Ang Balaanong Gahum sa Grasya
Ni Elder James J. Hamula
Sa Seventy
Gikan sa pakigpulong sa Church Educational Devotional, “His Grace Is Sufficient for You,” gipamulong sa Brigham Young University–Hawaii niadtong Hunyo 3, 2014. Alang sa kompletong mensahe, adto sa devotional.byuh.edu.
Ang grasya gituyo aron maghimo kanato nga mas makahingpit sa pagtuman sa mga sugo ug pagpadayon og mas mahisama kang Kristo, hangtud atong makab-ot ang hingpit nga pagkahingkod kang Kristo.
Detalye gikan sa They Brought Their Little Children, ni Walter Rane, dili mahimong pakopyahan
Sa tanan nga kinaiya ni Jesukristo, tingali ang labing makahuluganon mao nga Siya “puno sa grasya” (Juan 1:14). Sa mga kasulatan ang termino nga grasya sa kasagaran nagpasabut nga balaang kinaiya ug gahum sa pagpanalangin, pagtugyan og mga gasa, o sa laing bahin paglihok pabor sa tawo. Ubos sa entry alang sa “Grasya,” ang LDS nga Bible Dictionary mipasabut og ingon niini: “Ang pinaka-ideya sa pulong nga [grasya] mao ang balaang pamaagi sa tabang o kalig-on. … Ang grasya usa ka makapahimo nga gahum”. Makapahimo kini sa tigdawat aron makahimo ug mamahimo kon unsay dili niya mahimo ug dili makab-ot kon pasagdan ra sa kaugalingon niyang paagi.
Kitang tanan nagkinahanglan og makapahimo nga gahum. Kita mga anak sa Dios. Sa ingon, kita dunay potensyal nga mamahimong sama Kaniya.
Ang Dili Mahimo sa Atong Espiritu ug sa Lawas
Samtang gilauman nga makab-ot nato ang “kahingpitan ni Kristo” (Mga Taga-Efeso 4:13), dili nato mahimo nga kita ra. Matag usa kanato gihimo sa duha ka butang—usa ka mahangturong espiritu ug mortal nga lawas (tan-awa sa Abraham 3:18). Ang atong mahangturon nga espiritu miadto sa kalibutan resulta sa pagpili nga gihimo sa premortal nga kalibutan. Kining premortal nga mga pagpili mga kabahin sa atong personalidad, kinaiya, ug esprituhanong kahibalo. Sa ingon nga kahulugan, walay espiritu ang magkaparehas (tan-awa sa Abraham 3:19). Ang matag espiritu nagbaton og managlahi nga ang-ang sa espirituhanong kahibalo, o kahayag ug kamatuoran (tan-awa sa D&P 93:36), sumala sa iyang premortal nga mga pagpili. Samtang ang matag usa sa atong mga espiritu moabut sa iyang mortal nga lawas sa pagkatawo nga limpyo ug putli, ug gani bantugan ug talagsaon, walay usa sa atong mga espiritu ang hingpit nang milambo ngadto sa kahingpitan kang Kristo. Ang pagkahingpit sa espiritu magpadayon atol sa atong pagtuon dinhi sa mortalidad ug sa dugang nga kasinatian didto sa kalibutan sa espiritu, apan ang pagkahingpit dili hingpit nga matuman hangtud sa Pagkabanhaw.
Agig dugang sa kasamtangan nga pagkadili hingpit sa atong mga espiritu, ang atong mga mortal nga lawas dili usab hingpit. Sama sa kakatingalahan niini, ang atong mga mortal nga lawas ubos sa pagkadunot, pagkadugta, ug kamatayon ug sa mga tinguha, ug mga gana ug pagbati nga didto sa kalibutan sa espiritu wala pa nato mahibaloi. Sa ingon nga mga kahimtang lisud kaayo ang hingpit nga pagpaulipon sa lawas ngadto sa kabubut-on sa espiritu. Sa kasagaran gayud ang espiritu dili makapugong sa idikta sa lawas. Ang pipila sa bantugang mga espiritu kinsa mianhi sa yuta naglisud sa pagkontrolar sa ilang pisikal nga lawas. “Ang akong kasingkasing nagmasulub-on tungod sa akong pagkahuyang,” nakatuaw si Nephi. “Ako gilibutan, tungod sa mga pagtintal ug ang mga sala sayon nga mohasol kanako” (2 Nephi 4:17, 18; tan-awa usab sa bersikulo 27).
Ang gubat tali sa espiritu ug sa lawas nahimong mas lisud sa tanan tungod sa lain nga pamaagi sa mortalidad. Ang atong pisikal nga lawas gihimo gamit ang mga materyal sa usa ka “napukan” nga kalibutan, nga naghatag kang Satanas og linahi nga “gahum sa pagbihag” (2 Nephi 2:29). Si Presidente Brigham Young (1801–77) mihimo sa mosunod nga obserbasyon: “Ayaw pagdahom nga kitang ania sa unod gawasnon sa mga pagpanintal sa pagpakasala,” miingon siya. “Ang uban nagtuo nga dinhi sa unod kita mahimong balaan nga lawas ug espiritu ug mahimong putli kaayo nga dili na gayud sila mobati pag-usab sa mga epekto sa gahum niana nga kaaway sa kamatuoran. Kon posible man sa tawo nga makadawat niini nga ang-ang sa pagkahingpit dinhi sa unod dili siya mamatay, dili usab siya magpabilin sa kalibutan diin ang sala nagdominar nang daan. … Tingali kita sa magkalahi nga paagi mobati sa epekto sa sala samtang kita buhi pa, ug sa katapusan moagi sa pagsulay nga gitawag og kamatayon.”1
Ang Balaanong Gahum sa Grasya
Nagkinahanglan kita og balaanong gahum nga makausab sa atong mga kalag sa tanan natong kasamtangan nga mga kahuyang ug kakulangan sa pakahimong dios gamit ang tanan sa nag-uban nga kalig-on, hiyas ug mga kapasidad. Salamat na lang, ang maong balaan nga gahum anaa; kini mao ang grasya sa Dios. Pinaagi lamang sa pagtugyan sa grasya sa Dios kanato “idugang” (Abraham 3:26), sa ingon, kita makakab-ot sa kahingpitan kang Kristo. Sa pagkatinuod, sa ingon niini gayud nakab-ot ni Kristo ang Iyang kahingpitan.
Ang Ginoo miingon kang Joseph Smith, “Siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw” (D&P 50:24). Apan kon mabaw ra ang atong pagtagad, ihikling, o gani ibaliwala ang balaanong mga panalangin nga atong madawat gikan sa Ginoo, sa ingon “ang mga dagko nga mga butang pagatagoan” gikan kanato (3 Nephi 26:10). Sa ingon nga mga kahimtang, madawat nato ang “grasya sa Dios sa wala lamay kapuslanan” (2 Mga Taga-Corinto 6:1) ug sa katapusan ang tanan “mawad-an sa grasya” (D&P 20:32).
Tanan kini nagsugyot nga kinahanglan kitang magkat-on sa pagpailub sa atong kaugalingon ug sa uban sa kasamtangan natong mga kahuyang ug imperpeksyon, ug kita kinahanglang magkat-on sa paglahutay sa dili malikayan nga proseso sa paglambo ngadto sa kahingpitan.
Hugot nga Pagtuo diha kang Jesukristo
Ang pagsabut sa unsang paagiha gihatag ang grasya makatabang kanato kon sa unsang paagi ang pipila ka mga baruganan hingpit nga makahimo sa pagpuno kanato sa grasya. Ang hugot nga pagtuo kang Jesukristo mao ang unang baruganan nga mohangop sa grasya (tan-awa sa Mga Taga-Roma 5:1–2). Ang kamatuoran, paglaum, buhat, ug ang pamatuod nga saksi mao ang mga mahinungdanong elemento sa hugot nga pagtuo ug agianan sa pagdawat sa grasya sa Ginoo.
Hunahunaa, sama pananglit ang kasinatian ni Pedro sa paglakaw sa tubig padulong sa Ginoo. Sama kanato usahay, si Pedro ug ang mga disipulo anaa taliwala sa unuson nga dagat. Si Jesus miduol kanila, naglakaw sa tubig ug nanawag nga sila moduol Kaniya. Uban sa paglaum, si Pedro nanaog sa sakayan sa baluron nga dagat ug milakaw padulong sa Ginoo. Ang iyang paglaum kang Kristo, inubanan sa determinado nga lihok, mitugot nga siya makadawat og gahum nga makalakaw sa tubig. Apan, nagtan-aw sa unos nga naglibut kaniya, nagduha-duha si Pedro ug nagsugod sa pagtidlom. “Ginoo, luwasa ako,” misinggit siya. Agig tubag, nagrekord ang kasulatan nga “Dihadiha gituyhad ni Jesus ang iyang kamot, ug iyang gikuptan siya” (Mateo 14:30–31). Dihang gipunting ni Pedro ang iyang panan-aw ngadto sa Ginoo ug milihok inubanan sa pagtuo, anaa kaniya ang gahum sa paghimo sa butang nga dili niya mahimo sa iyang kaugalingon—paglakaw sa tubig.
Detalye gikan sa The Savior Walked on Water, ni Walter Rane, dili mahimong pakopyahan
Dihang gipalayo ni Pedro ang iyang panan-aw ngadto sa Ginoo ug nagduha-duha, gilangkatan ni Pedro ang iyang kaugalingon gikan niana nga gahum, napasagdan, ug nagsugod sa pagtidlom. Timan-i gayud ang tubag sa Ginoo sa singgit ni Pedro alang sa panabang. “Dihadiha” gituyhad sa Ginoo ang Iyang kamot sa pagluwas kaniya. Kana mao ang pagkaanaa sa grasya sa Ginoo sa atong panahon sa panginahanglan.
Paghinulsol
Ang paghinulsol mao ang ikaduhang baruganan nga maghimo nga kita mapuno sa grasya. Si Mormon mitudlo, “Bulahan sila kinsa maghinulsol ug magpatalinghug ngadto sa tingog sa Ginoo nga ilang Dios; kay kini sila mao ang maluwas. Ug hinaut unta nga ang Dios motugyan … nga ang mga tawo unta madala ngadto sa paghinulsol ug sa maayo nga mga buhat, nga sila unta mapahiuli ngadto sa espirituhanon nga gahum, sumala sa ilang mga buhat” (Helaman 12:23–24). Gikan niini nga kasulatan, klaro nga ang mahinulsulong kasingkasing ug maayong mga buhat nahiuyon sa grasya.
Ikonsiderar ang ehemplo ni Alma nga Batan-on. Siya, kauban sa mga anak ni Mosiah, “ang labing dautan sa mga makasasala” (Mosiah 28:4). Dihang ang anghel sa Ginoo mipakita kang Alma, gihasol siya sa tanang mga sala ug kadautan sa iyang kinabuhi. Nianang mga gutloa siya “gisakit uban sa walay katapusan nga kahasol” (Alma 36:12). “Ang paghunahuna sa pagsulod ngadto sa atubangan sa akong Dios,” miingon siya, “misakit sa akong kalag uban ang dili matukib nga kahadlok” (Alma 36:14). Apan nahinumdom si Alma nga ang iyang amahan namulong mahitungod sa pag-anhi ni Jesukristo sa pagtubos sa atong mga sala sa kalibutan. Kini nga paghinuktok mitandog kaniya ngadto sa paghilak sulod sa iyang kasingkasing, “O Jesus, ikaw nga Anak sa Dios, malooy ka kanako” (Alma 36:18). Diha dayon, siya “wala na mahinumdom sa [iyang] mga kasakit” ug “wala na samoka sa panumduman sa [iyang] mga sala” (Alma 36:19).
DETALYE GIKAN SA Alma, Arise, by Walter Rane, DILI MAHIMONG PAKOPYAHAN
Kining makalubag sa kalag nga paghinulsol naghatag og gahum nga milimpyo ug miusab kaniya sa pagkahimong bag-ong nilalang. Wala na siya magtinguha pa sa pagdaot sa Simbahan sa Dios. Kondili, sa nahibilin sa iyang kinabuhi, naghago si Alma sa pagpalambo sa Simbahan pinaagi sa pagtabang sa uban nga maghinulsol ug makadawat sa Espiritu Santo. Ang pagkakabig ni Alma nga Batan-on gikan sa pagkadautan sa tanang makakasala ngadto sa pagka-propeta sa Dios usa ka mahinuklugong ehemplo sa gahum sa grasya sa Ginoo sa paghatag og kaangayan ug pagbalaan kanatong tanan.
Pagkamapainubsanon
Ang ikatulo nga baruganan mao ang pagpaubos. Ang Ginoo mitudlo kang Moroni, “Ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon diha sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila” (Ether 12:27). Ang paghimo sa huyang nga mga butang nga malig-on mao ang buhat sa grasya.
Kon gikinahanglan ang pagpaubos, tingali makapangutana kita kon unsa ang pagpaubos. Sa mubo nga pagkasulti, ang pagpaubos mao ang pagtugyan sa kaugalingon natong kabubut-on ngadto sa kabubut-on sa Dios ug paghatag Kaniya og dungog kon unsa ang nahimo. Niining butanga, si Jesukristo mao ang atong talagsaong ehemplo. Ang iyang kamapainubsanon ug kamatinugyanon hingpit nga gipakita atol sa Iyang maulaon nga sakripisyo. “O Amahan ko,” nag-ampo si Jesus, “kon mahimo man, isaylo lang kanako kining kopa; gani, dili sumala sa akong pagbuot kon dili sa imo” (Mateo 26:39). Ang kahingpitan sa grasya sa Dios mipuno kang Kristo niini nga okasyon.
Kakugi
Ang ikaupat nga baruganan mao ang kakugi. Sama sa gitudlo ni Nephi sa iyang mga tawo, “nga pinaagi sa grasya kami maluwas, human sa tanan nga atong mabuhat” (2 Nephi 25:23). Tingali ang uban mobasa niini nga kasulatan sa pagsabut nga ang grasya sa Dios pugngan hangtud nga gihimo na nato ang tanan natong paningkamot. Wala ko kini basaha sa ingon niini nga paagi. Dayag lang nga dunay daghang mga ehemplo sa grasya sa Dios nga gihatag ngadto sa tawo bisan siya walay gihimo. Ang gahum sa Pagkabanhaw, sama pananglit, gihatag ngadto sa tanan pinaagi sa grasya sa Dios, nga walay pagtagad sa indibidwal nga paningkamot. Nasabtan nako nga ang giingon ni Nephi nga “sa tanan nato nga mabuhat” nagpasabut nga ang grasya sa Dios ihatag kanato kon kita magkugi. Sa giingon ni Elder Bruce C. Hafen, kanhi sakop sa Seventy, “Ang gasa sa Manluluwas kanato dili limitado sa panahon nga ‘human’ sa tanan natong mabuhat. Tingali madawat nato ang iyang grasya sa dili pa, atol sa, ug pagkahuman nga naningkamot kita sa atong kaugalingon.”2
Ikonsiderar ang ehemplo sa igsoon ni Jared. Gisugo siya sa paghimo og mga sakayan ug gamiton kini sa pagtabok sa kadagatan. Lakang sa usa ka lakang, ang igsoon ni Jared nagkugi sa pagsunod sa mga instruksyon sa Ginoo. Dihang nahuman niya ang mga sakayan, ang igsoon ni Jared nabalaka mahitungod sa kangitngit sa mga sakayan ug mihangyo sa Ginoo sa paghatag og kahayag. Samtang ang Ginoo mahimo ra gyud unta nga mohatag dayon og sulbad, Iya hinoong gipangutana si Jared: “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?” (Ether 2:23). Agig tubag, ang igsoon ni Jared mikugi sa pag-andam og 16 ka mga bato, gipresentar kini ngadto sa Ginoo, ug mihangyo nga Siya mohikap niini aron “nga [kini] mahimo nga mohayag diha sa ngitngit” (tan-awa sa Ether 3:1–4).
Wala mahuman sa igsoon ni Jared ang tanan nga gihatag sa Ginoo nga iyang buhaton, apan bisan pa ang Ginoo mihatag sa Iyang gahum tungod og alang sa igsoon ni Jared, mihikap sa matag bato ug gihimo nga kini misidlak sa kahayag alang sa gipaabut nga paglawig. Sa paghimo niini, gipakita sa Ginoo ang Iyang tinguha ug kaandam nga mohatag sa Iyang balaan nga mga gahum ngari kanato kon magkugi kita sa paghimo sa tanan natong mahimo.
Pagkamasulundon
Ang ikatulo nga baruganan mao ang kamasulundon. “Kon ikaw maghupot sa akong mga sugo,” miingon ang Ginoo, “ikaw makaangkon og grasya ug dugang pa nga grasya” (D&P 93:20). Misulti si Moroni sa ingon niini nga paagi, “Kon kamo molimud sa inyong mga kaugalingon sa tanan nga dili diosnon, ug mohigugma sa Dios uban sa tibuok ninyo nga gahum, hunahuna ug kusog, niana ang grasya sa Dios igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).
Sa walay pagpakubos sa sugo sa Ginoo sa pagtuman sa mga sugo o sa sugo ni Moroni nga ilimud ang atong kaugalingon sa tanan nga dili diosnon, kinahanglan natong masabtan nga ang grasya dili mag-agad sa hingpit nato nga pagtuman. Kon ang grasya mag-agad pa sa atong hingpit nga pagtuman sa mga sugo o sa hingpit nga paglimud sa atong mga kaugalingon sa tanang pagkadili diosnon, ang padayon natong kaimperpekto sa mortalidad sa hangtud magpugong unta nato sa pagbaton og grasya. Ang grasya gituyo, hinoon, sa paghimo kanato nga makahingpit sa pagtuman sa mga sugo ug pagpadayon og mas diosnong lakang, hangtud atong makab-ot ang hingpit nga pagkahingkod kang Kristo.
Ang sugo sa Ginoo sa pagtuman sa mga sugo ug ang sugo ni Moroni nga ilimud ang atong kaugalingon sa tanan nga dili diosnon, kinahanglan natong sabton isip mao ang paghimo niining mga butanga kutob sa atong mahimo. Samtang importante ang atong mga buhat, mas labing importante ang mga intensyon sa atong kasingkasing.
Pagdawat sa Espiritu Santo ug Pagtinguha sa Gasa sa Espiritu
Ang katapusang baruganan mao ang pagdawat sa Espiritu Santo ug pagtinguha sa mga gasa sa Espiritu (tan-awa sa Mosiah 18:16). Sa pagkatinuod, kita mapuno sa grasya sa Dios kon kita makadawat sa Espiritu Santo, kay ang Espiritu Santo mao man ang moapud-apud ug mohatud kanato sa makabalaan, makapahimo ug makapahingpit nga mga gahum sa Dios.
Niini nga bahin, si Elder Parley P. Pratt (1807–57) sa Korum sa Napulog duha ka mga Apostoles mitudlo sa mosunod: “Ang gasa sa Espiritu Santo … mopaabtik sa tanang intelektwal nga mga abilidad, mopalambo, mopatubo, mopalapad, ug molunsay sa tanang natural nga mga pagbati ug gugma, ug ipahiuyon kini, pinaagi sa gasa sa kaalam, nga subay sa makatarunganong paggamit niini. Kini modasig, mopalambo, mougmad, ug mopahingkud sa tanan nga pinakamaayong mga pagbati, kalipay, gana, mga pagbati ngadto sa uban, ug gugma sa atong kinaiyahan. Mag-awhag kini og hiyas, kamabination, kamaayo, kalumo, kaaghop, ug gugmang putli. Mopalambo kini og katahum sa pagkatawo, porma, ug mga kinaiya. Maghatag kini og kabaskug, kusog, kalig-on, ug sosyal nga pagbati. Mopalagsik kini sa tanang abilidad sa pisikal ug sa kaalam sa tawo. Maglig-on kini ug mohatag og kalig-on sa mga kaugatan. Buot ipasabut, kini, mao ang, uyok sa kabukugan, kalipay sa kasingkasing, kahayag sa mga mata, musika sa mga dalunggan, ug kinabuhi sa kinatibuk-ang pagkatawo.”3
Ang mao nga mga panalangin moabut kanato kon kita makadawat sa Espiritu Santo human sa atong bunyag ug pagkumpirma. Si Elder Orson Pratt (1811–81) sa Korum sa Napulog Duha ka mga Apostoles mitudlo nga “bisan kanus-a ang Espiritu Santo maanaa sa usa ka tawo, dili lang kay kini molimpyo, mobalaan, tugbang sa iyang pagtugyan sa iyang kaugalingon sa impluwensya niini, apan usab mohatag diha kaniya og pipila ka gasa, nga gituyo para sa kaayuhan sa iyang kaugalingon ug sa uban. … Kini nga espirituhanong mga gasa iapud-apud ngadto sa mga miyembro sa Simbahan, sumala sa ilang kamatinud-anon, mga kahimtang, natural nga mga abilidad, katungdanan, ug mga calling; nga ang tanan matudloan sa hapsay nga paagi, mapamatud-an, mahimong hingpit, ug maluwas.”4
Ang Kapaigoan sa Grasya sa Dios
Si Jesukristo puno sa grasya. Naangkon ni Kristo ang kabuhong sa Iyang grasya gikan sa Iyang Amahan ug nahimo kini pinaagi sa “grasya ug dugang pa nga grasya” (D&P 93:12). Sa samang paagi makadawat kita grasya ug dugang pa nga grasya. Matugahan kita sa matag kinaiya ug hiyas sa Dios. Sa katapusan, kini nga makapahimo ug makapahingpit nga gahum sa grasya maanaa pinaagi sa mga baruganan sa pagtuo, paghinulsol, pagpaubos, kakugi, kamasulundon, ug pagtinguha sa Espiritu ug sa mga gasa niini.
He Is Not Here, by Walter Rane, dili mahimong pakopyahan
Ang grasya sa Dios makapaigo sa pagbayaw kaninyo gikan sa kamatayon ug sala ug tugahan kamo og kinabuhing dayon. Makapaigo kini sa pag-usab ug paghingpit kaninyo. Makapaigo kini sa paghimo kaninyo nga hingpit nga mahibalo sa inyong balaanong potensyal isip anak nga mga lalaki ug babaye sa Dios.