Juon men Eaar Jorrāān ippān Baļuun eo Waō
Craig Willie, Utah, USA
Juon jota ke iaar kattōre baļuun eo waō eobrak kōn paijinjea ro ilo jikin jok im kālo̧k eo, ar wōr aō en̄jake bwe eaar wōr jorrāān ippān kōjabwebwe eo an baļuun eo. N̄an kapen im̧we in jetōb eo ilo n̄a, iaar kōjer baļuun eo im kōm̧m̧ane jet ero̧lol ko 360 degree. Ejjeļo̧k men en ar jorrāān.
Iaar ļōm̧nak, “Ij aikuj kelo̧k im bōk ļo̧k bajinjea ro n̄an ijo rej jibadōkļo̧k ilo iien eo ejejjet, ak ij aikuj ke bar ro̧o̧l n̄an jikin iuwe eo?” Iaar jeļā bwe jepļaak enaaj kōm̧m̧ane juon rūm̧wij eaitok. Baļuun ko rej kōtļo̧k wōt n̄an ilo̧k ilo juon wōt iaļ ioon pij eo; iaar aikuj in kōttar jikin kajokjok eo ioon bwidej n̄an kōm̧m̧ane jikin aō ilo̧k ņae baļuun ko rej itok. Innām kōm kar aikuj kōttar an kumi in kōm̧adm̧ōd eo etale baļuun eo. Rum̧wijļo̧k eo emaron̄ kōm̧m̧an jorrāān ko n̄an baļuun eo im n̄an bajinjea ro me eaar wōr armej ro rej aikuj ioon er im ro rej bōk baļuun ko jet. Iaar barāinwōt ļōmņak ekōjkan an kumi in kōm̧admōd eo naaj ļōmņak kōn ripoot eo aō bwe baļuun eo ewōr juon an jorrāān n̄e ejjeļo̧k aō kein kam̧ool ijjelo̧kin kōn juon en̄jake eļap.
Āinwōt kapen in baļuun eo, aō ekar eddo kōn kōjparok eo am̧, kōn menin iaar kālet n̄an ļoor im̧we eo aō im jepļaak.
Ke kōm ar itaakļo̧k ilo jikin iuwe eo, iaar jiron̄ rikōm̧m̧an baļuun eo bwe iaar en̄jake juon men eaar jab jejjet ippān baļuun eo bōtaab iaar jab jeļā ta kar jorrāān eo. Eaar jab tōmak ke ewōr juon jorrāān.
“Eaar ba, bōlen kōn an kar tutu jikin kelo̧k eo. Komaron̄ in kar jikāāt ioon pij eo.” Eaar errā, mekarta, n̄an lale kein kōjbwebwe eo ilo ne eo im̧aan. Ālkin etale, eaar kajjitōk ippa n̄an ekituwe bajinjea ro bwe en maron̄ bōk baļuun eo n̄an kōmālmel.
Ke eaar jepļaaktok 30 minit ko tokālik, eaar kanooj in n̄ūrbōktak. Ilo iien kōmālmel eo, eaar ron̄ juon ainikien ejjeļo̧k jem̧ļo̧kin. Ke eaar kōjerbal būreek ko ke eaar ro̧o̧l n̄an bar jikin iuwe eo, eaar pen an kōjbwebweik baļuun eo im m̧ōttan kar jidik jejļo̧k jān jikin kelo̧k eo.
Juon jerbal in etale eo eaar kwaļo̧k bwe būreek ko rekar jab jejjet kōm̧adm̧ōdi joten eo m̧oktaļo̧k. N̄e in kar kajok baļuun eo ālkin kelo̧k eo am, būreek ko renaaj kar likjab im iban kar kōjbwebweik baļuun eo.
Iaar bar bōk juon baļuun n̄an keļo̧k kake, Im iaar bōkļo̧k bajinjea ro aō ilo inem̧m̧an n̄an jikin eo rej jibadōkļo̧k jilu awa tokālik.
Ij m̧ōņōņō bwe iaar ron̄jake uņoojdikdik an Jetōb. Ijeļā bwe Jetōb eo enaaj tōl kōj eļan̄n̄e jej pukōt tōl an Irooj im ron̄jake im̧we ko rej itok.