“Ua Ou Iloa Nei mo Au Lava Ia”
E te manao e aoao mo oe lava le moni o le talalelei? Ia siitia lou aoaoina i le talalelei i le seminare.
“Ua ou iloa nei mo a‘u lava ia” o nai upu faigofie na na saunoa i ai le Perofeta o Iosefa Samita i lona tina ina ua uma ona ia vaai i le Uluai Faaaliga ( Iosefa Samita—Talafaasolopito 1:20). O loo i ai i nei upu se lesona mamana mo i tatou i le taimi nei. E pei ona aoao mai Peresitene Thomas S. Monson: Pe ua e 12 pe ua 112—po o soo se mea lava i le va—e mafai ona e iloaina mo oe lava e moni le talalelei a Iesu Keriso.”1
Ina ia mafai ona fesoasoani ia “iloa mo oe lava ia”, ua faamaea nei e tamaiti aoga seminare i le lalolagi atoa ni tulaga manaomia faaopoopo se lua e faauu ai i le seminare: (1) faitau ia tusitusiga paia ua tofia mo le kosi ma le (2) pasi ni faavasegaga e aoao ai i le taimi o kosi taitasi. O le ala lea e mafai ai ona fesoasoani tulaga manaomia lea mo le faauuga e faamalosia ai lau molimau:
E te faitau ma suesue i tusitusiga paia mo le kosi.
A o e suesue i tusitusiga paia, o le a amata ona e lagonaina le faama’ite a le Agaga o le a taitaia oe e faateleina lou liua. Ina ua maea lana faitauga o tusitusiga paia e manaomia i lona tausaga faaiu i le seminare, sa faasoa atu e se tasi o tagata aoao faapea sa tele atu isi mea sa ia aoaoina aua sa Ia “matua faitau lava i mau—se le na o le faitau ae sa ia suesueina.”
Na aoao mai e Elder D. Todd Christofferson o le Korama a Aposetolo e Toasefululua le uiga o le suesue: “Pe a ou fai atu ‘suesue’, o lona uiga … faitauina ni nai fuaiupu, taofi ae mafaufau loloto i ai, ma le faaeteete toe faitauina le fuaiupu, ma pe a e mafaufau e uiga i o latou uiga, tatalo mo le malamalama, fesili i lou mafaufau, faatalitali mo ni uunaiga faaleagaga, ma tusi i lalo uunaiga ma le malamalamaaga e oo mai ina ia mafai ona e manatua ma aoao atili ai.”2
E mafai ona e faaaogaina le faavasegaga e aoao ai ina ia iloilo ai mea ua e aoaoina.
O le faavasegaga o se aoaoga e pei o le fesili a se agelu a le Alii ia Nifae: “O le a le mea ua e vaai atu i ai?” 1 Nifae 11:14). O lenei fesili na uunaia ai Nifae e iloilo ma faailoa atu le a se mea sa ia aoaoina.
O le faavasegaga mo le aoaoina e tolu ni vaega: o fesili o tali eseese e filifili ai ma se fesili o se talatusi, lea e fai ia togi, ma se faavasegaga patino o ou talitonuga, e le faia ni togi. Ina ua uma le faavasegaga o se aoao, fai mai se tamaitiiti se toatasi, “Na ou tulimatai atu i ai ona sa ou manao e tagai i le mea na ou aoaoina mai le seminare.” Na ta‘ua e se isi tamaitiiti aoga o le faavasegaga o aoaoga o le a “fesoasoani ia te oe ia malamalama ai i mea o loo i totonu o le talalelei ma le mea e manaomia ona e i ai.”
O faavasegaga o le a sili atu ona aoga pe a e taulai i aoaoga faavae o le talalelei ma mataupu faavae ia e avea ma faavae o fesili o faavasegaga mo le aoaoina. Ina ua uma ona talanoa i se vasega seminare ia aoaoga faavae i tua atu o le fesili, sa faasoa mai e se tasi o tagata aoao, “Na suia ai le vaaiga o le suega i se talanoaga ma se fausaga o molimau. Na fesoasoani e faamautu ai mea na e aoaoina.”
E mafai ona e aoao e fiafia i le aoaoina mo oe lava ia.
Aoao mo i tatou lava e moni le talalelei toefuataiina a Iesu Keriso e mafai ona avea ma se tasi o aafiaga aupito maoae ma aupito sili ona fiafia i le olaga.3 Na fai mai se tasi tamaitiiti, “Sa ou fiafia i le auai atili i le faatinoga ma iloa ai e tatau ona ou laa teisi i luma nai lo le na o le sau ma nofonofo i se nofoa ma faalogologo ae le o auai moni i le faatinoga”
Na aoao mai e Elder David A. Bednar o le Korama a Aposetolo e Toasefululua le taua o le aoaoina: “O le aoao e fiafia i le aoaoina o le totonugalemu lea o le talalelei a Iesu Keriso, e taua tele i lo tatou atinaega faifai pea faaleagaga ma le tagata lava ia, ma o se mea e manaomia atoa i le lalolagi lea tatou te faia nei ma o le a e ola ai, auauna atu, ma galue.”4
O le tele o taumafaiga e te faaaluina, o le tele foi lea o le fiafia ma le aoaoina o le a e oo i ai.