Kabatan-onan
Mabuhat ngadto sa Uban Unsay Gibuhat ni Sarah Kanako
Ang tagsulat nagpuyo sa Utah, USA.
Kaniadto lisud alang nako sa pagsunod sa akong pagtuo isip tubag sa pangutana nga sama ka yano sa “Nganong dili ka moinom og kape?” Sa nangagi ako mobalibad sama sa “Pait kaayo” o “Dili ko ganahan sa lami.”
Nganong naulaw ako? Nganong mahadlok man ako pag-ayo sa pagbarug unsay akong gituohan? Nahinumdom karon, wala gayud ako makasabut unsay akong gikahadlukan. Apan nahinumdom gyud ko sa dihang mihunong ko sa pagtago sa luyo sa pagpamalibad.
Usa ka adlaw sa akong klase sa high school sa Iningles, ang magtutudlo mipahibalo nga kami manan-aw og salida sa TV nga dili nako angay nga tan-awon. Samtang ang ubang mga estudyante miabiba sa kalipay, ang akong kauban sa klase nga si Sarah miisa sa iyang kamot ug mihangyo kon makabiya ba siya.
Sa dihang ang magtutudlo nangutana kon ngano, si Sarah mitubag, “Tungod kay usa ko ka Mormon ug dili ko motan-aw og salida nga dunay pagpamalikas.”
Ang iyang kaisug sa pagbarug atubangan sa klase talagsaon. Salamat ni Sarah, mibarug usab ko ug naghulat sa gawas uban sa tin-aw nga tanlag nga mahuman ang salida.
Nausab ako sa kahangturan. Misugod ko sa pagpasabut sa akong pagtuo imbis molikay sa hilisgutan. Ug isip resulta, nakabaton ko og pagsalig sa akong kaugalingon ug gani mas miapil pa sa mga kalihokan sa Simbahan ug sa eskwelahan.
Wala gyud nako masultihi si Sarah kon unsa ka importante ang iyang ehemplo ngari nako, apan naningkamot ko sa pagsunod sa iyang ehemplo sa pagsalig. Karon akong naamguhan nga ang pagkamiyembro sa sagrado nga Simbahan sa Dios dili gayud angay ikaulaw. Manghinaut ko nga pinaagi sa akong ehemplo, akong mabuhat ngadto sa uban unsay gibuhat ni Sarah kanako.