O Leo o Le Au Paia o Aso e Gata Ai
O Se Meaalofa a le Aiga mo le Faaola
Ao latalata mai Tesema, sa ou pisi lava i le sauniuniga mo le taimi pisi o le vaitau o le Kerisimasi. Mo le fa tausaga, sa faia ai faafiafiaga o le Kerisimasi i lo matou fale, ae o lenei tausaga ua ou lagonaina ai le lofituina. Ina ua ma talanoaina ma lou toalua mea uma sa matou manaomia e fai—faatau meaalofa, saunia meaai, ma faia le tele o isi mea—na ma filifili e faapafala le fiafia o le Kerisimasi ae fai se mea fou i lenei Kerisimasi. Na ma mananao e fai se mea lena e mafai ai ona matou tuuina atu se meaalofa i le Faaola.
Ia Tesema atoa, na matou faia ai ni afiafi faaleaiga e uiga i le soifuaga o Iesu Keriso, o i le malumalu, ma fuafua ni galuega auauna atu faaleaiga e fai. Na epikopo lou toalua i le taimi lea, ma na ma filifili e faapea i le Aso Kerisimasi, o le a matou pepese mo tina uma ua maliliu a latou tane i le uarota. Na amata ona matou faataitaia ni nai viiga o le a matou usuina, o se aiga. Na fiafia lau fanau e usu le “I se Faatanoa Vao” (Viiga, nu. 117).
I le Po o le Kerisimasi, na matou faia ni kata faatasi ma ni savali faapitoa o le Kerisimasi ma saunia ni meaai mama e ave i a matou asiasiga. Na ou fiafia lava e vaai atu i lo matou aiga ua matuai lotogatasi lava ma fiafia e auauna atu i isi faatasi ma lea ituaiga o alofa. Sa mafai ona ou lagonaina le agaga o le Kerisimasi.
I le Aso o le Kerisimasi, na naunau lava le ma fanau e faia asiasiga. I aiga taitasi na matou asia, na faateleina lo matou fiafia, ma na foliga mai na faasolo ina sili atu le lelei o pese i taimi uma lava na matou pepese ai. Ina ua matou taunuu atu i le fale mulimuli, na foliga mai e leai se tasi o i le fale. Na matou faatalitali mo ni nai minute, ma na amata ona feminoiai tamaiti. Na iu lava ina sau se tina ua maliu lana tane i fafo e faafeiloai i matou ma ona ofu Lotu ua fai faatasi ma lona lauulu ua selu matagofie lava. Ina ua ia vaaia i matou, na faatumulia ona mata i loimata. Na ou ootia foi ma na tau le mafai ona ou pese.
Ao matou toe foi atu i le fale, na fai mai le ma tama teine e lima-tausaga-le matua ia i matou e lei manao o ia e alu i le fale ae na manao e faaauau pea ona pepese. Ae ou te lei tali atu, na fai mai le ma iva-tausaga-le-matua, “Ia tatou toe faia foi lena mea i le isi tausaga!”
Mo lo matou aiga, o se Kerisimasi lenei e le mafai ona faagaloina aua na matou siitiaina isi ma faaali atu lo matou alofa mo Iesu Keriso. Ao ou toe mafaufau i mea na tutupu o le aso, na ou lagonaina le alofa o le Alii ma manatuaina Ana upu,“Aua na faia e outou i le tasi o e aupito itiiti o ou uso nei, o au lea na outou faia i ai” (Mataio 25:40).