I le po a o lei faasatauroina Iesu, sa Ia faatonuina Ona soo e toalua ia saunia se taligasua o le afiafi. Ona Ia valaaulia lea o Ona Aposetolo e o mai. I lena taligasua, sa faaigoa o le Talisuaga Mulimuli, sa avatu ai e Iesu i Ona soo se ala faapitoa e manatua ai pea o Ia. E mafai ona tatou faitau i ai i le Feagaiga Fou:
“Ona tago ai lea o [Iesu] i le areto, ua faafetai, ua tofitofi ma avatu ia te i latou, ua faapea atu, O lo’u tino lenei, ua foaiina atu mo outou: tou te faia le mea nei e fai ma faamanatuga ia te a’u.
“Sa faapea foi ona tago i le ipu, ina ua uma ona talisua, ua faapea atu, O lenei ipu o le feagaiga fou lea i lo’u toto, ua faamaligiina mo outou” (Luka 22:19–20).
Pe a tatou aai ma feinu i le faamanatuga, o loo tatou faia le mea lava lea e tasi na faia e le Au Aposetolo i le Talisuaga Mulimuli. E faamanatu mai e le falaoa ia i tatou le tino o Keriso ma Lona mafatia faaletino mo i tatou. E faamanatu mai e le vai ia i tatou Lona toto sa faamaligiina mo i tatou.
O tatalo o le faamanatuga e faamanatu mai ai foi ia i tatou folafolaga sa tatou faia ina ua papatisoina i tatou—ia manatua pea Iesu Keriso. Pe a e faalogologo i tatalo o le faamanatuga, mafaufau e uiga i mea sa e faia i lena vaiaso e manatua ai Iesu. E mafai faapefea ona e manatuaina o Ia i le vaiaso a sau?