Mga Tubag gikan sa mga Lider sa Simbahan
Unsaon sa Pag-angkon og usa ka Pagpamatuod
Gikuha gikan sa Abril 2008 nga pakigpulong sa kinatibuk-ang komperensya.
Ang unang lakang sa pag-angkon og bisan unsa nga matang sa kahibalo mao gayud ang pagtinguha nga masayud. Kon espirituhanong kahibalo, ang sunod nga lakang mao ang pagpangayo sa Dios pinaagi sa sinserong pag-ampo. Sama sa atong mabasa sa moderno nga pagpadayag, “Kon kamo mangayo, kamo makadawat og pagpadayag ug dugang nga pagpadayag, kahibalo ug dugang nga kahibalo, nga kamo masayud sa mga misteryo ug malinawon nga mga butang—nga nagdala og hingpit nga kalipay, niana nga nagdala og kinabuhi nga dayon” (D&P 42:61).
Ania unsay gisulat ni Alma kabahin sa unsay iyang gibuhat: “Tan-awa, ako nagpuasa ug nag-ampo sa daghan nga mga adlaw nga ako unta masayud niini nga mga butang sa akong kaugalingon. Ug karon ako nasayud sa akong kaugalingon nga sila mga tinuod; kay ang Ginoong Dios mihimo kanila nga makita ngari kanako pinaagi sa iyang Balaang Espiritu” (Alma 5:46).
Samtang kita magtinguha ug maningkamot, kinahanglan natong hinumduman nga ang pag-angkon og pagpamatuod dili usa ka lumalabay nga butang apan usa ka proseso diin kita gialuman nga atong buhaton ang usa ka butang. Ang Manluluwas mipasabut, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios, o nagsulti ba lamang ako sa kinaugalingon kong pagbulot-an” (Juan 7:17).
Laing paagi sa pagpangita og pagpamatuod ingon og kahibulongan kaayo kon itandi uban sa mga pamaagi sa pag-angkon sa ubang kahibalo. Kita makaangkon o makapalig-on sa usa ka pagpamatuod pinaagi sa pagpaambit niini. Gani ang uban misugyot nga ang pipila ka mga pagpamatuod mas maangkon dayon pinaagi sa pagtindog aron ipaambit ang pagpamatuod kay sa pagluhod aron mag-ampo alang niini.
Ang usa ka personal nga pagpamatuod mao ang sukaranan sa atong hugot nga pagtuo. Agi og sangputanan, ang mga butang nga angay natong buhaton aron makaangkon, makapalig-on, ug magpabilin ang usa ka pagpamatuod mahinungdanon sa atong espirituhanong kinabuhi. Dugang pa niadtong gipahayag na, kita kinahanglang moambit sa sakrament matag semana (tan-awa sa D&P 59:9) aron mahimong sarang sa bililhong mga saad nga kita “kanunay makabaton sa iyang Espiritu uban [kanato]” (D&P 20:77). Siyempre, ang Espiritu mao ang tinubdan sa atong mga pagpamatuod.