Walay Paglubad nga mga Istorya sa Ebanghelyo
Siya Nabanhaw
Si David O. McKay natawo niadtong Septyembre 8, 1873. Siya giorden isip usa ka Apostol niadtong Abril 9, 1906, sa edad nga 32, ug niadtong Abril 9, 1951, siya gipaluyohan isip Presidente sa Simbahan. Ang mosunod gikutlo gikan sa pakigpulong nga iyang gihatag niadtong Abril 1966 nga kinatibuk-ang komperensya. Alang sa tibuok pakigpulong, tan-awa sa Conference Report, Abr. 1966, 55–59.
Ang lig-on nga pagtuo kang Kristo mao ang labing importante nga gikinahanglan sa kalibutan karon.
Kon ang usa ka milagro usa ka kahibulongang hitabo kansang mga kusog sa tigpasiugda dili matugkad sa panabut sa kaalam sa tawo, nan ang pagkabanhaw ni Jesukristo maoy labing katingalahang milagro sa tanang panahon. Niini anaa ang gipadayag nga pagkamakagagahum sa Dios ug sa pagkaimortal sa tawo.
Ang Pagkabanhaw usa ka milagro, hinoon, sa pagtuo lamang nga lapas sa salabutan ug pagsabut sa tawo. Ngadto sa tanan kinsa modawat niini isip kamatuoran, usa lamang kini ka pagpakita sa managsama nga balaod sa kinabuhi. …
I-establisar kini ingon nga usa ka kamatuoran nga si Kristo mibanhaw sa Iyang lawas ug nagpakita isip usa ka mahimayaon, nabanhaw nga binuhat, ug ikaw makatubag sa pangutana sa dugay nang panahon: “Kon ang tawo mamatay, mabuhi ba siya pag-usab?” (Job 14:14).
Mga Saksi sa Pagkabanhaw
Ang literal nga Pagkabanhaw ni Kristo gikan sa lubnganan tinuod gayud ngadto sa mga disipulo kinsa nasuod pag-ayo Kaniya maoy usa ka kasigurohan. Sa ilang mga hunahuna wala gayuy pagduha-duha. Sila mga saksi sa kamatuoran, sila nasayud tungod kay ang ilang mga mata nakakita, ang ilang mga dunggan nakadungog, ang ilang mga kamot mibati sa pisikal nga presensya sa nabanhaw nga Manunubos.
Si Pedro, ang labaw nga Apostol, sa okasyon sa dihang ang onse kinahanglang magpili og usa nga mopuli ni Judas Iscariote, miingon, “Busa sa mga tawo nga among gikauban … usa niining mga tawhana kinahanglan himoon nga uban kanamo saksi sa iyang pagkabanhaw” (Mga Buhat 1:21–22). …
Sa laing okasyon si Pedro mipahayag sa atubangan sa ilang mga kaaway, ang mga tawo nga mipapatay ni Jesus diha sa krus: “Mga tawo sa Israel, patalinghugi ninyo kining mga pulonga; … Kining maong Jesus gibanhaw sa Dios, ug kaming tanan mga saksi niini” (Mga Buhat 2:22, 32). …
Dugang nga mga Saksi
Ang Simbahan ni Jesukristo sa mga Santos sa Ulahing mga Adlaw uban ni Pedro, uban ni Pablo, uban ni Santiago, ug uban sa tanang mga Apostoles kinsa midawat sa Pagkabanhaw nga dili lamang tinuod gayud, apan isip pagkatuman sa balaan nga misyon ni Kristo dinhi sa yuta.
Diseotso ka gatus ka tuig human mamatay si Jesus diha sa krus, si Propeta Joseph Smith mipahayag nga ang nabanhaw nga Ginoo nagpakita ngadto kaniya, nag-ingon: “Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:17). …
Kon ang pagpamatuod ni Joseph Smith nagbarug nga nag-inusara, nga, sama sa giingon ni Kristo sa Iyang pagpamatuod dihang namulong Siya sa Iyang Kaugalingon, nga walay kapuslanan; apan si Jesus adunay pagpamatuod sa Dios ug sa mga Apostoles. Ug si Joseph Smith adunay laing saksi [kinsa] mikumpirmar sa [iyang] mga pagpamatuod, ang kamatuoran nga gipahibalo pinaagi sa pagpakita ngadto kanila ni anghel Moroni. …
… Ang Simbahan ni Jesukristo sa mga Santos sa Ulahing mga Adlaw [usab] nagpadayag sa mahimayaon nga panan-awon ni Propeta Joseph Smith:
“Ug karon, human sa daghan nga mga pagpamatuod nga nahatag kabahin kaniya, kini mao ang pagpamatuod, ang katapusan sa tanan, nga kami naghatag kaniya: Nga siya buhi!” (D&P 76:22). …
Sa pagkonsiderar sa dili makwestyon nga mga pagpamatuod nga gihatag sa karaang mga Apostoles—mga pagpamatuod nga narekord pipila ka mga tuig human sa pagkabanhaw mismo—sa paghunahuna nianang labing katingalahan nga panan-awon sa buhi nga Kristo niining panahona, lisud gayud sabton kon nganong ang mga tawo mosalikway gihapon Kaniya ug magduha-duha sa pagka-imortal sa tawo.
Unsay Atong Gikinahanglan Karon
Ang lig-on nga pagtuo kang Kristo mao ang labing importante nga gikinahanglan sa kalibutan karon. Labaw pa kini kaysa yano lamang nga pagbati. Gahum kini nga makapaaghat sa mga tawo sa paglihok, kinahanglan nga anaa sa kinabuhi sa tawo ang labing sukaranan sa tanang makadasig nga gahum. …
Kon ang tawo “mobuhat lamang sa Iyang kabubut-on,” imbis magsud-ong nga walay paglaum nianang mangitngit ug mangiub nga lubnganan, sila mohangad sa langit ug masayud nga si Kristo nabanhaw! …
Ang Simbahan ni Jesukristo sa mga Santos sa Ulahing mga Adlaw nagpahayag sa tibuok kalibutan nga si Kristo mao ang Anak sa Dios, ang Manunubos sa kalibutan! Walay tinuod nga sumusunod nga matagbaw sa pagdawat Kaniya isip bantugang tigpalambo, sulundon nga mga magtutudlo, o bisan gani hingpit nga tawo lamang. Ang Tawo sa Galilea mao ang—dili lang simbolo, apan tinuod—Anak sa buhi nga Dios. …
Tinuod nga Natawo Pag-usab
Walay tawo nga sinserong maningkamot sa pagsunod sa mga pagtulun-an ni Jesus nga Nazaretnon sa iyang inadlaw nga kinabuhi nga dili makamatikod og kausaban sa iyang tibuok pagkatawo. Ang pulong nga “matawo pag-usab” adunay usa ka lawom nga kahulugan kay sa unsay pagtuo sa daghang mga tawo niini. … Malipayon ang tawo kinsa adunay tinud-anay nga mibati sa makabayaw, makapausab nga gahum nga moabut tungod sa pagkaduol ngadto sa Manluluwas, niining kasuod nga relasyon ngadto sa buhi nga Kristo. Mapasalamaton ko nga nasayud ko nga si Kristo mao ang akong Manunubos. …
Ang mensahe sa Pagkabanhaw … mao ang labing makahupay, ang labing mahimayaon nga gihatag ngadto sa tawo, kay kon ang kamatayon mokuha sa usa ka minahal gikan kanato, ang atong mga nagsubo nga kasingkasing mahupay pinaagi sa paglaum ug balaanong kasiguroan nga gipahayag sa mga pulong: “wala na Siya dinhi; kay siya nabanhaw!” [tan-awa sa Mateo 28:6; Marcos 16:6].
Sa tibuok nakong kalag ako nasayud nga ang kamatayon nabuntog ni Jesukristo, ug tungod kay ang atong Manunubos buhi, busa kita mabuhi.