Ang Iyang Saad sa Kanunay
Robyn Casper, Utah, USA
Mga paghulagway pinaagi ni Bradley H. Clark
Samtang naglingkod ko sa miting sa sakrament nga namalandong sa pag-ampo sa pan, ang mga pulong nagbalik-balik sa akong hunahuna: “nga sila unta sa kanunay makabaton sa iyang Espiritu uban kanila” (Moroni 4:3; D&P 20:77).
“Kanunay,” gisulti niini—dili lang sa piho nga mga oras. Ngano, man, daghang mga bulan sa sayo pa, ang akong bana ug ako wala man maaghat kabahin kon unsaon sa pagpanalipod sa among 11 anyos nga anak sa wala pa siya mamatay sa aksidente sa biseklita ug sakyanan? Ngano nga ang Langitnong Amahan dili “kanunay” magbantay nato ug mopasidaan nato?
Gitudloan ko sa Primary ug mituo nga ang Espiritu Santo manalipod kanato. Siya mogamit sa hinay, hinagawhaw nga tingog sa pagbantay, paggiya, ug pagpasidaan nato gikan sa kakuyaw. Diha kini sa akong hunahuna sukad si Ben namatay. Gimingaw kaayo ko niya, ug gusto gyud ko nga makasabut ug kalinaw.
Hain ang akong tingog sa pagpasidaan? Hain ang Espiritu Santo? Akong gibati nga naningkamot mi nga magmatarung. Mibayad mi sa among ikapulo, mitambong sa among mga miting, ug miserbisyo kon hangyoon mi. Layo pa kami sa pagkahingpit, apan nag-family home evening mi ug nagtuon sa kasulatan. Naningkamot mi.
Niining higayona naglingkod ko sa klase sa Relief Society sa dihang ang magtutudlo miistorya kabahin sa usa ka suod nga paryente. Samtang naghulat sa stoplight, ang paryente mibati og klaro nga impresyon nga magpabilin diha inig usab sa suga ngadto sa green. Naminaw siya sa aghat, ug hapit diha-diha dayon usa ka dakong trak kusog kaayong nagdagan sa interseksyon, milahos sa pula nga suga. Kon wala pa siya maminaw ug mosunod niana nga tingog, siya ug ang iyang mga anak tingali nangaangol ug gani nangamatay.
Kini nga istorya dunay dakong epekto nako, apan samtang naglingkod ko nga naghilak nangandam nga mobarug ug mogawas sa kwarto, mibati ko og dakong kahupayan. Mibati ko og kalinaw nga ang Espiritu Santo nag-uban gyud nako. Sa akoa lang Siya wala diha isip tingog sa pagpasidaan apan isip usa ka maghuhupay.
Gikan sa panahon sa pagkaaksidente ni Ben, gibati nako ang kalig-on lapas sa akong kaugalingong kalig-on ug gihupay sa gugma sa akong Langitnong Amahan. Dihay mga higayon nga nagkulang ang akong pagsabut nganong nahitabo ang maong mga butang, apan wala gayud ko magduha-duha sa Iyang gugma.
Duna koy pagtuo nga ang Dios nakasabut sa tanang mga butang ug dili gayud mobiya nako nga dili mahupay. Ang Espiritu Santo adunay importanting mga tahas sa atong mga kinabuhi. Makapanalipod Siya nato, apan makagiya usab Siya nato, makahupay nato, makatudlo nato, ug makahatag og pagsabut ug sa ubang mga panalangin.
Nakat-unan nako nga ang Langitnong Amahan motuman sa Iyang mga saad. Siya diha “kanunay” uban nako.