Mga Pag-ampo ug mga Katedral
Ang tagsulat nagpuyo sa Utah, USA.
“Ang tanang tawo makaila nga kamo mga tinun-an ko, kon kamo maghigugmaay sa usag usa” (Juan 13:35).
Mihangad si Dani apan dili gihapon siya makakita sa tumoy sa maanindot nga katedral. Ang mga tawo nga sakop sa laing simbahan moanhi dinhi. Si Dani wala makasabut ngano nga ang iyang pamilya nagbisita niini nga simbahan sa Biyernes, apan si Papa miingon nga moadto sila sa gitawag og Evensong.
“Unsa kana?” nangutana si Dani.
“Usa kini ka miting diin ang mga tawo mokanta, mobasa sa mga kasulatan, ug mag-ampo og dungan,” miingon si Papa. “Sama sa usa ka dako nga pamilya sa paghuman sa adlaw.”
Ganahan si Dani nga naminaw niini. Siya ug ang iyang pamilya nagbisita sa England. Sa miaging Dominggo miadto sila sa usa ka ward nga gitawag og York. Sa Primary ang tanang mga bata nakahibalo sa samang mga kasulatan ug mga kanta nga nahibaloan ni Dani. Nasayud siya nga ang ward nga iyang gibisitahan kabahin sa tinuod nga Simbahan ni Jesus, sama sa iyang ward sa ilang lugar.
Apan kini nga katedral lahi kaayo sa unsay iyang naandan. Nakamatikod siya sa gamay nga lamesa nga dunay mga kandila. Gitan-aw ni Dani ang bata nga midagkot sa kandila.
“Nganong imong gidagkutan ang mga kandila?” nangutana si Dani kaniya.
Mipahiyom ang bata. “Akong dagkutan ang kandila kon ako mag-ampo alang sa espesyal nga butang. Samtang magsiga pa ang kandila, ako manghinaut nga ang pag-ampo padayon nga madunggan sa Dios.”
Sa tan-aw ni Dani ordinaryo ra kini nga mga kandila. Naglibug siya og gamay, apan gusto siyang magmatinahuron. Mipahiyom si Dani sa bata.
Si Dani ug ang iyang pamilya nanglingkod, ug sa wala madugay ang Evensong nagsugod. Iyang nakita ang samang bata pipila ka laray sa unahan. Dayon nasurprisa siya nga wala siyay nahibaloan sa mga kanta nga gikanta sa tanan. Kon sila mag-ampo, magbasa sila gikan sa usa ka gamay nga libro. Ingon og lahi ang tanan kay sa unsay iyang naandan.
Apan nindot ang musika, bisan kon kini dili pamilyar. Dayon dunay tawo nga mitindog nga mobasa sa mga kasulatan. Nagsul-ob siya og kupo, imbis amerikana ug kurbata sama sa bishop ni Dani. Apan sa iyang pagsugod og basa, nakaamgo si Dani nga siya nakahibalo niini nga istorya! Nagbasa siya mahitungod ni Jesus nga nag-ayo sa 10 ka sanglahon.
“Pa,” mihunghong si Dani, “Ganahan ko niini nga istorya.”
Mipahiyom si papa “Ako sab.”
Dayon ang tawo nga nagkupo nag-ampo. Mihangyo siya sa Dios sa pagpanalangin niadtong masakiton ug anaa sa panginahanglan. Sama sa gibuhat ni Dani! Nangayo usab siya og espesyal nga panalangin sa mga lider sa iyang simbahan. Nakahinumdom si Dani nga ang iyang pamilya kanunay nga mohangyo sa Langitnong Amahan sa pagpanalangin ni Presidente Monson ug sa iyang mga magtatambag.
Usa ka mainit nga pagbati ang gibati sa kasingkasing si Dani. Nasayud siya nga ang Langitnong Amahan nagsulti kaniya nga Iyang gihigugma ang tanan Niyang mga anak ug nakadungog sa ilang tanang mga pag-ampo, bisan kon sila moadto sa lahi nga simbahan ug wala ang kahingpitan sa ebanghelyo.
Sa ilang pagbarug aron molakaw na, gisusi ni Papa ang iyang telepono. Naguol siya samtang nagbasa sa iyang mga mensahe. “Si Sister Monson namatay,” miingon siya.
“O dili!” Si Dani nag-ampo dayon diha sa iyang kasingkasing nga OK ra si Presidente Monson.
“Ok ra ka?” dunay nangutana. Ang bata kadto. Nakadungog siya ni Dani, ug ingon og nabalaka siya.
“Si Sister Monson namatay,” miingon si Dani. “Asawa siya sa among propeta, si Presidente Monson.”
“Pasayloa ko,” miingon siya. “Modagkot kog kandila alang niya.”
Mipahiyom si Dani ug mipasalamat kaniya. Naghunahuna siya nga buotan alang sa bata nga mosulti og espesyal nga pag-ampo alang ni Presidente Monson. Nasayud siya nga ang Langitnong Amahan maminaw sa iyang pag-ampo ug sa pag-ampo usab sa batang lalaki.