Dili Sala nga Mahimong Huyang
Ang tagsulat nagpuyo sa Utah, USA.
Ang mga limitasyon ug mga kakulangan dili mga sala ug dili makapugong nato nga mahimong limpyo ug takus sa Espiritu.
“Takus ba gayud ako nga mosulod sa balay sa Dios? Unsaon nako pagkahimong takus kon dili ko hingpit?”
“Ang Dios makahimo ba nga ang akong kahuyang mahimong kalig-on? Nagpuasa ug nag-ampo ko sa daghang mga adlaw nga makuha kini nga problema gikan nako, apan ingon og walay kausaban.”
“Sa misyon nagsunod ko sa ebanghelyo kanunay kay sa laing panahon sa akong kinabuhi, apan mas nakaamgo ko sa akong mga kasaypanan. Ngano, kon ako magtinarung og maayo, usahay mobati ko og dili maayo?”
Sa atong pagpamalandong sa maong mga pangutana, importante nga masabtan nga samtang ang sala dili malikayan nga makapalayo nato sa Dios, ang kahuyang, dili damhon, makagiya nato ngadto Kaniya.
Gilitratohan sa iStock/Thinkstock
Pag-ila tali sa Sala ug Kahuyang
Sagad kitang maghunahuna sa sala ug kahuyang nga lain-laing matang sa depekto sa atong mga kalag, lain-laing kagrabe sa kalapasan. Apan ang mga kasulatan nagpasabut nga ang sala ug kahuyang lahi ra kaayo, nagkinahanglan og lain-laing mga pagtambal, ug dunay potensyal nga makamugna og lain-laing mga resulta.
Kadaghanan nato mas pamilyar sa sala kay sa gusto natong angkunon, apan atong ribyuhon: Ang sala mao ang pagpili sa pagsupak sa mga sugo sa Dios o pagsukol batok sa Kahayag ni Kristo nga ania nato. Ang sala mao ang usa ka pagpili sa pagsalig ni Satanas kay sa Dios, nagbutang kanato nga masilag sa atong Amahan. Dili sama nato, si Jesukristo hingpit nga walay sala ug makatubos sa atong mga sala. Kon kita sinserong maghinulsol—lakip sa pag-usab sa atong hunahuna, kasingkasing, ug kinaiya; nagtanyag og angay nga mga pagbasol o mga pagkumpisal; maghimo og mga pagpahiuli kon mahimo; ug dili na usbon ang sala sa umaabut—atong magamit ang Pag-ula ni Jesukristo, mapasaylo sa Dios, ug malimpyo pag-usab.
Ang pagkalimpyo importante tungod kay walay mahugaw nga butang ang pagadawaton atubangan sa Dios. Apan kon ang atong tumong mao lamang nga mahimong inosente sama sa dihang mibiya kita sa presensya sa Dios, mas maayo pang nagpabilin kitang naghigda nga komportable sa atong mga kuna sa tibuok natong mga kinabuhi. Hinoon, mianhi kita sa kalibutan aron makat-on pinaagi sa kasinatian sa pag-ila sa maayo gikan sa dautan, motubo sa kaalam ug kahanas, magpuyo sa mga hiyas nga atong giampingan, ug moangkon sa mga personalidad sa pagkadiosnon—kauswagan nga dili nato mahimo gikan sa luwas nga mga limitasyon sa kuna.
Ang kahuyang sa tawo dunay importante kaayo nga papel niining mahinungdanong katuyoan sa pagka-mortal. Sa dihang si Moroni nabalaka nga ang iyang kahuyang sa pagsulat maoy makaingon nga bugal-bugalan sa mga Hentil ang sagrado nga mga butang, ang Ginoo mihatag niya’g kasiguroan niini nga mga pulong:
“Ug kon ang tawo moduol ngari kanako Ako mopakita ngadto kanila sa ilang kahuyang. Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan; kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:27; tan-awa usab sa 1 Mga Taga-Corinto 15:42–44; 2 Mga Taga-Corinto 12:7–10; 2 Nephi 3:21; ug Jacob 4:7).
Ang mga implikasyon niining pamilyar nga kasulatan tulukibon ug nagdapit nato sa pag-ila sa sala (giawhag ni Satanas) gikan sa kahuyang (gihulagway dinhi isip kondisyon nga “gihatag” ngari nato sa Dios).
Mahimong atong ihulagway ang kahuyang isip limitasyon sa atong kaalam, gahum, ug kabalaan nga moabut isip usa ka tawo. Isip mga mortal natawo kita nga walay mahimo ug nagsalig, uban sa lain-laing pisikal nga kasaypanan ug natural nga mga kalagmitan. Nagdako ug gilibutan kita sa ubang huyang nga mga mortal, ug ang ilang mga pagtulun-an, mga ehemplo, ug pagtagad nato masalaypon ug usahay makadaot. Sa atong huyang, mortal nga kahimtang mag-antus kita sa pisikal ug emosyonal nga mga sakit, kagutom, ug kakapoy. Makasinati kita og tawhanong emosyon sama sa kasuko, kasubo, ug kahadlok. Kulang kita og kaalam, kahanas, abilidad sa paglahutay, ug kalig-on. Ug ubos kita sa mga tintasyon sa daghang mga matang.
Bisan og Siya walay sala, si Jesukristo hingpit nga miapil nato sa kahimtang sa mortal nga kahuyang (tan-awa sa 2 Mga Taga-Corinto 13:4). Natawo siya nga bata nga walay mahimo sa usa ka mortal nga lawas ug gipadako sa dili hingpit nga mga magbalantay. Kinahanglan siyang makat-on sa paglakaw, pag-istorya, pagtrabaho, ug pakigsabut-sabut sa uban. Gutumon ug kapuyon Siya, mobati og emosyon sa tawo, ug masakit, mag-antus, magdugo, ug mamatay. Siya “nga sa tanang paagi gitintal ingon kanato, hinoon wala makasala,” mitugyan sa Iyang kaugalingon ngadto sa pagka-mortal aron Siya “mobati sa pagkaluoy kanato sa atong mga kaluyahon” ug motabang nato sa atong mga kahuyang (Mga Hebreohanon 4:15; tan-awa usab sa Alma 7:11–12).
Dili kita makahinulsol tungod sa pagkahuyang—ni ang kahuyang mismo makahimo nato nga dili limpyo. Dili kita motubo sa espirituhanong paagi gawas kon kita mosalikway sa sala, apan dili usab kita motubo sa espirituhanong paagi gawas kon kita modawat sa atong kahimtang sa tawhanong kahuyang, motubag niini uban ang pagkamapainubsanon ug hugot nga pagtuo, ug makat-on pinaagi sa atong kahuyang sa pagsalig sa Dios. Sa dihang si Moroni nabalaka sa kahuyang sa iyang pagsulat, ang Dios wala mosulti niya sa paghinulsol. Hinoon, ang Ginoo mitudlo niya nga magmapainubsanon ug magbaton og hugot nga pagtuo ni Kristo. Kon kita maaghup ug matinud-anon, ang Dios nagtanyag og grasya—dili kapasayloan—isip solusyon alang sa kahuyang. Ang Bible Dictionary mipasabut nga ang grasya usa ka makapahimo nga gahum gikan sa Dios sa pagbuhat unsay dili nato mabuhat sa atong kaugalingon (tan-awa sa Bible Dictionary, “Grace”)—ang angay nga diosnong solusyon diin Siya “mohimo sa mahuyang nga mga butang nga mahimo nga malig-on ngadto kanila.”
Pagpakita og Pagkamapainubsanon ug Hugot nga Pagtuo
Sa sayo pa sa atong kasinatian sa Simbahan, gitudloan kita sa importante nga mga elemento sa paghinulsol, apan unsaon gayud nato sa pagpalambo og pagkamapainubsanon ug hugot nga pagtuo? Hunahunaa ang mosunod:
-
Pamalandong ug pag-ampo. Tungod kay kita huyang, tingali dili ta makabantay nga kita nakahimo na og sala (nagtawag sa diha-diha ug lawom nga kausaban sa hunahuna, kasingkasing, ug kinaiya) o uban sa kahuyang (nagtawag sa mapainubsanon, padayon nga paningkamot, pagkat-on, ug kalamboan). Giunsa nato pagtan-aw kining mga butanga magdepende giunsa kita pagpadako ug sa atong kahingkod. Tingali dunay elemento sa sala ug kahuyang sa usa ka kinaiya. Ang pagsulti nga ang usa ka sala usa ka kahuyang mosangpot sa pagpangatarungan imbis maghinulsol. Ang pagsulti nga ang usa ka kahuyang usa ka sala moresulta sa kaulaw, pagbasol, kaalaot, ug dili na mosalig sa mga saad sa Dios. Ang pagpamalandong ug pag-ampo makatabang nato sa paghimo niini nga mga kalainan.
-
Prayoridad. Tungod kay kita huyang, dili kita makahimo sa matag gikinahanglan nga kausaban diha-diha dayon. Samtang magmapainubsanon ug magmatinud-anon kita sa pagbuntog sa atong tawhanong kahuyang pipila ka aspeto kada higayon, hinay-hinay natong makunhuran ang pagkaignorante, makahimo og maayong mga sumbanan nga maandan, madugangan ang atong pisikal ug emosyonal nga kahimsog ug kalagsik, ug maglig-on sa atong pagsalig sa Ginoo. Ang Dios makatabang nato nga makahibalo asa magsugod.
-
Plano. Tungod kay kita huyang, ang pagpalig-on magkinahanglan og dugang nga matarung nga tinguha ug dakong pagdisiplina sa kaugalingon. Magkinahanglan usab kita og plano, magkat-on gikan sa atong mga sayop, magpalambo og mas epektibo nga mga estratehiya, mag-usab sa atong mga plano, ug mosulay pag-usab. Magkinahanglan kita og tabang gikan sa mga kasulatan, importante nga mga libro, ug ubang mga tawo. Magsugod kita sa ginagmay, maglipay sa kalamboan, ug morisgo (bisan og mobati kita nga risgo ug huyang). Nagkinahanglan kita og suporta sa pagtabang nato sa paghimo og maayo nga mga pagpili bisan og kita gikapoy o nawad-an sa paglaum ug mga plano sa pag-usab kon kita masayop.
-
Pagbaton og pailub. Tungod kay kita huyang, ang kausaban tingali magkinahanglan og panahon. Dili lang dayon nato masalikway ang atong kahuyang sama sa atong pagsalikway sa sala. Ang mapainubsanon nga mga disipulo andam mobuhat sa unsay gikinahanglan, magkat-on nga dali makabangon, mapaningkamuton, ug dili mohunong. Ang pagkamapainubsanon makatabang nato nga dunay pailub sa atong mga kaugalingon ug sa uban kinsa huyang usab. Ang pailub usa ka timailhan sa atong hugot nga pagtuo sa Ginoo, pasalamat alang sa Iyang pagsalig kanato, ug pagsalig sa Iyang mga saad.
Bisan kon kita sinserong maghinulsol sa atong mga sala, makaangkon og kapasayloan, ug mahimong limpyo pag-usab, magpabilin kitang huyang. Ubos gihapon kita sa sakit, emosyon, pagka-ignorante, natural nga mga kalagmitan, kakapoy, ug tintasyon. Apan ang mga limitasyon ug mga kakulangan dili mga sala ug dili makapugong nato nga mahimong limpyo ug takus sa Espiritu.
Kahuyang ngadto sa Kalig-on
Gilitratohan sa iStock/Thinkstock
Samtang si Satanas gustong mogamit sa atong kahuyang sa pagdani nato sa pagpakasala, ang Dios makagamit sa tawhanong kahuyang sa pagtudlo, paglig-on, ug pagpanalangin nato. Lahi sa unsay atong gipaabut o gilauman, hinoon, ang Dios dili kanunay “mohimo sa huyang nga mga butang nga mahimong lig-on” ngari nato pinaagi sa pagkuha sa atong kahuyang. Sa dihang si Apostol Pablo nagbalik-balik sa pag-ampo nga kuhaon sa Dios ang “tunok dinhi sa lawas” nga gigamit ni Satanas sa pagpasakit kaniya, ang Dios misulti ni Pablo, “Ang akong grasya igo alang kanimo: kay ang akong gahum ginahingpit diha sa kahuyang” (2 Mga Taga-Corinto 12:7, 9).
Dunay daghang mga paagi nga ang Ginoo mohimo sa “mahuyang nga mga butang nga mahimo nga malig-on.” Bisan og Iyang kuhaon ang kahuyang pinaagi sa talagsaong tambal nga atong gilauman, sa akong personal nga kasinatian talagsa ra kini. Pananglitan, wala koy nakita nga ebidensya nga ang Dios mikuha sa kahuyang ni Moroni sa pagsulat human sa inila nga bersikulo sa Ether 12. Mahimong himoon sa Dios ang huyang nga mga butang nga malig-on pinaagi sa pagtabang nato sa pagbuntog sa atong mga kahuyang, makaangkon og angay nga panglantaw mahitungod niini, ug mopalambo niini sa hinay-hinay. Usab, ang mga kalig-on ug mga kahuyang sa kasagaran sumpay ra (sama sa kalig-on sa determinasyon ug kahuyang sa pagkagahig ulo), ug kita makakat-on sa paghatag og bili sa kalig-on ug pagpugong sa kahuyang nga nag-uban niini.
Adunay lain, gani mas gamhanang paagi nga mahimo sa Dios ang huyang nga mga butang nga malig-on ngari nato. Ang Ginoo miingon ngadto ni Moroni sa Ether 12:37, “Tungod kay ikaw nakakita sa imong kahuyang ikaw himoon og malig-on, gani ngadto sa paglingkod sa dapit diin Ako nag-andam diha sa mga mansyon sa akong Amahan.”
Dinhi ang Dios wala motanyag sa pag-usab sa kahuyang ni Moroni, apan sa pag-usab ni Moroni. Pinaagi sa pagpaningkamot sa hagit sa tawhanong kahuyang, si Moroni—ug kita—makat-on og gugma nga putli, kapuangod, kaaghup, pailub, kaisug, taas nga pag-antus, kaalam, kalagsik, pagpasaylo, pagkadali makabangon o resilience, pasalamat, pagkamamugnaon, ug daghan pang laing mga hiyas nga makahimo nato nga mas sama sa Amahan sa Langit. Mao kini ang mga hiyas nga atong palamboon sa pag-anhi sa kalibutan, ang Kristohanong mga kinaiya nga mag-andam nato alang sa mga mansyon sa kalangitan.
Mas makita ang gugma, kaalam, ug matubsanong gahum sa Dios diha sa Iyang abilidad sa paghimo sa atong mga pakigbisog sa tawhanong kahuyang ngadto sa bililhong diosnong mga hiyas ug mga kalig-on nga makapahimo nato nga mas sama Kaniya.