Jon̄oul Wāween ko n̄an Jeļā Bwe Em̧ōj Am̧ Oktak

Jen Tyler Orton

Tyler Orton ej jokwe ilo Java, Indonesia.

Pija

Iaar katak ilo kweilo̧k eo an priesthood bwe juon iaan jibadbad ko an Priesthood eo an Aron ej n̄an jipan̄ kōj “erom rioktak n̄an ko̧jpeļ eo an Jisōs Kraist im mour kōn katak ko an.”¹ Iaar jab jeļā kōn ta meļeļe in n̄an “erom rioktak n̄an ko̧jpeļ eo an Jisōs Kraist.” Iaar kajjitōk ippān ro jinō im jema im ro jeiū rōrūtto ta meļeļe eo aer, im ippān doon kōm kar kōnono elōn̄ wāween ko kom̧ maron̄ lo eļan̄n̄e kwoj oktak.

Ewōr bōlen bar jet, bōtaab ijin 10 wāween ko me kōm maron̄ walōn̄tak kaki. Kōn an oktak ej juon jekjek an toon wōt ad mour, jej aikuj in weppān ilo kajjojo iaan eria ko kiiō, bōtaab remaron̄ jipan̄ kōj jeļā eļan̄n̄e jej eddōkļo̧k.

N̄e kwoj oktak, kwojjab wōt jeļā ta eo kwoj aikuj kōm̧m̧ane ak kwoj barāinwōt ikdelel n̄an kōm̧m̧ani men ko rejim̧we. Ejjab bwe n̄an baj joļo̧k jerbal nana kōnke kwoj mijak n̄e kopo ak kaje. N̄e m̧ool in oktak, kwon kōņaan lukkuun kālet jim̧we eo.
Bar juon kōkaļļe an oktak ej bwe ejjeļo̧k am̧ n̄an jidik ikdelel n̄an kōm̧m̧an bōd. Anta-Nipai-Liai ro rej juon waanjon̄ak em̧m̧an kōn menin. Ke raar oktak n̄an ko̧jpeļ eo an Kraist, raar “deļo̧n̄ ilo juon bujen ippān Anij n̄an jerbal n̄an e im kōjparok kein ko An” (Mosaia 21:31). Āinwōt riNipai ro kar katakin er jen Kiin̄ Benjamin, raar “jab bar itok wōt in kōm̧m̧an nana” (Mosaia 5:2). Raar m̧ool in oktak n̄an ko̧jpeļ eo an Kraist, im kapo ko an Satan eaar ejjeļo̧k kajoor ioer.

Pija

N̄an kwaļo̧k bwe kwonaaj m̧ool n̄an bujen ko aer n̄an mour kōn ko̧jpeļ eo, riLaman ro raar oktak raar kalbwin kein tariņae ko aer (lale Alma 24).
N̄e kwoj oktak, eļapļo̧k am̧ n̄ūrbōktak kōn ta Anij ej ļōmņak kake jān ta eo ro jet rej ļōmņak kōn kwe. Ilo jikuuļ eo aō ilo Indonesia, rijikuuļ ro rej ļōmņak wōt in buuļ kadōk. Jet iien emaron̄ kapo n̄an etal in bade n̄e aolep rej kōm̧m̧ane im kōm̧m̧an kōjak kōn kwe kōn am̧ jab etal. Ļaddik eo kar kūr ļo̧k n̄an karōk im bade elōn̄ kōttan, bōtaab ejjan̄in kar kōm̧m̧ane—eaar jutak ņae ta eo eaar tōmak. Eaar pen, im eaar joļo̧k elōn̄ bon̄ōn ko make iaan ilo m̧we im̧ōn. Ke rijikuuļ ro raar iak-iakwe doon ilo kadiwōjļo̧k eo aer ilo iien kadiwōjļo̧k eo an, jet armej raar kwaļo̧k n̄an e ewi jon̄an aer kar bwilōn̄ bwe eaar maron̄ jum̧ae kareel eo an ro m̧ōttan im m̧ool n̄an jon̄ak ko an. Raar jiron̄ e ewi jon̄an aer reilo̧k n̄an e kōn menin. Eaar kwaļo̧k eaar oktak kōn jum̧ae kapo an ro m̧ōttan.
N̄e oktak, kwoj kajieon̄ kōm̧m̧ane ijo em̧m̧an tata n̄an mour kōn ko̧jpeļ eo iien otemjeļo̧k—ejjab wōt ilo Jabōt ko ak n̄e em̧m̧an am̧ mour bōtaab iien otemjej. M̧akūtkūt ko am̧ ren jab oktak pedped wōt ioon wōn eo kwoj pād ippān ak wōn eo emaron̄ in lale eok. N̄e ro m̧ōttam̧ rej ba juon kōjak elej ak kōņaan alooje juon pija ettoon, kwojjab etal ippāer ļo̧k kōnke ejjeļo̧k juon ej lale eok; ijello̧kin kwoj jutak kōn ta eo kwoj tōmak.
Pija

N̄e kwoj oktak, eļapļo̧k am̧ jouj im tenkwadik ilo jouj ippān ro jet. Kwojjab ekajet ak kōrraat ak ruruwe. Eļapļo̧k am̧ ļōmņak kōn en̄jake ko an ro jet, im ekkā am̧ pukōt wāween ko n̄an jerbal im jipan̄. Eļan̄n̄e kwoj etal ilo jikin etetal ilo jikuuļ eo am̧ im juon ej wōtlo̧k bok ko an, kwojjab aikuj ļōmņak kōn ta eo n̄an kōm̧m̧ane. Kwoj kajju bōjrak n̄an jipan̄.
Pija

N̄e kwoj oktak, kwoj ikdelel n̄an kōļapļo̧k am̧ jar im kwoj en̄jake āinwōt kwoj lukkuun in kōnono ippān Anij n̄e kwoj jar. Kwonaaj iien otemjej kōm̧m̧an iien n̄an jar jekdo̧o̧ņ ekōjkan am̧ en̄jake ak ta eo ej waļo̧k ilo mour eo am̧. Būreejtōn Ezra Taft Benson (1899–1994) eaar jiron̄ kōj, “Eļan̄n̄e jejjab en̄jake kōņaan jar, innām jej aikuj jar m̧ae iien jej en̄jake jej kōņaan jar.”²
N̄e kwoj erom rioktak, kwoj reimaanļo̧k n̄an Jabōt kōnke ej raan in Jabōt. N̄e Jabōt ej itok, ijello̧kin ļōmņak, “O jaab, ej juon raan me ijjab maron̄ iaio ippān ro m̧ōtta ak etal n̄an alooj pija ko,” kwoj ļōmņak, “Em̧m̧an, juon raan me imaron̄ etal n̄an jar im kalimjōk men ko an jetōb im joļo̧k iien ippān baam̧le eo aō!”

Pija
N̄e oktak, kwoj kōjparok kien im kwojjab kappok jekpen ņae ko, kabun̄ būruwōn m̧wil nana, ak kajieon̄ pukōt un ko n̄an rupe kien ko. Kwojab kajieon̄ etal eļapļo̧k jān jon̄an eo; kwoj kōjparok kien ko kōnke kwojeļā ej wāween eo em̧m̧anļo̧k in.
Pija

N̄e oktak, kwoj reim̧aanļo̧k n̄an kōļļā juon m̧ōttan jon̄oul eo am̧. Kwoj loe ainwōt juon iien em̧man im en̄jake bwe 10 bōjāān ejjab kanooj ļap, eļaptata keidi ippān kōjeram̧m̧an ko im ju bōro ko kwoj bōke. Kōjeram̧m̧an kein raorōk ļo̧k jān jāān eo kwoj kōļļāiki.
Pija

N̄e kwoj erom rioktak, ewōr juon am̧ ikirelel ekajoor n̄an jipan̄ ro jet jeļā m̧ool eo im m̧ōņōņō eo me em̧ōj am kar loe. Juon waanjon̄ak em̧m̧an ej itok jān jeje ko rekwojarjar ej ettōņak eo an Liai, eo eaar wōr juon an ikirelel ekajoor n̄an kwaļo̧k leen eo ekaijoļjoļ an wōjke in mour eo ippān baam̧le eo an. Ke eaar bōk leen wōjke eo, eaar m̧oktata ļōmņak eaar jab n̄an bōk eļapļo̧k n̄an e make ak n̄an reilo̧k n̄an pukōt baam̧le eo an bwe ren maron̄ barāinwōt bōk leen wōjke eo im bōk ejja m̧ōņōņō in wōt (lale 1 Nipai 8:12).

Ilo tukadu in, kwojeļā kwoj erom rioktak n̄e kwoj jino mour kōn kakien eo eutiejļo̧k, ko̧jpeļ eo an Jisōs Kraist. Kwoj mour kōn jetōb eo an kakien eo barāinwōt leta eo an kakien eo. Kwoj mour kōn ko̧jpeļ eo ilo aolep jekjek ko an mour eo am̧. Kwoj mour kōn ko̧jpeļ eo n̄an tarlep eo an, ejjab kōnke kwoj aikuj ak kōnke kwoj kōņaan. Eļapļo̧k am̧ m̧ōņōņō im armej em̧m̧anļo̧k, im kwoj kōņaan erom armej eo Jemedwōj Ilan̄ ekōņaan bwe kwon erom. Kwoj kōņaan erom ļo̧k āinwōt Jisōs Kraist im ļoor waanjon̄ak eo An. N̄e kwoj erom armej jab in, kwoj m̧ool in oktak.

Itulōn̄: Kōmeļeļe in pija © IRI; coins © isStockphoto.com/Thinkstock; Visiōn an Liai kōn Wōjke in Mour jen Robin Luch © IRI