Taro kei na Kena iSau
“Au na vakamacalataka vakacava vua na noqu itokani na vuna e sega ni vakasama vinaka kina na voroki ni lawa ni tiko savasava?”
E vinakata na Tamada Vakalomalagi meda bula marau ka rawata na Nona Yalotabu, ka sa solia vei keda o Koya na ivakaro me vukei keda ena maroroi ni noda vakanananu, ivosavosa, kei na veika e qaravi ena loma ni yalava e rakorako.Na lawa ni tiko savasava e vukea na kena maroroi na kaukauwa ni vakatubukawa ena lomanibai ni vakamau.E dua na vuna e vakarota kina o Koya me vakamatatataki kina na kaukauwa ni vakatubukawa ki vua na turaga vakawati kei na watina sa baleta ni “sa kena ivakarau mera cadra mai vuravura na luveda ena loma ni nodrau vuvale na itubutubu erau sa vakamau.”1
E rawa ni o wasea e dua na ilavelave ni Me iSakisaki ni iTabagone vua na nomu itokani. E vakatakila e vica na inaki me baleta na vuna e vinaka kina ni maroroi na lawa ni tiko savasava: “Ni o sa tiko savasava o sa vakarautaka tiko mo laki cakava ka maroroya na veiyalayalati ena valetabu.Ko sa vakarautaki iko mo tara cake e dua na bula vakawati kaukauwa ka me vakatubura mai na gonelalai ki vuravura me tiki ni dua na matavuvale tawamudu ka lomani. Ko taqomaki iko mai na veivakacacani vakayalo kei na vakasama e yaco mai ena wasei ni veiyacovi e taudaku ni vakamau. Ko sa taqomaki iko vakakina mai na veimate vakatubuleqa. Na kena rawati tiko na tawacala ni veiyacovi ena vukei iko mo nuidei ka marautaka vakaidina ka na vakavinakataka cake na nomu sasaga mo vakatulewa vinaka kina ena gauna oqo kei na gauna mai muri.2
Na Valetabu
Na Tamada Vakalomalagi e taukena tu na inaki vakalou me baleti keda kece, ka na rawa ni vakavotukanataki na inaki oya ena valetabu. Sa dodonu meda bula kilikili ni da curuma na valetabu me rawa ni vauci tawamudu kina na noda matavuvale.Eda na bula vata tale na Tamada Vakalomalagi, ka vakabibi eda na taukena e dua na reki e tawayalani, ka na sega ni rawata na tawakilikili.
Alofa M., yabaki 18, Samoa
Vakamau kei na Matavuvale
Eda sa vakayaloqaqataki meda tawacala ena veiyacovi me rawa ni da bula kilikili kina ni curuma na valetabu ka maroroya na veiyalayalati tabu. Kevaka eda vakamuria na lawa ni tiko savasava, eda na taracake e dua na vakawati kei na matavuvale kaukauwa ena gauna mai muri. O Setani ena tu ga me temaki keda, ia mai na masumasu, ivolanikalou, kei na itokani vinaka, eda na rawa ni vorata kina.
Resty M., yabaki 16, Filipaini
Revurevu Veicalati
E tu e levu na revurevu ca ni kena voroki na lawa ni tiko savasava, ka sega ni o vulica me baleti ira kece ena kalasi ni veika ni bula. Na voroki ni lawa ni tiko savasava e rawa ni vakasavatani na Yalotabu mai na nomu bula, vakamavoataki ira e voleka vei iko, ka vakavuna mo dau rarawataki iko tu ga. Au vakatura me saravi e dua na vidio mai na Mormon Messages ka vakatokai na “Chastity: What are the Limits?” [ena youth.lds.org vaka Valagi, Potukali, kei Sipeni].
Matthew T., yabaki 17, Utah, Amerika
Bula Savasava kei na Vakarokoroko
Ni vakamuri na lawa ni tiko savasava, eda na savasava tikoga ena mata ni Kalou, eda na rokovi keda, ka da vukei ira tale eso mera rokovi keda talega. Kevaka eda vakamuria na lawa ni tiko savasava, eda vakaraitaka ni da sa luve ni Kalou ka da taura matua na ivakarau cecere. Eda na levea na veivakacacani. Ni da talairawarawa vua na Tamada Vakalomalagi, vakabibi me baleta na lawa oqo, eda na bula marau cake eke ka vakakina ena vuravura se bera mai.
Alyana G., yabaki 19, Filipaini
E dua na iSolisoli Tabu
Kevaka e tauri tu ga vakamamada na isolisoli ni vakatubukawa, ena vakawaleni na isolisoli vakamareqeti oqo mai vua na Kalou. Na soli ni dua na iloloma ena sega ni vakilai me dua na ivakaraitaki ni vakavinavinaka kevaka e nanuma o koya o solia vua ni na sega ni vakamareqeta.Sa dodonu meda okata na vakatubukawa me ka tabu; ka ni da sa valetabu kece ni Kalou ka sa dodonu me na kilikili tikoga ka savasava me vaka e dua na valetabu.
Jaron Z., yabaki 15, Idaho, Amerika
Na Yalotabu Vata kei Keda
Ni ko tiko savasava mai na ivalavala ca, o na marau vakalevu cake ka na vakalougatataki. Na yagoda e sa vaka na valetabu, kei Tamada Vakalomalagi ena “sa sega ni dautiko ena vale dukadukali” (Alama 7:21). Ia ni da tiko savasava mai na ivalavala ca, ena vakatawani keda na Yalotabu.
Maryann P., yabaki 14, Arkansas, Amerika
Veitaro Bibi
Sauma na vakatataro i nomu itokani ena nomu taroga eso na taro: “Vakacava ke a sa vakaraici iko tiko mai oqo okoya me na watimu?” O ira kece au sa rogoca ni ra voroka na lawa ni tiko savasava era sa veivutunitaka. “Vakacava ke a qai tarogi iko na luvemu mai muri kevaka o a voroka na lawa ni tiko savasava?” Sa dodonu mera vulica ena gauna oqo na nomu itokani na bibi ni lawa ni tiko savasava, ni bera ni qai taroga na taro oqori e dua na luveda tagane se yalewa. Sa dodonu mo vakasavasavataki iko ka tawacala mo liutaka kina e dua na bula marau ka bulabula e sega ni vakacalai mai na voroki ni lawa tabu.
Robyn K., yabaki 13, Utah, Amerika
iValavala Dodonu kei na Tiko Savasava
E taleitaka na Turaga na ivalavala dodonu kei na tiko savasava, ka me na vakayacori na ka kecega ena kena gauna dodonu.Na lawa ni tiko savasava e sa ivakaro mai vua na Turaga. Na masu kei na veitomani ni Yalotabu erau sa veiwekani vinaka sara ena kilai ni veivakalougatataki ni tiko savasava.
Selene R., yabaki 18, Nicaragua
Ena Loma ni Vakamau
Au na vakamacalataka vua na noqu itokani ni voroki ni lawa ni tiko savasava e dua dina na vakasama ca baleta na kaukauwa ni vakatubukawa e caka duadua ga me baleti ira era vakamau vakalawa. Ni da voroka na lawa ni tiko savasava, ena yali mai na noda bula na Yalo Tabu.
Augustina A., yabaki 15, Ghana