Mangita og Kalinaw bisan sa Imperpeksyon
Walay usa nato ang perpekto. Ug walay usa nato ang ingon niini sulod sa dugay kaayong panahon. Mao nga, kon ang imperpeksyon maoy atong luna niining kinabuhia, unsay atong mahimo aron makit-an ang kalinaw sa taas nga dalan padulong sa kahingpitan? Ang mosunod nga mga ideya makatabang.
1. Mag-positibo.
Ang atong paghunahuna sa atong kaugalingon makaimpluwensya og dako sa atong mga kinaiya ug pagbati. Daghan kanato makasulti og mga butang sa atong kaugalingon apan dili gayud makasulti ngadto sa uban. Kini isip resulta, mopugong sa atong tinuod nga potensyal ug mopaminos sa atong mga abilidad ug mga talento.
2. Modawat sa mga imperpeksyon isip mga oportunidad.
Ang Dios dili gusto nga mawad-an kita sa paglaum tungod sa imperpeksyon. Kon dawaton nato nga kita masalaypong mga anak sa Dios kinsa nagkat-on samtang nagpadayon, atong madawat ang atong mga imperpeksyon. Ang pagdahum sa diha-diha dayon nga pagka-perpekto nagpasabut nga gilimdan kita sa oportunidad para sa kalamboan. Atong gilimud ang gasa sa paghinulsol ug ang gahum ni Jesukristo ug ang Iyang Pag-ula sa atong kinabuhi.
3. Magpaubos, dili ipaubos.
Ang pagpaduol ngadto sa Langitnong Amahan uban sa imperpeksyon nagkinahanglan og pagpaubos. Apan may kalainan usab tali sa mapainubsanon ug sa pagbati nga gamay ra og bili o kapuslan. Ang Dios dili gusto nga ipakaubos nato ang atong kaugalingon ug mobati nga kita gamay ra og bili sa Iyang panan-aw. Importante ang pag-ila nga naa kitay bili sa atong panahon ug sa paningkamot nga gigahin para sa kausaban.
4. Mopili sa kalipay.
Taliwala sa pagkahimong mas maayo, makapili kita og kalinaw ug kalipay karon. Tingali dili nato mausab ang mga kahimtang sa atong kinabuhi, apan makapili kita kon unsaon nato kini sa pag-atubang.