena imatai ni Siga Tabu se na ulutaga digitaki ena ikava ni Siga Tabu. Na lesoni ena vakatabakidua mai na itukutuku ni koniferedi raraba.
Na gauna ni lagasere ni Lalai sa na sosomitaka na gauna ni veiwasei. Sa na tagutuvi na iTuvatuva ni Gauna ni Veiwasei.
Sa na tagutuvi na vuli ni iVakavuvuli ni Kosipeli. Era sa sureti na lewenilotu kei na itokani taucoko mera tiko ena nodra dui kalasi ni qase se Matawilivola ni Siga Tabu.
Na vuli tale eso—me vaka na veivakaqaqacotaki ni vakamau kei na matavuvale, vakavakarau ki na valetabu, na vakavakarau ki na kaulotu, kei na tuva kawa—era na sega ni vakayacori ena gauna ni kalasi ena Siga Tabu. Sa rawa mera vakavulici na vuli oqo ena so tale na gauna me baleta na tamata yadua, matavuvale, se ilawalawa mena vakatau tiko ki na kena gadrevi raraba ena lewa nei bisopi.

Na iNaki ni Veisau Oqo

Era sa saga tiko na iliuliu ni Lotu mera bulia e dua na vakatautauvata vou kei na isema cecere me kaukauwa sara na itikotiko kei na veika e sotavi ena Lotu ena vakasama e vakainaki.

“Ia e vuqa tale na ka me baleta na veisau oqo mai na kena vakalekalekataki walega na ituvatuva ni soqoni ni Sigatabu … ,” e kaya o Elder Cook. “Na inaki kei na veivakalougatataki e veiwekani kei na veisau oqo kei na veisau eso sa yaco oti e oka kina na veika oqo:

“Vakatitobutaki na saumaki vei Tamada Vakalomalagi kei na Turaga o Jisu Karisito ka vaqaqacotaki na vakabauta vei Rau.
“Vaqaqacotaki na tamata yadua kei na matavuvale ena lewenivuli e tokona na Lotu e kena usutu na vuvale ka cau ena bulataki kosipeli ena marau.
“Rokova na siga ni Vakacecegu, ena vakanamata ki na cakacaka vakalotu ni sakaramede.
“Vukei ira na luvena taucoko na Tamada Vakalomalagi ena yasa ruarua ni ilati ena cakacaka ni kaulotu ka ciqoma na cakacaka vakalotu kei na veiyalayalati kei na veivakalougatataki ni valetabu.”

Me baleta na vakaraitaki raraba ni veisau oqo, raica na Russell M. Nelson, “iDola ni Vosa,” ena tabana e 6 ni mekasini oqo; Quentin L. Cook, “Na Saumaki e Titobu ka Tawayalani vua na Tamada Vakalomalagi kei na Turaga o Jisu Karisito,” ena tabana e 8. Me baleta na ikuri ni ivakamacala me baleta na veisau oqo, sikova na sabbath.lds.org me raici kina na nodratou ivola na Mataveiliutaki Taumada, na isau ni taro e tarogi vakawasoma, kei na ikuri ni ivurevure e rawa ni vukea na tamata yadua kei na matavuvale me rokova na Siga ni Vakacecegu.