O La Tatou Avanoa
Fai Ni Uo Fou
Ina ua tau mai e ou matua ia te au e faapea o lo matou aiga o le a siitia ese, na ou matuai fiafia lava e faia ni uo fou. Ina ua matou taunuu i lo matou aai fou, na matou o i le lotu. Na mafai ona ou lagona le Agaga sa malosi lava iina, ma na ou iloaina o le a lelei mea uma.
E lei pine, ae ou amata i lau aoga fou. Sa na o au lava le Mamona e toatasi i le aoga. Ina ua ou savali atu i totonu, na ou lagona le le toafimalie iina. Sa mafai ona ou iloa atu sa ou ese mai isi tamaiti aoga.
I le aluga o le vaiaso muamua pe a, na ou taumafai ai e faia ni uo. Ae na ou lagona le le mautonu! Na ou taumafai e nofo i tafatafa o tagata eseese i vasega taitasi ma ai i le malologa i laulau eseese i aso taitasi. Ae e lei foliga mai sa ou agai i luma.
Na ou filifili e taumafai ia avea ma se faataitaiga e sili atu i au tupulaga. Na ou taulai atu i le Alualu i Luma o le Tagata Lava ia ma le suesue ma le filiga i tusitusiga paia. Ao ou galue malosi, na sili atu lou iloaina atoatoa e faapea o au o se afafine o le Atua ma e alofa o Ia ia te au.
Ao faagasolo le taimi ma na ou faaauauina le faia o nei mea, na ou matauina ai se mea: ua amata ona ou faia ni uo i le aoga. Sa pei lava na tosoina mai tagata ia te au. Na latou taua le ala na ou tulaga ese ai. Na ou iloaina na faapena ona sa ou faasusuluina atu lou malamalama. Sa ese au amioga mai au uo i le vasega, sa ou faia ni ofu tauagafau, na ou faaaogaina le gagana lelei, ma sa ou agalelei i isi.
O i tatou uma lava o fanau a le Atua. Ou te matuai faafetai lava na ou tuuina atu lou malamalama ia susulu atu, e ui lava sa ou lagonaina le ese mai isi. Ou te iloaina e le tuua lava toatasi i tatou pe afai tatou te mulimuli i le Alii!
Rebekah C., Atu Motu o Prince Edward, Kanata
Pe Mafai ona ou Faasoa atu le Tusi a Mamona?
I le Mutuale, na tuuina mai ai ia i matou se tofiga ia avea ma faifeautalai e ala i le mauaina o se soa, faasoa atu a matou molimau i se tagata le lotu, ma tuuina atu se kopi o le Tusi a Mamona i la ma uo le lotu.
Ina ua uma le Mutuale, na ou fesili atu i lou tina mo se fautuaga. Na ia folafola mai ia te au e faapea afai ou te tatalo i le faatuatua ma fesili atu i le Tama Faalelagi, o le a mautinoa lava le tali mai.
E lua vaiaso na ou faaaluina e saili ai se tasi o le a taliaina le Tusi a Mamona. Na teenaina au ma toe teenaina, i le taimi muamua. Na ou matuai le lava lava mai le loto tiga lea na toeitiiti ai lava a ou fiu ai
I se tasi po, na fai ai sau miti e uiga i se fafine lea sa avea o se uo mamae lava i lou aiga. Ao ou faia le miti, na ou iloaina o ia lea e toatasi mo au ma lau soa e asia. Ina ua ou ala i luga, na ou faafetai atu i le Alii mo le fesoasoani mai ia te au.
I le isi Mutuale, na ma tusia ai ma lau soa a ma molimau i le itulau i luma o le tusi ma faia se ato o fualaau aina mo le fafine. Na ma o i lona fale, tuitui i lona faitotoa, ma faatali. E ui lava na ou fefe e faapea atonu o le a ia teenaina, na ou fai ifo ia te au lava ia maua sina faatuatua itiiti. Na iu lava ina sau o ia i fafo faatasi ma se foliga fiafia ma taliaina le Tusi a Mamona.
E ala mai i i lenei aafiaga, na ou aoaoina e faapea, pe a i ai sou faatuatua itiiti ma e te iloaina o loo iina le Tama Faalelagi, e mafai ona faigofie lava lou lagonaina e faapea o le mea e le mafai ona fai, e mafai lava ona faia.
Rapunzel L., Amerika Samoa
O Lau Malologa mai i Lesona Piano
I se tasi vaiaso, na ou filifili ai e faasilasila atu se malologa mai le taina o le piano. E lei faatagaina mai e lou faiaoga lenei malologa ma na faapena foi lou tina. Mo se vaiaso atoa lava ou te lei taina ai le piano. Na ou mafaufau na lelei tele lena mea aua na ou maua se taimi manaia e malolo ai ma faia isi mea.
Na uma le malie i le po o le aso Tofi, ina ua faamanatu mai e lou tina ia te au o lau lesona piano o le taeao e sosoo ai. Na ou mafaufau na ou mauaina se tali: na ou vave ala i se itula ma amata ona tata. Ae na ou iloaina o au taumafaiga sa itiiti tele, ma tuai tele. Sa ou fiafia i le saolotoga e filifili ai, ae ou te lei mafaufau i taunuuga.
O le taeao na sosoo ai ina ua ma feiloai ma lou faiaoga, na amata ai ona manino mai taunuuga. Na tatau ona ou taliaina faapea ou te lei tata, ma na tau mai e lou faiaoga ia te au e tatau ona ou tata i taimi uma lava na ou misia, e faaopoopo atu i lau tataaga i le taimi masani.
Ou te faafetai mo lesona na ou aoaoina e uiga i le faitalia, tiutetauave, ma le tauia. O filifiliga uma lava e i ai se taunuuga, ma na ou aoaoina e faapea o le a ou faia ni filifiliga e sili atu pe a ou faaaluina le taimi e mafaufau ai muamua i taunuuga.
Blake H., Iuta, ISA