E Liutaka na iLakolako o Peresitedi Nelson
Sa vakasalataki keda yadua o Peresitedi Russell M. Nelson meda lomavinaka cake, bula va-Karisito, ka bula vakayalo ni da qaravi ira na tamata, ka sa tura tiko e dua na ivakaraitaki ni kena ibalebale ena sala sa veiqaravi tiko mai kina tekivu mai na koniferedi raraba sa oti.
Ni oti toka ga vakalailai na koniferedi raraba ni Epereli 2018, a gole o Peresitedi Nelson ena nona ilakolako vata kei watina, o Wendy, kei Elder Jeffrey R. Holland ena Kuoramu ni iApositolo Le Tinikarua kei na watina, o Patricia, ki Igiladi, Isireli, Kenya, Zimbabwe, Idia, Thailand, Jaina, kei Hawaii, mai Amerika.
Ena ilakolako tale eso, a sotava kina o Peresitedi Nelson na lewenilotu, daukaulotu, iliuliu, kei na itokani ena Lotu ena wasewase e ra, e loma, kei na tokalau kei Kenada; Seattle, Washington, e Amerika; kei na Dominican Republic—ka vakamacala sara vakavinaka ena vosa vaka-Sipeni, ka imatai ni gauna ki na dua na Peresitedi ni Lotu me veituberi vakabalavu ena dua na vosa vou ka sega ena Vakavalagi.
Ena soqoni kei na yasanibuka, a vakavulica kina o Peresitedi Nelson na ka e baleta na yaca donu ni Lotu; wasei ni kosipeli vei ira na tamata; karoni tiko ni iVola i Momani; na bulataki ni kosipeli ena vinaka kina na bula; na sala i Karisito sa sala ni reki kei na marau, nikua kei na veigauna tawamudu; na masu; kena buli na itikotiko me nodra vanua taqomaki ni gonelalai; ena kena vakayagataki na galala ni digidigi me valuta na veitemaki ka muria na iVakabula; kauwaitaki ni tamata; ka vakavakarau ka ciqoma na kalougata mai na valetabu.
Rau a vosa talega o Peresitedi kei Sister Nelson ena dua na lotu e vuravura raraba ni itabagone enai ka 3 ni June, 2018, ka a kaya kina o Peresitedi Nelson ni o ira na itabagone era sa lewena na “mataivalu ni Turaga” ka vukea nodra vakasokumuni na Isireli era sa “tiki ni dua na ka levu, e cecere sara, ka lagilagi!”A uqeti ira na itabagone meralako tani mai na vakaogai tu ena initaneti, solia nodra gauna vua na Turaga, vakadeuca nodra bula vata kei na Turaga, masu e veisiga me rawa vei ira kece na luve ni Kalou mera ciqoma na kosipeli, ka mera sa rarama kei vuravura.