Ia Lototoa ma Faasoa Atu!
Saunia e Elder Paul B. Pieper
O le Fitugafulu
Sa nonofo lo matou aiga i le tele o nofoaga i le salafa o le lalolagi. Na matou feiloai i le tele o tagata eseese ma na maua ai avanoa e tele e faasoa atu ai le talalelei. Ua faamanuiaina e la ma fanau isi e ala i le faasoaina atu o a latou molimau.
A o laiti lava le ma fanau, sa matou nonofo i le atunuu o Kazakhstan. Na leai ni faifeautalai iina i lena taimi. A mananao uo ma tuaoi e faalogologo e uiga i le talalelei, o matou e tatau ona avea ma faifeautalai!
Na faasoa atu e la ma tama teine o Marne le talalelei i lana uo o Alyona. Na filifili Alyona e papatiso faatasi ai ma le faatagaga mai lona tina, lea na papatiso mulimuli ane faatasi ma le uso laitiiti o Alyona. Talu ai nei lava na faaipoipo ai Alyona i se alii talavou amiotonu i le Malumalu o Manhattan i Niu Ioka, ma na mafai ona i ai Marne iina! Na matuai fiafia lava o ia aua na ia fesoasoani i lana uo e aoao e uiga ia Iesu Keriso.
Ao matou nonofo i Virginia, ISA, na i ai le ma tama tama o Chris i le Peraimeri. Na amata ona feiloai faifeautalai ma se tasi o uo a Chris ma lona aiga. Na fesoasoani Chris e aoao le aiga. Na saunia o ia ao lei faia lesona taitasi ma fesoasoani e tali a latou fesili. Na filifili le aiga e papatiso. Ina ua maea lena mea, e lei toe popole Chris pe mafai ona ia auauna atu i se misiona. Na ia iloaina e mafai lava ona ia faia!
I se tasi taimi na sau ai se tamaloa e galue i lo matou fale. Na faafetai atu lou toalua ia te ia ina ua uma lana galuega. “Matou te fia tuuina atu ia te oe se meaalofa,” o lana tala lea. Na ia tuuina atu ia te ia se kopi o le Tusi a Mamona.
Na le fiafia le tamaloa. E lei malamalama o ia i mea tatou te talitonu i ai. Na manatu o ia tatou te le talitonu ia Iesu Keriso.
Na lototoa Chris ma faasoa atu lana molimau i le tamaloa. Na faapea atu Chris o ia o se tagata o Le Ekalesia a Iesu Keriso o le Au Paia o Aso e Gata Ai. Na ia fai atu e talitonu o ia ia Iesu.
O le toatele o fanau a le Tama Faalelagi e le iloa se mea e uiga i le talalelei. O isi e le iloaina faapea tatou te talitonu ia Iesu. O nei tagata e manaomia se tasi o le a agalelei ma talanoa atu ia te i latou. E mafai ona tatou lototoa ma faasoa atu a tatou molimau. E mafai ona tatou fesoasoani i isi e aoao e uiga ia Iesu Keriso!