Mga Ideya sa Family Home Evening
Kini nga isyu naglangkob og mga artikulo ug mga kalihokan nga magamit alang sa family home evening. Ang mosunod mao ang duha ka ideya.
“Nagkinahanglan Ko Nimo Matag Takna,” pahina 30: Sama nga ang mga pulong sa himno “Nagkinahanglan Ko Nimo Matag Takna” nakatabang ni Pak Mi-Jung nga mohukom nga magpabunyag, ang mga himno adunay gamhanang epekto sa atong mga kinabuhi. Paghunahuna og higayon sa dihang ang mga pulong sa usa ka himno nakapanalangin sa inyong kinabuhi ug ikonsiderar ang pagpakigbahin sa kasinatian uban sa inyong pamilya. Dapita ang matag sakop sa pamilya sa pagpili og usa ka paborito nga himno ug isaysay kon sa unsang paagi nga kini nakapanalangin sa iyang kinabuhi. Dayon kantaha ang kada himno uban sa inyong pamilya. (Mahimo ninyong bahin-bahinon kini sa mosunod nga duha ka semana.)
“Mga Pag-ampo ug mga Katedral,” pahina 68: Human ninyo mabasa kini nga istorya, ipakita ang mga hulagway o hisguti ang lain-laing mga simbahan diha sa inyong siyudad ug hisguti kini nga mga pangutana uban sa inyong pamilya: Unsay naa nato nga pareha sa ubang mga relihiyon? Unsay gibati sa Langitnong Amahan sa Iyang tanang mga anak? Unsaon gayud nato sa pagtagad ang mga tawo nga lahi og tinuohan? Hunahunaa ang paggamit sa artikulo nga “Pagbalanse sa Kamatuoran ug Pagkamatugtanon” ni Elder Dallin H. Oaks sa Korum sa Napulog Duha ka mga Apostoles (Liahona, Peb. 2013, 28–35) sa pagtabang sa pagtubag niini nga mga pangutana.