Viiga i le Atua i Mea Aupitoaluga
Saunia e Elder Ronald A. Rasband
O Le Korama a Aposetolo e Toasefululua
Mai i se lauga na tuuina atu i le BYU Management Society–Salt Lake Chapter i le Aai o Sate Leki, Iuta, ISA, ia Tesema 13, 2016.
Soo se taimi lava tatou te galulue ai faatasi ma le Alii—i le faia o Lona finagalo, ma siitia i latou o loo siomia i tatou—ua tatou tuuina atu le molimau e faapea o loo soifua o Ia ma e alofa o Ia ia i tatou.
O Le Fanau Mai o Iesu, saunia e N. C. Wyeth
Ao lei oo i le fitu tausaga soifua mai Iesu Keriso i Peteleema i Iutaia, na folafola mai e le perofeta o Isaia, “Faauta, e to le taupou, ma fanau mai se tama tane, na te faaigoa ia te ia o Emanuelu” (Isaia 7:14).
Na valoia e le Tupu o Peniamina, i le 125 tausaga ae lei fanau mai le Faaola, “E ta’ua foi o Ia o Iesu Keriso, o le Alo o le Atua, o le Tama foi o le lagi ma le lalolagi, o le foafoa o mea uma mai le amataga; ma o lona tina o le a taua o Maria” (Mosaea 3:8).
O le aso ae lei soifua mai le pepe o Iesu, na faalogo Nifae, le atalii o Nifae i se leo o faapea mai “O taeao ou te alu atu ai i le lalolagi” (3 Nifae 1:13).
O le aso na sosoo ai, i le va o vasa e tele, na soifua mai ai le pepe o Keriso. E leai se fesili i le vaavaai atu o Lona tina, o Maria, ma le ofo i lana tama tama na faatoa fanau mai, le Alo e Toatasi o le Tama i la le tino.
I mauga o Iutaia o loo siomia Peteleema, ua tau mai e Luka ia i tatou, na nonofo ai leoleo mamoe i a latou fanua (tagai Luka 2:8). O nei leoleo mamoe o ni “tagata amiotonu ma paia” (tagai Alema 13:26) o e o le a molimau atu i le pepe o Keriso.
“Faauta foi, ua tu mai ia i latou le agelu a le Alii, ua pupula faataaliolio mai foi ia te i latou le pupula o le Alii: ua matua fefefe ai lava i latou.
“Ona fai mai lea o le agelu ia te i latou, Aua tou te matatau: aua faauta, ou te au mai ia te outou le tala lelei, e olioli tele i le nuu uma.
“Aua o le aso nei ua fanau ai i le aai o Tavita, lo outou Faaola, o le Alii ia o Keriso. …
“Ona faafuasei lea ona faatasi mai ma le agelu o au mai le lagi e toatele ua vivii i le Atua ua faapea ane,
“O le viiga i le Atua i mea aupitoaluga, ma le manuia i le lalolagi, o le finagalo alofa i tagata” (Luka 2:9–11, 13–14).
Vaai faalemafaufau i lena vaaiga i Iutaia—o le lagi ua faatumuina i le susulu o se fetu matagofie ma aufaipese mai le lagi e faailoga ai lenei mea faapitoa ua tupu. Na “faataalise” atu leoleo mamoe (Luka 2:16) e vaai i le pepe o loo taoto i se faatanoa vao. Mulimuli ane “ona latou faailoa ai lea o le upu” (Luka 2:17) o mea na latou faalogoina ma vaaia.
O tausaga taitasi i le Kerisimasi tatou te faaopoopo ai la tatou molimau i molimau a leoleo mamoe—faapea o Iesu Keriso, le Alo moni o le Atua soifua, na afio mai i se tulimanu o le lalolagi i se nofoaga ua tatou taua o le Nuu Paia.
Na o atu leoleo mamoe ma le migao i le fale o manu e tapuai atu i le Tupu o tupu. O le a faapefea ona tatou tapuai atu ia te Ia i lenei vaitau? Faatauga e le iu? Pisi solo i o tatou fale i le teuina ma le afifiina o meaalofa? Pe o le a avea lena ma a tatou faamamaluga i lo tatou Faaola? Pe o le a tatou aumaia foi le filemu i e loto mafatia, finagalo alofa ia i latou e manaomia se faamoemoega e sili atu, vivii i le Atua i lo tatou naunau e faia Lona finagalo?
Na faafaigofie lava e Iesu, “Sau, ma mulimuli mai ia te au” (Luka 18:22).
O le talalelei a Iesu Keriso, na toefuataiina e ala mai i le Perofeta o Iosefa Samita, na tali mai faatasi ma e talitonu i le salafa o le lalolagi. Ua ou molimauina e au lava ia le naunau o i latou mai atumotu o le moana i le atulaulau o Rusia o e ua taliaina atoatoa le afioga paia a le Faaola.
O Le Savali o le Kerisimasi
I totonu o uluai Au Paia na faapotopoto i Siona sa i ai Hannah Last Cornaby, o le na nofoia Spanish Fork, Iuta, ISA. I uluai aso faigata o le Ekalesia toefuataiina, na faailogaina le Kerisimasi i se moli faapelepele lava po o se meataalo na vaneina pe atonu foi o se pepe meataalo—ae le faapena i taimi uma. Na tusia e Hannah ia Tesema 25, 1856:
“Na oo mai le Po o le Kerisimasi, ma o au pele, faatasi ma le faatuatua faatamaitiiti, na tautauina i luga a latou totini, ma taumanatunatu pe o le a [faatumuina] ea i [latou]. Faatasi ai ma se loto tiga, lea na ou nanaina mai ia i latou, na ou faamautinoa atu ia i latou o le a le faagaloina i latou; ma na latou momoe faatasi ma ni manatu olioli mo le aso a taeao.
“I le leai o sina vaega itiiti o se suka, na ou le iloaina le mea e fai. E ui i lea, e le tatau lava, ona latou faanoanoa. Ona ou mafaufau lea i ni tamai maukeni i totonu o le fale, lea na ou sakaina, ona faamama ese lea o le sua, o lena vaega, pe a sakasaka mo ni nai itula, e maua ai se sosi suamalie. O lenei sosi, ma sina mea feu laitiiti, na ou faia ai se paluga o le falaoa e fai i le fiu lea, pe a tipiina i ni ituaiga o mamanu eseese, ma taoina i se ulo uamea, (sa leai sau ogaumu,) ma faatumuina ai a latou totini ma faafiafiaina ai i latou e pei lava ona faia e ni lole suamalie e sili ona felanulanuai.”1
Ata na tusia e Doug Fakkel
I le faitau ai i le va o laina o lenei tala o loo i ai se tala a se tina na galue i le po atoa e aunoa ma se ogaumu e faafaigofie ana taumafaiga. Ae peitai na ia naunau e aumaia le olioli i lana fanau, ia faamalosia lo latou faatuatua, ia faamautu i lo latou aiga, “Manuia le aso! Ua Lelei mea uma!”2 Pe le o le savali ea lena o le Kerisimasi?
Na aoao mai Peresitene Thomas S. Monson: “O o tatou avanoa e tuuina atu ai i tatou lava, e matua leai lava se gataaga, ae e le tumau foi. O loo i ai loto e tatau ona faafiafiaina. O loo i ai upu agalelei e tatau ona ta’u atu. O loo i ai meaalofa e tatau ona tuuina atu.”3
Soo se taimi lava tatou te galulue ai faatasi ma le Alii—i le faia o Lona finagalo, ma siitiaina i latou o loo siomia i tatou—ua tatou molimau atu faapea o loo soifua o Ia ma e alofa o Ia ia i tatou, e tusa lava po o a o tatou luitau faaletino.
Ina ua auai se tagata liliu mai Sikotilani o John Menzies Macfarlane i le Ekalesia faatasi ma lona tina ua maliu lana tane ma se uso, na malaga atu le toatolu o i latou i le Aai o Sate Leki, Iuta, i le 1852. Sa 18 ona tausaga. I ni tausaga mulimuli ane, na avea ai o ia ma se fua fanua, se fau fale, e oo lava i se faamasino o le itumalo, ae o lana musika na faapitoa ai o ia.
Na ia faatulagaina lana aufaipese muamua i le Aai o Cedar, Iuta, ma aveina atu lana faaili faataamilo i Iuta i sisifo. Ina ua maea le faafiafiaga i St. George, na uunaia o ia e Elder Erastus Snow (1818–88), o se Aposetolo ma le taitai o le kolone, e see mai i St. George ma aumai lona aiga ma le musika faatasi ma ia.
Na faigata na taimi i le 1869, ma na talosaga atu Elder Snow ia Brother Macfarlane ia faia se polokalama o le Kerisimasi e siitia ai agaga o tagata. Na manao Brother Macfarlane i se mea musika fou mo le polokalama. Ae peitai po o le a lava lona taumafai malosi ia fatuina, e lei faamanuiaina. Na ia tatalo mo le uunaiga ma toe tatalo.
Ona oo lea i se tasi po na ia fafaguina lona toalua ma faamatala atu, “Ua ou mauaina upu mo le pese, ma ou te manatu ua ou mauaina foi le musika!” Na ia faataalise atu i le piano feaveai i lo latou potu i luma ma tata le fati, ma tusia i lalo ao uuina e lona toalua i ona luma le moli taupulapula o se fasi solo o loo mumu ao opeopea i se apa gao. Na solo mai upu ma le musika:
Sa Iutaia o leoleo lelei,
Na faalogo i pese nei:
Ia faamanu,
Ia faamanu,
Ia faamanu i le Alii;
Ia manuia o lalo nei, manuia lalo nei;
Manuia lalo nei!4
E lei oo lava Brother Macfarlane i Iutaia e vaai i laufanua na na sili atu ona pei o ni atumauga papa, ae o le savali musuia o lana musika na sasaa mai ai lona agaga o se molimau i le soifua mai o le Faaola i Peteleema, o se amataga lena o le a suia ai le lalolagi e faavavau.5
Na molimau mai John Menzies Macfarlane ia Iesu Keriso e ala mai lana musika, ma na molimau mai Hannah Last Cornaby ia Keriso e ala mai lana auaunaga i lana fanau. Tatou te mafai ona auauna atu faapena i le Alii ma molimau atu ia te Ia e ala i gaoioiga faigofie o le le manatu faapito. E mafai foi ona tatou faia se eseesega i totonu o o tatou aiga, o tatou uarota, a tatou falefaigaluega, ma isi a tatou eria o tiutetauave.
Faia se Eseesega
O se tasi ala faigofie e mafai ona tatou faia ai se eseesega o le aafia lea i faalauiloaga faaletausaga a le Ekalesia i agafesootai o le Kerisimasi. O le faalauiloaga ua fuafuaina e fesoasoani i le Au Paia—ma fanau a le Atua i le lalolagi atoa—e taulai atu i le Faaola. O loo faalauiloaina i lenei tausaga e le Ekalesia se isi taumafaiga i le lalolagi e faamanatu ai le soifua mai o Keriso ma uunaia tagata e mulimuli ia te Ia e ala i le auauna atu i isi i le taimi o le vaitau o le Kerisimasi.
O loo toe faia e le Ekalesia lana autu faamanuiaina o le tausaga talu ai: “Light the World” (tagai Mormon.org). E maua mai le autu i le Ioane 8:12, lea e faitauina e faapea, “Ona toe fetalai atu lea o Iesu ia te i latou, ua faapea atu, O a’u nei o le malamalama o le lalolagi; o le mulimuli mai ia te au, e le savali o ia i le pouliuli, ae ia te ia le malamalama o le ola.”
O le faalauiloaga e aofia ai se kalena faapitoa ma fuaiupu o mau fesootai na e saunia manatu mo tagata ia auauna atu ai ma faasoa atu ai le malamalama o le Kerisimasi.
“Sa tatou o mai uma i le lalolagi ua tuuina i ai le Malamalama o Keriso,” na saunoa ai Peresitene Monson. ”A tatou mulimuli i le faataitaiga a le Faaola ma ola e pei ona sa Ia soifua ai ma e pei ona sa Ia aoao mai, o le a mumu mai lena malamalama i totonu o i tatou ma o le a faamalamalama ai le ala mo isi.”6
Tatou te oo ina iloa le Faaola e ala i le faia o mea na Ia faia. Ao tatou auauna atu i isi, tatou te aumaia i latou—ma i tatou lava—ia latalata atili atu ia te Ia.
“Suafa e sili atu i Suafa Uma lava”
I le taimi o le Kerisimasi, ou te faapitoa lava le misia o le tama a le ma tamaitiiti o Paxton. Na fanau mai ma se faaletonu tuufaasolo e le taatele, na puapuagatia Paxton mai i faafitauli e le mafaitaulia o le soifua maloloina. Na aoaoina lo matou aiga e le Tama Faalelagi i le tele o lesona faapitoa ma agaalofa i le taimi o le tolu tausaga puupuu na faamanuiaina ai o matou olaga e Paxton.
Na faia e lou tuafafine, o Nancy Schindler, se ie soosoo matagofie e faamanatu ai Paxton. Na ia faaigoaina “Suafa e sili atu i Suafa Uma lava.” Na faaalia i le ie suafa e 26 o Iesu Keriso—suafa e amata i mataitusi A e oo atu i le Z. E faamanatu mai e le ie ia te au le faatasiga faaleaiga mamalu i le lumanai faatasi ma Paxton ua mafaia e ala mai le puapuagatia o le Faaola, taulaga ma le Toetu.
Na uunaia e le ie soosoo au ia amata se suesuega o suafa o Iesu Keriso e pei ona faaalia i tusitusiga paia. O le suesueina o Ona suafa ua avea o se vaega o lau suesuega faaletusipaia patino. O le taimi nei, ua ou faailoaina le faitau selau o igoa mo le Faaola.
O se tasi o au tiutetauave o se sui o le Korama a Aposetolo e Toasefululua, ma e pei ona taua i le Mataupu Faavae ma Feagaiga, o le tuuina atu lea o le molimau ia Iesu Keriso. I le Mataupu Faavae ma Feagaiga tatou te faitau ai, “O fautua femalagaai e toasefululua ua valaaulia e avea ma Aposetolo e Toasefululua, po o molimau faapitoa o le suafa o Keriso i le lalolagi atoa” (MF&F 107:23; faaopoopo le faamamafa).
Talu ai nei na talosagaina ai au e lauga atu i se sauniga faamanatuga i le Falemai o Tamaiti Peraimeri i le Aai o Sate Leki. Na ou lagonaina le uunaia e lauga e uiga ia Iesu Keriso ma Ona suafa faamoemoeina. Na ou molimau atu i le Faaola o “le fetuao pupula” (Faaaliga 22:16), o se “faitaulaga sili i mea lelei atali” (Eperu 9:11), “o se Atua o vavega” e toetu “ma le faamalologa i ona apaau” (2 Nifae 27:23; 25:13), “O le Alii o le Filemu” (Isaia 9:6; 2 Nifae 19:6), ma “le toetu ma le ola” (Ioane 11:25).
I le taimi o le Kerisimasi, ou te fiafia e tauloto suafa eseese o le Faaola ao ou savali atu ma toe foi mai lou ofisa e ala mai moli o le Kerisimasi i le Lotoa o le Malumalu. Ou te amata i le A, “Alefa ma le Omeka” (Faaaliga 1:8); E, “le pepe” o Peteleema (Luka 2:12, 16); I, “Faipule” (Isaia 9:6; tagai 2 Nifae 19:6); O, “le Faaola” (Roma 11:26); U, ua “faaeaina le ua filifilia” (Salamo 89:19); F, “o le faavae o le filemu” (Mosaea 15:18); ma isi foi.
I le taimi atoa o lenei vaitau o le Kerisimasi, ou te tulimatai atu i le taulotoina o isi Ona suafa ma vaavaai mo avanoa e faamamaluina ai Lona suafa. Ao e tauivi e faia se eseesega i lenei vaitau o le Kerisimasi, ou te faamoemoe o le a e faia le Faaola ma totonugalemu o au taumafaiga ma o le a e aumaia le mamalu ia te Ia ao e auauna atu i isi i Lona suafa.
Ou te tuuina atu lau molimau o loo soifua lo tatou Tama e Faavavau. O Lana fuafuaga o le fiafia ua faamanuiaina tele ai olaga o Ana fanau taitoatasi i tupulaga uma. Ou te iloaina o Lona Alo Pele, o Iesu Keriso, le pepe na fanau i Peteleema, o le Faaola ma le Laveai o le lalolagi.
O nei upu o viiviiga o loo tautatala i le upumoni i ou taliga: “Ia faamanu i le Alii; ia manuia o lalo nei, manuia lalo nei.”7