Mga Tingog sa mga Santos sa Ulahing mga Adlaw
Usa ka Miting sa Sakrament sa mga Anghel
Pipila ka adlaw human sa Thanksgiving, ang akong tres anyos nga anak nga lalaki, nga si Drew, nasakit. Mibangon siya kada buntag, mamahaw, mag-ilis para anang adlawa ug daw maayo ra kaayo, apan samtang nagpadayon ang adlaw, nahimo siyang luyahon ug dili mokaon.
Nagpadayon kini sulod sa pipila ka semana. Sa katapusan, sa pagka Biyernes, ika 18 sa Disyembre, gidala nako si Drew sa doktor mga alas 3:00 sa hapon. Dili na makabarug o makalakaw si Drew ug ang iyang panit nangluspad.
Mitan-aw ko sa doktor ug miingon, “Ingon na siya ani kada hapon ug gabii sulod sa milabayng tulo ka semana.” Mitan-aw og kausa ang doktor ni Drew ug dali siyang gipaadmit ngadto sa hospital. Mihimo sila og mga pagsusi apan dili matumbok kon unsay deperensya niya.
Pagkasunod adlaw, gibalhin og laing hospital si Drew. Nianang Dominggo sa buntag, gibati ko og kasagmuyo. Human sa duha ka adlaw nga daghan kaayong pagsusi gikan sa duha ka managlahing hospital, walay usa nga nasayud unsay deperensya sa akong anak. Dugang pa niana, Dominggo kadto sa dili pa mag-Pasko. Ang akong paborito nga miting sa sakrament sa tibuok tuig mao ang programa sa Pasko ug dili ko makapaminaw sa tanang maanindot nga mga awit ug mga pakigpulong sa among ward.
Samtang ang akong bana ug ako nanglakaw uban ni Drew paingon sa kwarto sa hospital diin ang usa ka miting sa sakrament gipahigayon, naguol kaayo ko. Miduol ko sa lamesa nga nahimutangan sa mga programa, mikuha og usa, ug padayon sa paglakaw ug nagdungo sa dihang nabangga ko ngadto sa usa ka tawo.
Miyanghag ko ug miingon, “pasayloa ko,” apan walay tawo. Sa akong pagtan-aw sa kwarto diin ang sakrament ipahigayon, mura kini og usa ka auditorium. Sa intablado dunay mga lingkoranan alang sa mga mamumulong, usa ka piano, ug usa ka lamesa giandam alang sa sakrament nga may pipila ka lingkoranan sa luyo niini. Gamay ra ang naa sa kwarto nga mga batang masakiton uban sa ilang mga ginikanan, kadaghanan aduna pay madala-dala nga dekstrose.
Sa akong pagsuhid sa kwarto, nabati nako ang presensya sa mga anghel. Nanglingkod mi ug miagas ang akong mga luha sa akong aping samtang nabati nako ang gugma sa Dios alang sa Iyang mga anak kinsa nangasakit ug nanag-antus, natanggong sa hospital nga anaa ang tanang matang sa balatian nianang labing nindot nga panahon sa tuig.
Miresulta kini nga maoy kinanindotan nga miting sa sakrament sa akong kinabuhi.
Wala gayud makaplagi sa mga doktor kon unsa gayud ang sakit ni Drew. Gidapatan siya og tambal para maayo ang mga sentomas ug unya gigawas na sa hospital pagkasunod adlaw. Wala siyay negatibong epekto sukad niadto, apan ang miting sa sakrament sa Pasko magpabilin ngari nako hangtud sa kahangturan.