Sa Amata Ona Ou Tatalo mo Ruta
June Foss, Iuta, ISA
Agavale: ata na tusia e Richard Mia; taumatau: ata na tusia e Allen Garns
Ina ua ou iloa ni matafaioi tautupe e lei mafaufauina o se tamaitai nofofua, sa ou iloaina ua tatau ona sue sa’u galuega lona lua. E lei leva ae sau Marty, o se uso i la’u uarota, ma talosaga mai mo la’u fesoasoani. O le a o ma lona toalua i se misiona, ae ua tatau ai ona le toe faigaluega. Sa ia faamatala mai o aso Toonai uma lava, e fesoasoani ai o ia i se olomatua, o Ruta, sa nofo i se fale-mo e e i ai manaoga faapitoa. Sa ofo mai e Marty lana galuega ia te au ma sa fai mai e totogi a’u e Ruta mo la’u galuega.
O le Aso Gafua na sosoo ai, sa faamalamalama mai ai e Marty ma Ruta ia te au a’u mea e fai ma sa amata la’u galuega i ni nai aso mulimuli ane. Sa amata ona ou aoina le tagamea a Ruta ma ave i luga i le potu e fai ai tagamea. E lei leva ona ou amata, ae nati atu Ruta i totonu ma ee mai ia te au. Sa ia fai mai e aua lava nei ou tataina ona lavalava e aunoa ma le fesili muamua atu.
Sa na ona ou faia lava ole mea sa la faatonu maia ma Marty ou te faia. I lo’u faaatu ma le tiga, sa ou taumafai ai e taofi o’u loimata. Sa ou faapea ifo ia te au lava, ou te lei toe manaomia nisi faaatu po o faafitauli i lo’u olaga. Semanu ua ou savali ese loa lava i lena taimi pe ana faapea ou te lei folafola atu ia Marty o le a ou vaaia Ruta a o malaga o ia.
O lea vaiaso ma lea vaiaso, sa ee mai ai Ruta ma le ita ia te au i mea uma sa ou faia. Sa foliga mai sa le mafai lava ona ou faamalieina o ia tusa lava po o le a lo’u taumafai.
Sa amata ona ou tatalo mo le malosi e onosaia ai Ruta ma ana upu saua, ae e leai se mea na suia. Sa faaauau pea ona inoino e fesoasoani ia te ia.
Ona oo lea i se tasi aso sa ou suia a‘u tatalo. Sa ou le toe tatalo mo au lava ia a ua amata ona ou tatalo mo Ruta. Sa ou ole atu i le Tama Faalelagi e fesoasoani mai ia ou malamalama i ona manaoga ma pe mafai faapefea ona ou fesoasoani ia te ia.
Mai lena aso na suia ai mea uma. Na faamaluluina lo‘u loto, ma sa tuputupu ae lo’u alofa ia Ruta. Na sui foi Ruta ia. Sa tatala mai ma faasoa mai lona olaga, o mea sa fiafia ai, ma ona faanoanoaga. Sa ia fai mai sa ia misia lona aiga. Sa ia faamatala mai mea matagofie sa ia faia i lona olaga a ua le toe mafai nei ona fai. Sa ia faamatala mai sa tuulafoaiina o ia ma sa faanoanoa.
Sa amata ona ou sagisagi fiafia e vaai ia Ruta i vaiaso taitasi, ma sa sagisagi foi o ia e vaai mai ia te au.
Sa aoao mai e lou aafiaga ma Ruta se lesona taua. Ina ua ou auauna atu moni ma lo’u loto atoa, sa oo ina ou malamalama i le aoaoga a Peresitene Spencer W. Kimball (1895–1985) faapea, “i le totonugalemu o vavega o le auauna atu, o loo i ai le folafolaga a Iesu, o le faamaumauina o i tatou, tatou te maua ai i tatou lava” (“Small Acts of Service,” Ensign, Dec. 1974, 2.)