E Dua na Ka a Ca Tiko ena Noqu Waqavuka
Craig Willie, Utah, Amerika
E dua na yakavi niu sa cicivaka tiko yani ena kena gaunisala na noqu waqavuka sinai tu ena pasidia, au vakila ni dua na ka e ca tiko ena gacagaca ni iuli ni waqavuka oqo. Me vakadeitaki ga kina na veivakauqeti vakayalo oqo, au a vagolea laivi kina mai na kena gaunisala ka saumaki lesu me vica na 360 na diqiri. E vaka e sega ni dua na ka e ca.
Au a vakasamataka, “Meu sa na vuka ga yani ka kauti ira na pasidia ki na nodra ikelekele ena kena gauna, se meu lesu ki na matamata?” Au kila ni lesu ena balavu sara na gauna ni wawa. Na gaunisala ni waqavuka e sala dua ga; meu na waraki iratou tale na veivakadonui e ra me qai soli mai na galala meu vuka baleta yani na osooso ni gaunisala. Keimami sa na qai waraki iratou na ilawalawa ni idinia me laurai na waqavuka. Na wawa oqo ena rawa ni vakataotaka na kabani ni waqavuka kei ira na pasidia mera sotavi ira eso ka caka bisinisi vata kei ira. Au sa vakasamataka talega na ka ena cakava na tabana ni idinia ki na noqu ripote ni a ca na waqavuka ka sega na noqu ivakadinadina vakavo ga niu a vakila vakaukauwa e yaloqu.
Me vaka niu kavetani ni waqavuka, sa noqu itavi meu taqomaki keimami, au sa qai vakarorogo ga ki na noqu vakasama ka lesu.
Ni keimami sa yaco yani ki na matamata, au sa tukuna sara vei mekeniki niu vakila e dua na ka e ca tiko ena waqavuka ia au sega ni kila se leqa cava. A sega ni vakabauta o koya ni tiko e dua na leqa.
“E rairai ni suasua beka ga na gaunisala,” a kaya. “E rairai o a sisi beka ena ku-lu-ta.” Ia, a vakadonuya ga, me raica mada na qia ni iuli ni taya e liu. Ni sa dikeva oti, a kerei au meu vakasoburi ira na pasidia me rawa ni vuka vakatovotovotaka mada na waqavuka.
Ni lesu mai ni oti e 30 na miniti, sa lomaleqa sara vakalevu. Ena vuka vakatovotovo o ya, a rogoca kina e dua na irorogo veiqaqi cacavukavuka. Ni sa butuka na bereki ena gauna sa wavoki mai kina me lesu ki na matamata, sa sega ni muataka rawa na waqavuka ka voleka sara me vakacoqa e bati ni gaunisala.
E laurai ni sa vakadikevi vakavinaka ni rau a sega tu ni laurai vakavinaka na bereki ena yakavi sa oti. Kevaka beka meu na laki ro niu sa vuka yani, ena sega ni cakacaka rawa na bereki, kau na rawa ni vakacoqa na waqavuka.
Au a taura e dua tale na waqavuka meu pailatetaka, kau a laki vakasoburi ira vakavinaka na noqu pasidia ki na nodra ikelekele ni oti e tolu na auwa.
Au marau niu a vakarorogo ki na vosa malua ni Yalotabu. Au kila ni na dusimaki keda na Yalotabu kevaka eda na vakasaqara na veidusimaki ni Turaga ka vakarorogo ki na veivakauqeti e dau yaco mai.