Ni Karokoa Ae Ti A Manga Kaitiboaki
Mai buakoia taian Tiibu te teei ao Taan Kawakin Tiibu
E maaku raoraou ae uarereke n tain te angibuaka, ao I kona n ongo tangitangina.
Tamnei iroun Suren Manvelyan/Thinkstock
Ngke te ataeinimwaane ngai ae I uarereke, tamau e kunea te tiibu te teei ae tiku ni maroa inanon te rereua. Te nanai n tiibu are bon ana bwai te tina a waaki nako, ao n te aro teuana e uamaenako te tiibu te teei mairoun tinana, ao te tia kawakin tiibu e aki ataia ae e a bua. Ibukina bwa e aki kona ni maiu n tii ngaia inanon te rereua, e tabekia tamau ao e uotia nakon te mweega. Ngke arona bwa e katuka te tiibu te teei ikekei ao e na kaman tia ni mate, ke ni mwane irouia kameanti ke ni matenibaki ibukina bwa e rang uarereke ao are e bon tangira te ranimamma. Tabeman taan tararuaiia tiibu a araniia taian tiibu te teei aikai bwa “tiibu aika tiotionako.” Tamau e anganai te tiibu te teei ao I a riki bwa tia tararuaia.
Ibukin tabeua te wiiki I kabueea mirikin te kao n ana bibi te teei ao ni kamwarakea te tiibu te teei. Ti waekoa n riki bwa rao aika teimatoa. I aranna bwa Nigh—I aki uringnga bwa tera bukina. E a moanna n ikawairake. Ngai ma au tiibu ti takakaro iaon te uteute. N tabetai ti bae ni wene iaon te uteute ao N na bae ni kawenea atu iaon rarikina ae maraurau man buraerae ao n tararake n taraa karawa ao te nang ae mainaina ae bubu. I aki rorokana au tiibu n te ngaina. E bae n aki birinako. N te tai ae waekoa ao e a bwaati ni kana te uteute. I aki kona ni wetea au tiibu man te katawanang irarikin te auti ma tii man katotongan tangitangin te tiibu: Baa. Baa.
Te tairiki teuana ao e a kaoti te angibuaka ae korakora. I mwaninga ni katuka au tiibu te teei n ana tabo ni man n te tairiki anne n aron ae I bon tataneiai ni karaoia. I a nako n au kainiwene. E a maaku raoraou ae uarereke n tain te angibuaka, ao I kona n ongo tangitangina. I ataia bwa I riai ni buoka au man, ma I tangiria bwa N na mano, n abue, ao ni mauu iaon au kaniwene. I aki te roko n teirake n aron ae I bon riai ni kaman karaoia. Te ingabong are imwiina I a otinako ao ni kunea au tiibu ni mate. Te kamea ae ongo naba tangitangina ao e tiringnga. I namakina te rawawata ae korakora. I a tia n aki riki bwa te tia kawakin tiibu ae raoiroi ke te tia mwiokoaki are onimakinai iai tamau. E taku tamau, “Natiu te mwaane, I aki kona n onimakiniko n tararuan tii temanna te tiibu te teei?” Ana maroro tamau e a kamarakai riki ni kabuaakin raoraou ae buraerae. I baireia n te bong anne, n aron te ataeinimwaane ae uarereke, bwa N na kataia n aki manga mwanuoka mwiokoau ngkai te tia kawakin tiibu ngkana I a manga anganaki te nakoa anne. …
Imwiin onobwi riki te ririki, I teimatoa n ongo inanou tangitangin, te tiibu te teei ae maaku inanon ataeinimwaaneu bwa I a tia n aki riki bwa te tia kawakin tibu ae I bon riai ni kaman riki iai. I kona naba n uringa ana takutaku tamau: “Natiu te mwaane, I aki kona n onimakiniko n tii tararuan temanna te tiibu te teei” Ngkana ti aki riki bwa taan kawakin tiibu aika raoiroi, I miimi bwa tera ara namakin n te maiu are akea tokina.
Mairoun James E. Faust, “Responsibilities of Shepherds,” Ensign, Meei, 1995, 46, 48.