Ipadan-ag ang Inyong Kahayag
Gusto kong mosulti kaninyo mahitungod sa duha ka batan-ong babaye nga nahibaloan nakong duha ka masanagong ehemplo sa pagpaambit sa ebanghelyo. Dihang hapit na mag-otso anyos ang among anak nga si Nellie, nagpuyo mi sa Switzerland. Excited na si Nellie nga mabunyagan. Sa wala pa ang iyang birthday, duna mi family home evening kauban sa among higalang si Tina. Gitudloan na si Tina sa mga misyonaryo. Apan dili siya sigurado kon magpabunyag ba siya.
Human sa among leksyon among gihangyo si Tina sa pag-ampo. Dili kaayo kasulti og iningles si Tina, mao nga Inintsik ang gigamit niya sa pag-ampo. Wala mi makasabut sa iyang gilitok, apan gibati namo ang Espiritu dihang nag-ampo siya.
Dayon nianang gabhiona mihangyo si Nellie kon siya ug si Tina mahimo bang magpabunyag sa samang adlaw. Wala kami masayud unsay bation ni Tina bahin niana nga ideya. Apan nagkauyon kaming tanan nga manawag lang si Nellie ug mangutana. Sa among katingala, miingon si Tina oo!
Si Nellie ug Tina nabunyagan nianang katapusan sa semana. Dayon giistoryahan mi ni Tina og maanindot nga istorya. Mipahinumdom siya namo mahitungod sa iyang pag-ampo sa among family home evening. Sa iyang pag-ampo mihangyo siya sa Langitnong Amahan nga pahibaloon siya kon angay ba siyang magpabunyag. Dihang nanawag si Nellie nianang gabhiona, nahibalo si Tina nga gitubag sa Langitnong Amahan ang iyang pag-ampo.
Ang among higala nga si Jasmine usa usab ka maayong ehemplo kanamo. Si Jasmine 12 anyos. Nahimo namong suod nga higala ang iyang pamilya dihang namuyo kami sa Middle East. Sa iyang nasud, ang mga miyembro sa Simbahan dili mahimong maghisgot bahin sa Simbahan ngadto sa uban. Supak kini sa balaod. Apan si Jasmine nakahukom nga ipaambit niya ang ebanghelyo pinaagi sa pagbuhat sa unsay gihimo ni Jesus. Mahimo niyang ipakita ang gugma ug kamabination ngadto sa uban. Bisan asa moadto o unsay buhaton ni Jasmin, maningkamot siya nga sama kang Jesus. Usa siya ka sanag nga ehemplo sa uban.
Si Nellie ug si Jasmine mipakita kanamo unsaon nga mahimo kaming mga ehemplo ni Jesukristo. Mahimo nato kini bisan pila ang atong edad o bisan asa kita nagpuyo.