Mga Tubag gikan sa mga Lider sa Simbahan
Unsaon nga Mahimong Mapailubon
Ni Presidente Dieter F. Uchtdorf
Ikaduhang Magtatambag sa Unang Kapangulohan
Gikan sa Abril 2010 nga pakigpulong sa kinatibuk-ang komperensya.
Ang Paghulat malisud ang mga bata nasayud niini, ug ingon man usab ang mga hingkod. Nagpuyo kita sa kalibutan nga nagtanyag og fast food, dihadiha nga pagpadala og mensahe, on-demand nga mga salida, ug diha-diha nga mga tubag sa walay hinungdan kaayo o tulugkaron nga mga pangutana. Kita dili gusto nga maghulat. Ang pipila gani saputon lang dayon kon ang ilang linya diha sa grocery mas hinay nga moirug kaysa niadtong naglibut kanila.
Pailub—ang abilidad sa pagpugong sa atong mga tinguha sulod sa panahon—mao ang usa ka bililhon ug talagsaon nga hiyas. Buot natong angkunon ang atong gusto, ug buot nato nga karon dayon. Busa, ang ingon nga pailub ingon og dili makapahimuot ug usahay malisud nga dawaton
Bisan pa niana, kon walay pagpailub, dili kita makapahimuot sa Dios; dili kita mahimong hingpit. Sa pagkatinuod, ang pailub maoy usa ka makapaputli nga proseso nga maghashas sa panabut, magpasamot sa kalipay, magpapukos sa buluhaton, ug magtanyag og paglaum alang sa kalinaw.
Ang pailub dili kay maghulat lamang. Ang pailub dili ang pagkawalay pagtagad, ni kini kapakyas sa pagbuhat tungod sa atong mga kahadlok. Ang pailub nagkahulugan nga aktibong maghulat ug maglahutay. Nagkahulugan kini nga magpabilin uban sa usa ka butang ug pagbuhat sa tanan kutob sa atong mahimo—motrabaho, molaum, ug mogamit sa hugot nga pagtuo; paglahutay sa kalisud uban sa determinasyon, bisan kon ang mga tinguha sa atong mga kasingkasing nalangan. Ang pailub dili lamang ang paglahutay; kondili paglahutay og maayo! Ang pailub nagpasabut nga magpabilin uban sa usa ka butang hangtud sa katapusan. Kini nagpasabut og paglangan sa diha-diha nga katagbawan alang sa umaabut nga mga panalangin. Kini nagpasabut og pagpugong sa kasuko ug pagpugong sa dili mabination nga pulong. Kini nagpasabut nga mobatok sa dautan, bisan kon ang kadautan nagpakita nga naghimo sa uban nga maadunahan.
Ang pailub nagpasabut sa pagdawat niana nga dili mausab ug pag-atubang niini uban sa kaisug, kalumo, ug hugot nga pagtuo. Kini nagpasabut sa pagka “mauyunon sa pagtugyan sa tanan nga mga butang diin ang Ginoo makakita nga angay ipahamtang ngari [kanato], bisan ingon sa usa ka bata nga motugyan sa iyang kaugalingon ngadto sa iyang amahan” [Mosiah 3:19]. Sa kaulahian, ang pailub nagpasabut nga pagka “hugot ug makanunayon, ug dili matarug sa paghupot sa mga sugo sa Ginoo” (1 Nephi 2:10) matag oras sa matag adlaw, bisan kon lisud kini nga buhaton.
Ang buhat sa pailub nagpunting niini: hupti ang mga sugo; salig sa Dios, ang atong Langitnong Amahan; alagari Siya uban sa kaaghup ug sa Kristohanong gugma; gamita ang hugot nga pagtuo ug paglaum diha sa Manluluwas; ug ayaw gayud paghunong. Ang mga leksyon nga atong nakat-unan tungod sa pagpailub mopalambo sa atong kinaiya, mobayaw sa atong mga kinabuhi, ug modugang sa atong kalipay. Makatabang kini kanato nga mahimong takus nga mga naghupot sa priesthood ug matinud-anon nga mga tinun-an sa atong Magtutudlo, nga si Jesukristo.