Faamanuiaga o a Tatou Fanau e ala i le Faaleleia Atili o a Tatou Faaipoipoga
E alala le tusitala i Iuta, ISA.
O le uiga auaumama o lau faaipoipoga e faatosina ai lau fanau, pe e te iloaina pe leai. A o oulua galulue ma lou toalua e faaleleia atili la oulua sootaga, o le a faamanuiaina lau fanau.
I se tasi aso na ou faia se fofo faatasi ai ma se talavou o le sa i ai talu ai nei lona olaga i se tulaga lamatia i le punouai ai i amioga matautia. Sa ou galue talu ai nei ma ona matua ma sa taumafai e faavasega ai lana vaaiga ma le malamalama i le sootaga a lona aiga. Ina ua ou fesili e uiga i le ulugalii a ona matua, sa ia tilotilo mai ia te au, ma e aunoa ma le faatuai sa ia tali mai, “O o’u matua e le fiafia le tasi i le isi.”
Sa ou fesili atu pe faapefea ona ia iloa lena mea, talu ai sa faafia ona ta’u mai e ona matua ia te au, e leai lava so la eseesega ma sa faamautinoa mai foi e le iloa lava e le la fanau o la’ua faanoanoa faale-faaipoipoga. O se folafolaga sa ou faalogo soo i ai mai le tele o ulugalii, o se fomai faapitoa o faaipoipoga ma aiga.
“E mafai lava ona e iloa,” sa ia tali mai ai. Sa ia faamalamalama mai e le mafai ona uma lona popole e uiga i se taimi e solovi ai lona aiga. Sa ia faaalia mai ma loimata ua ma’i ai o ia faaletino ma sa faigata ona moe o ia ma alu i le aoga. “Ou te mafaufau lava i lenei mea i taimi uma,” o lana tala lea.
Sa nutimomoia lo’u loto a o ou saofai faasaga atu ia te ia ma mafaufau i le ata ua ou masani ai. Sa ou iloaina ona matua e alolofa ia te ia ma mananao e faia se mea e fesoasoani ai ia te ia, ae sa ou popole i lo la le manatu mamafa lea ua avea ai la la’ua faaipoipoga faigata ma mea ua tiga ai o ia faapea isi o le la fanau.
Fai mai le folafolaga i aiga e faapea o le “tane ma le ava e i ai se tiutetauave paia e alofa ma tausi e le tasi le isi ma a la’ua fanau.”1 O nisi taimi ou te popole “mo a latou fanau” o se vaega ua tulei ese ai le vaega o le “mo le tasi le isi”.
I la‘u galuega, ou te matauina ai tagata o le Ekalesia i le faia o osigataulaga e tele mo a latou fanau ina ia fesoasoani ia faamanuiaina i latou. O nei matua e uunaia le lelei o faiga faalelotu i a latou fanau, e pei o le tatalo, suesue i tusitusiga paia, ma alu i le lotu. Latou te faamalosiauina taumafaiga faaleaoaoga ma le mauaina o le tomai o le a saunia ai fanau mo ni lumanai susulu. Ae ui i lea, ou te popole nei manatu mama nisi i le punaoa taua e ofo mai e faaipoipoga e maualuga uiga auaumama i le sauniaina o le autalavou mo faamoemoega e faavavau.
E toatele ulugalii e tuuto atu lo latou gauai atu i mafuaaga e taua ae e itiiti ni mea e fai e faamalolosia ai a latou faaipoipoga. O nisi e fetuunai ma le maelega le faatulagaga o o latou taimi ina ia auai i faatinoga a le fanau ae foliga mai e le mafai ona maua se taimi mo se evaga ma se toalua. I le asiosio o le tausiga o se tamaitiiti, fausiaina o matata mo galuega, ma le faataunuuina o valaauga o le Ekalesia, e faigofie lava ona faatuatuanai ia faaipoipoga ma o nisi taimi e mafai ona valivali i feteenaiga, inoino, ma le faalataina.
A oo ina iloa atili e ulugalii le faatosinaga mamana o a latou faaipoipoga i a latou fanau, ona manino ai lea e tele faamanuiaga e mafai ona maua pe a saili ia ulugalii ma le mataalia e tausia ai ma faamalosia a latou faaipoipoga.
O Uiga Auaumama Faale-Faaipoipoga e Faatosina ai Le Fanau
Ou te talitonu o le tele o ulugalii o le Au Paia o Aso e Gata Ai e mananao i a latou faaipoipoga ina ia faamanuiaina, ma ou te maofa i le tulaga o le tautinoga faale-faaipoipoga latou te faaalia. I se tulaga lautele, o le Au Paia o Aso e Gata Ai e ulu atu i le feagaiga e faavavau o le faaipoipoga (tagai MF&F 131:2) e faatauaina lena feagaiga ma o le tele ina onosaia le aofaiga tele o le faanoanoa ina ia tausisia ai le maopo o a latou faaipoipoga.
Ae peitai, o nisi taimi ou te vaaia ai faaipoipoga e tele atu le maopo nai lo uiga auaumama. O nisi ulugalii e sese manatu faapea afai e na ona latou aloese lava mai le feupuai i luma o a latou fanau, o le a le iloa lava e a latou fanau le motusia o le faaipoipoga. O fanau e matua lotomaualalo ma e masani lava ona i ai se lagona o se mea e le o lelei, lea e mafai ona taitai atu ai i se lagona loloto o le le malupuipuia. O le leai o se feeseeseaiga i se faaipoipoga o se sui taugofie lea mo le sootaga malupuipuia.
Na fautua mai e le sailiiliga e uiga i le tulaga auaumama o le faale-faaipoipoga ua siita’i ai se lagona i le malupuipuia faalelagona, faaleleia atili ai le soifua manuia o le fanau.2 I la’u galuega faatino, o au o se molimau i le mea moni faapea e matua aafia lava le fanau i le tulaga auaumama o le faaipoipoga a matua. O lenei mataupu faavae e atagia mai i upu a Peresitene Spencer W. Kimball (1895-1985): “O le Faaipoipoga … e le gata ina maua ai le fiafia, ae faapea foi i le olioli e faavavau. E aafia ai e le gata i tagata e toalua e aafia ai, ae faapea foi o latou aiga aemaise lava i a latou fanau ma fanau a a latou fanau e oo atu i le tele o augatupulaga.”3 E tele lava ina ou faamatala atu i tagata latou te le o na fatuina a latou lava faaipoipoga ae i le tulaga silisili o faaipoipoga foi a a latou fanau ma fanau a fanau.
Sa faaopoopo mai ia Elder Dallin H. Oaks o le Korama a Aposetolo e Toasefululua: “O le taumamanina o le manatu faapea o faaipoipoga e tumau ma e faapelepeleina, e i ai ni ona taunuuga taua. I le ta’a’ina ai i tete’aga a o latou lava matua po o manatu taatele e faapea, o le faaipoipoga o se polo ma o se filifili e taofia ai le faamalieina o le tagata lava ia, o lea ua teena ai e isi talavou le faaipoipoina. O le toatele o e faaipoipo e tetee i le faia o tautinoga aiai, ma ua sauni e sola ese i le luitau ogaoga muamua lava.”4
I le avea ai ma se fomai o le faaipoipoga, e mafai ona ou faamautu atu faapea o tagata matutua o e sa tetea o latou matua, pe sa maualalo le tulaga auaumama o faaipoipoga, e tele ina lipotia mai le le malupuipuia o o latou lava tomai e tausisia ma faatumauina ni sootaga manuia mo se taimi umi. E masani lava ona fulufululele i soo se feeseeseaiga i le faaipoipoga ma oo atu ina faatetele le taumafai e aloese mai le feeseeseaiga, lea e mafai i nisi taimi ona faaitiitia ai le felata’i faaleulugalii. E le faapea ou te le masani ona ou vaai i tagata matutua o fetagisi a o latou tomanatu i le tiga faalelagona ua latou oo i ai a o matamata atu i le faiifo ma le malepelepe o faaipoipoga a o latou lava matua. O le mautinoa i le faaipoipoga e faaitiitia i aiga e le lelei le tulaga auaumama faale-faaipoipoga.
Filifili e Faaleleia Atili le Tulaga Auaumama Faale-Faaipoipoga
Faaleleia atili o le tulaga auaumama faale-faaipoipoga e tele ina afaina ona o filifiliga. Na faamautinoa mai e Elder Russell M. Nelson o le Korama a Aposetolo e Toasefululua e faapea “o se alii ma se tamaitai ua uluitino le alofa, e mafai ona filifilia se faaipoipoga e aupito maualuga le uiga auaumama po o se ituaiga e maualalo ifo o le a le tumau.”5
Sa tusia e se fomai o faaipoipoga ma se tagata suesue lauiloa o William J. Doherty, e uiga i le taua o le tuufaatasia o tautinoga ma faamoemoega, po o taumafaiga aoga e faaleleia atili ai sootaga o le faaipoipoga: “Tusa Lava pe ia i tatou se tautinoga e le magagauina ia tatou paaga, o le toatele o i tatou e tauaso pe faapefea ona mamulu atu a tatou faaipoipoga e ala i le tafia malie atu pe afai tatou te le tausisia le fafagaina o le palapala. … O tautinoga e aunoa ma le faamoemoega e tau atu i se faaipoipoga mautu ae mafu.”6 E toatele ulugalii ua faaalia la latou tautinoga loloto ma le mautu ae itiiti lava, pe afai e i ai, e taumafai ia manuia lelei le faaipoipoga. E momomo lava le loto i le vaai atu e le o lava le faaaogaina o le aseta faavae faale-faaipoipoga.
Alofa i Lou Toalua
Ina ua lauga le peresitene aoao talu ai o Tamaitai Talavou o Elaine S. Dalton sa ia fautuaina ai le mea aupito sili ona taua e mafai e se tama ona fai mo lona afafine o le “alofa i lona tina,”7 sa tuia lo’u loto i le iloa ai o a’u ae le o lo’u toalua sa manaomia ona faalogo i lea lauga; sa sili atu lona faautauta i le fesootai atu i la’u fanau le tele o lona alofa ia te au nai lo lo’u faia. Sa ou mafaufau i le tele o taimi ou te savali atu ai i se potu ae o fesili atu lo’u toalua i se tasi o la’u fanau, “Mate mai po o le a?” lea e tali atu ai se tasi, “Ua ou iloa … e te alofa ia Mama,” po o le, “Ua ou iloa … O Mama o lau uo sili,” po o le “Ua ou iloa … O Mama lau teine e te momoo i ai,” o se anoano o isi tautinoga faapena sa ia faia pea i le tele o tausaga. Sa ou iloaina o le saogalemu tele sa ou lagonaina i la‘u faaipoipoga, ma ou te le o amanaiaina, o se taunuuga tuusao o le agalelei o lo’u toalua i le faailoaina atu o lona alofa, faamemelo, ma le faaaloalo mo au i le ma fanau.
O le taua o aoaoga a Sister Dalton ua faamamafaina e le perofeta o Iakopo i le Tusi a Mamona. A o ia aoaiina le au sa Nifaē ona o lo latou amioleaga, sa ia ta‘ua lena mea, i le faatusatusa atu i ai, i le au sa Lamana “ua alolofa a latou tane ia latou ava, ma ua alolofa a latou ava ia latou tane; ma ua alolofa alolofa a latou tane ma a latou ava ia latou fanau” (Iakopo 3:7), ua faamalosia ai le manatu e faatauaina tele lenei mea e le Alii.
O le Homefront, o se faasilasilaga faasolo o se auaunaga lautele a le Ekalesia, e i ai se vaimea lauiloa i le TV e ta’ua “I le Itula,” lea e taumafai ai se tamaitiiti e tosina mai le gauai a lona tama faigaluega. I se tasi taimi na fai mai ai le tama, “[Afai] e le faigaluega Tama, e le totogia Tama,” lea na faaopoopo atu i ai le tina, “E fiafia tele tagata i le galuega a Tama o lea latou te totogia ai o ia.”8 O se tasi lea o faasalalauga e ese lo’u fiafia i ai, aua ua aloese mai ai le tiina i se fua faatafatolu e le aoga, lea e laa atu ai se matua i totonu ma lagolago se tamaitiiti e ala i le otegiaina o le matua ua le fia talanoa i se isi. E masani ona tulai mai ai i lenei mea le taupunipuni i le isi matua ma lagona o le tamaitiiti ua le mautinoa. Faatasi ai ma se faaupuga lelei ma le faautauta, e lagolago e le tina o loo i le faasalalauga le tama ma le tamaitiiti. Ua faatalitonuina ai afai e tele atu ni matua e fetuunaia a latou talanoaga ina ia faapei atili ai o lenei talanoaga, o le a faaleleia atili le aotelega o le tulaga auaumama faale-faaipoipoga ma le aiga.
Fautuaga mo le Faaleleia Atili o le Tulaga Auau Mama Faale-Faaipoipoga
O le tala fiafia e uiga i le faaleleia atili o le uiga auaumama faalefaaipoipoga o le a mafai ona vave le siitaga e tatau ona i ai e ala i le tuufaatasia o suiga laiti. O nisi nei o fautuaga:
Faailoa ma faasoa atu mea e te manao i la oulua faaipoipoga e foliga mai ai i le 5, 10, po o le 20 tausaga. Ou te ofo pea lava i le toatele o ulugalii e le talanoa e uiga i ituaiga faaipoipoga e mananao ai. O le faia o lenei talanoaga e tuu ai le faaipoipoga i le ogatotonu o le tulaga, ma tuu ai ulugalii i se ala e faaleleia atili ai le tulaga faalefaaipoipoga ma tautinoga mo le lumanai.
Tusi i lalo ma faasoa mai se mea lelei e te manatua i le faaipoipoga. O lagona le lelei e aga atu ina matua mitiia ma o lea e tele ai ina punitia le faamoemoe. A mafaufau tagata e uiga i le faasoa atu o manatua lelei, ua latou faaavanoaina le toe maua o le faamoemoe.
Faasoa atu se manatua o se taimi sa mafai ai ona oulua faatoilaloina faatasi se luitau. O le toe manatuaina o nei tulaga o se auala e maua ai le lotogatasi o se ulugalii faaipoipo.
Fatu ni gaoioiga laiti ae anoa pe a oulua eseese ma toe tutu faatasi. E foliga mai o se tomai fatuai, ae e tele taimi e galo ai i ulugalii le taua o se kisi faamoemoeina, opo mai, po o se faaupuga e mafai ona matuaia ai le lelei i le faaipoipoga i le aluga o taimi.
Folasia se elemene o se mea fou i la oulua evaga. E i ai se sailiiliga ua fautuaina ai faapea o ulugalii e eva ma se faamoemoe e ala i le sailia o aafiaga fou e tele lava ina ausia le tulaga auaumama i le la mafutaga. E manaomia ai le fatufatu mea fou ma taumafaiga, ae le o tupe.
Ta‘u soo atu i lau fanau le mea e te faamemelo ai i lou toalua. O le mea lea ou te fiafia lava i ai. A i ai ulugalii e o mai mo se vaifofo ae mulimuli i lea faatonuga, e vave lava ona latou lipotia mai taunuuga lelei.
Saili ma le maelega i punaoa faagaeetia mo le faaleleia atili o tulaga faalefaaipoipoga. E aofia ai tusi ma tusiga (lolomi po o le leo), taaloga, lauga, faeasaite, mafutaga faaleaoaoga, konafesi, ma isi mea.
Fesili le tasi i le isi e le aunoa pe o oulua fesootai atili pe ua leai o se ulugalii nai lo le taimi muamua ma talanoaina mea e mafai ona oulua faia e faatumu ai le va lea. E mafai ona faia lenei mea i aso taitasi, faalevaiaso, pe faalemasina ma maua ai se ala e toetaulai atu ai le gauai i le faaipoipoga.
Fefautuaai ma lou epikopo ina ia maua ai punaoa faapolofesa pe a tatau ai. Mo mafuaaga eseese, e masani ona faatuai tagata i le sailia o le fesoasoani. E le mafai ona ou faitauina le aofaiga o taimi ou te moomoo ai maimau pe ana vave sailia faatasi e se ulugalii se fesoasoani, a o lei tele se inoino ua faa’onaina ai le faaipoipoga.
Tatalo. Ua fautuaina mai e Peresitene Henry B. Eyring i le Au Peresitene sili: “Tatalo mo le alofa lea e mafai ai ona e vaaia le lelei i lau soa. Tatalo mo le alofa e avea ai vaivaiga ma mea sese e foliga mai e laiti. Tatalo mo le alofa ia avea le olioli o lau soa ma ou foi. Tatalo mo le alofa e te manao e faaitiitia ai le avega ma faamaluluina le faanoanoa o lau soa.”9 Afai e foliga faigata tele, e mafai ona tatalo taitoalua ia mananao e naunau i na mea.
E Finagalo le Tama Faalelagi Ia Fiafia a Tatou Faaipoipoga
Na tautino mai e Peresitene Howard W. Hunter (1907–95) “o soo se mea lava e tuu i ai aao o Iesu e ola. Afai e tuu e Iesu ona aao i luga o se faaipoipoga, e ola. Afai e faatagaina o ia e faaee ona aao i luga o se aiga, e ola.”10 E i ai lo’u talitonuga maumaututu e finagalo le Tama Faalelagi ia i tatou ia silisili ona lelei a tatou faaipoipoga o le tulaga auaumama aupito maualuga, ma o le a ia taialaina i tatou i a tatou taumafaiga e faaleleia atili na sootaga mo le manuia o o tatou aiga. O faaipoipoga fiafia e maua ai faamanuiaga maoae mo i tatou ma mo a tatou fanau.