Lig-on sa Tibuok Semana
Kini nga kabatan-onan mopakigbahin sa unsang paagi gipanalanginan sila sa Ginoo samtang sila moambit sa sakrament ug mohinumdom sa ilang mga pakigsaad sa tibuok semana.
Dominggo na sa gabii. Nagpasabut kana nga ugma Lunes na—balik sa homework, imong trabaho, pagpraktis og football, mga leksyon sa piano, ug uban pa. Siguradong daghan kaayo ang buhatonon karong semanaha! Apan kaya ra nimo ang tanang gikinahanglan nimo. Makompleto ra nimo ang tanan nimong buhatonon karong semanaha.
Gusto kang masayud unsaon?
Naa kay espirituhanong kalig-on nga nagtabang kanimo. Matag Dominggo, makaambit ka sa sakrament ug mobag-o sa pakigsaad nga imong gihimo. Sa imong pagbuhat, gisaaran ka nga kon modala ka sa ngalan ni Jesukristo, mohinumdom Kaniya, ug maghupot sa Iyang mga sugo, ikaw sa kanunay makabaton sa Iyang Espiritu uban kanimo (tan-awa sa D&P 20:77, 79). Nagpasabut kana nga mabati nimo ang espiritwal nga kalig-on bisan unsay imong giatubang karong semanaha.
Gihangyo namo ang ubang kabatan-onan sa pagpakigbahin sa ilang mga kasinatian sa sakrament ug sa unsang paagi kini nakapalig-on kanila samtang sila nahinumdom sa ilang mga pakigsaad sa tibuok semana. Basaha ang pipila sa ilang mga istorya. Basin nag-atubang mo og susama nga mga butang!
Kanunay nga paghinumdom sa Manluluwas nakatabang nako nga makaangkon og kaisug sa pag-atubang sa lisud nga mga pagsulay. Sa tunga-tunga sa akong senior year sa high school, mibalik na pud ang akong pamilya sa Estados Unidos, apan nagpabilin ko sa Australia nga ako ra aron pagtiwas sa tuig sa ting-eskwela. Human mibisita ko nila atol sa holiday sa eskwelahan, mibalik ko sa Australia, ug gibati nako ang tumang kaguol. Hinoon, nakaamgo ko nga wala ko mag-inusara; wala gayud ug dili gayud tungod kay ang Espiritu sa Manluluwas kanunay nga magauban kanako samtang maningkamot ko sa pagsunod Kaniya. Mao kadto ang labing dako nga kahupayan nga akong nadawat nianang higayuna.
Shannon S., 19, Sydney, Australia
Inig kadungog nako sa pag-ampo sa sakrament, akong gipahinumduman ang akong kaugalingon nga kon maghupot ko sa akong bahin sa akong pakigsaad sa bunyag, makahupot ko sa Espiritu uban kanako. Ang akong semana mas sayon kon maghupot ko sa Espiritu. Sama pananglit, daghang mga estudyante sa akong eskwelahan mamalikas ug walay nada ang sinultian. Ang paghinumdom sa akong mga pakigsaad nagtabang kanako sa pagbaliwala sa unsay akong nadungog ug gani moimpluwensya sa pipila sa akong mga kaedad nga hunongon ang mao nga sinultian.
Jacob B., 14, Colorado, USA
Sa eskwelahan dihay usa ka babaye nga may kakulangan. Kadaghanan sa mga tawo migamit niana aron pagbugal-bugal kaniya. Ang akong higala ug ako lang ang naningkamot sa pagtabang kaniya. Naay mga adlaw nga daw ang tibuok klase nagkasabot batok kaniya. Mahagiton gyud nga masayud unsaon sa pagtubag. Gusto ra unta ko nga molakaw, apan mipili ko sa paghinumdom nga siya anak sa Dios ug sa paghunahuna kon unsaon ni Jesus pagtratar kaniya. Gibati ko ang makahupay nga epekto sa Espiritu Santo. Nahinumduman nako nga makahimo ko og kalainan. Ang pagsunod sa ehemplo sa Manluluwas nakatabang nako og maayo, ug nasayud ko nga ang tanan ok ra.
Sa akong mga pakigsaad sa bunyag gisaaran ko nga kanunayng makabaton sa Espiritu Santo uban kanako kon mobuhat ko sama sa gibuhat sa Manluluwas. Mapasalamaton ko nga mibati niana nga kahupayan ug kalig-on gikan sa Espiritu Santo.
Alexis L., 13, Kansas, USA
Sa pagkasayud nga ako mipakigsaad sa pagdala diha sa akong kaugalingon ang ngalan ni Kristo naghatag kanako og pagbati sa katungdanan sa pagsunod Kaniya, apan dili kini sayon kanunay. Dihay kausa sa usa ka grupo nga kalihokan nakakita kog usa ka bata nga walay kaistorya. Akong gibati nga kinahanglan nakong duolon ug makig-istorya kaniya. Una ato, dili unta ko. Dili ko maayo nga mouna sa akong kaugalingon sa paghimo og mga higala. Apan sa paghinumdom kon unsay buhaton ni Kristo, nakakita kog kalig-on sa paghimo og usa ka bag-ong higala. Samtang nakigsulti ko niya, akong nabati ang Espiritu nga nag-aghat nako sa pagpangutana ug maglingaw-lingaw.
Evan A., 16, Utah, USA
Atol sa sakrament, kanunay ko nga maghunahuna mahitungod sa mga butang sama sa unsay akong kinahanglang buhaton aning semanaha, mga butang sa eskwelahan, o akong mga higala. Apan dayon sa mga klase sa Sunday School ug sa mga mensahe sa atong mga propeta, nagsugod ko sa pagsabut sa kahulugan sa sakrament. Karon naghunahuna nako mahitungod sa Pag-ula ni Jesukristo, nga mihatag Siya sa Iyang kinabuhi alang kanato, mibayad sa atong mga sala, ug miantus sa tanan nga mga butang. Kana naghatag kanako og kadasig sa matag adlaw sa pag-ingon, maningkamot ko nga mahimong sama Kaniya ug mopakita sa samang paghigugma nga Siya mipakita sa uban. Mopakigbahin ko sa ebanghelyo sa ubang mga tawo. Makabuhat kog butang aron mahimong takus sa pagsulod sa templo ug sa pag-ambit sa sakrament.
Alessandra B., 17, Santiago, Chile
Ang sakrament makapalig-on sa espirituhanon niana nga semana. Nagpahinumdom kini kanako sa mga pakigsaad nga akong gihimo uban sa akong Amahan sa Langit, ug kini mogiya kanako ngadto sa semana. Nakapahimo kini kanako sa paghunahuna sa sakripisyo ni Jesukristo alang kanato, ug nakaandam kini nako sa espirituhanon nga paagi sa umaabut nga semana.
Kausa nabalaka ug nasagmuyo ko, apan sa dihang miambit ko sa sakrament ug mibasa sa himno sa sakrament, napuno ko sa Espiritu. Nalimtan nako ang akong mga kabalaka ug mi-focus sa Manluluwas.
Brett B., 17, Colorado, USA
Alang kanako, ang pagdala sa pangalan ni Jesukristo diha sa akong kaugalingon nagpasabut sa paghinumdom nga ang Iyang Espiritu kanunay nga magauban kanato ug nga kita kinahanglang mopili sa pagbuhat unsay matarung. Dihay kausa sa birthday party, ang akong mga higala nanag-inom, ug midalit sila nako og ilimnon nga makahubog. Mibalibad ko. Dayon usa sa akong mga higala sa Simbahan miabut ug misulti kanila nga dili mi moinom og makahubog nga ilimnon tungod sa among relihiyon. Ang paghinumdom sa Manluluwas kanunayng makapaduol sa Espiritu nako ug moabug sa dautang mga butang.
Miguel C., 16, Paraná, Brazil
Ang pag-ambit sa sakrament naghatag kanako og malinawon nga pagbati ug mga hunahuna nga magkumbinser nako nga kaya ra nako bisan unsa pay mahitabo sa akong kinabuhi. Sa miaging Hunyo, duna koy kalisdanan sa akong kinabuhi. Usa sa akong suod nga higala mibalhin, nanlimbasug ko sa depresyon, ug diha koy dili katuohan nga mga hunahuna mahitungod sa hitsura sa lawas. Usa ka Dominggo, miambit ko sa sakrament, ug hilabihan nga kalinaw ang misanap kanako. Mibati ko og hilabihang kalipay.
Olivia T., 14, Virginia, USA