O Le a Lenei Ekalesia?
Angela Fallentine, Niu Sila
I nai tausaga talu ai, na manaomia ai le pasia o la’u taavale mo tulaga faatulagaina o le saogalemu ma le kasa oona. Na ou taunuu i le faletaavale i se tasi aoauli, ma maua ai pe tusa o le valu pe iva taavale sa tutu i le laina.
O se aso o le tautotogo matagofie, o le mea lea na ou filifili ai e tuu i lalo faamalama, tape le afi o le taavale, ma se’i a’e se kopi o le “O Le Aiga: O se Folafolaga i le Lalolagi,” lea na ou teuina ma isi tusi a le Ekalesia i totonu o la’u taavale. Na fautuaina talu ai nei e lo’u peresitene o le siteki tagata o le siteki, ina ia tuuto atu i le taulotoina o le folafolaga. O lea taimi paganoa, na ou maua ai se avanoa lelei e faia ai lea tulaga. E le’i pine, ae oo i lo’u taimi e pasi ai la’u taavale.
O se tasi o alii, o le na faia le suesuega na faapea mai o le a ia aveina atu la’u taavale i totonu o le faletaavale. Ona ia fai mai lea ia te au, ou te faatali i se potu e sosoo ai, seia maea le suesuega. Ua alu lava le taimi, a o ou vaavaai atu i isi tagata o o mai ma o. Ina ua mavae sina taimi, na amata ona ou manatu ifo, masalo e tele se faafitauli o la’u taavale.
Ona sau lea o le inisinia mai le faletaavale i le potu faatalitali, ma faailoa mai ua pasia le suesuega o la’u taavale. Faafetai ua matuu atu se avega! Na ou alu atu ma totogi le kesia, ma savali atu i fafo i le mea na paka ai la’u taavale ma maua ai o ia o faatali mai mo au.
“Tamaitai,” na ia fai mai ai, ma vaai toto’a mai ia te au, “e mafai ona ta talanoa mo sina minute?”
“Ua lelei,” na ou fai atu ai ia te ia.
“Ou te faamalie atu mo le umi o le suesueina o lau taavale. E te silafia, a o o’u aveina atu lau taavale i totonu o le faletaavale, na ou vaaia ai se fasipepa i luga o le nofoa o le pasese, e talanoa faatatau i aiga. Nai lo le vave faafoiina atu o lau taavale ia te oe, na ou nofo i totonu o le faletaavale ma faitau ai faafia i lena fasipepa.”
Na ia faaauau faapea, “O le a lenei ekalesia? O le a lenei pepa e uiga i le aiga? E mafai ona ou mauaina se kopi o lenei pepa? Fai mai na tusia e Aposetolo. O lona uiga ea o loo i ai ni Aposetolo i luga o le fogaeleele i aso nei, e pei lava o le taimi o Iesu? Faamolemole, ou te fia iloaina.”
Na toetoe a ou lē magagana, ae na toe aoao mai ou manatu. Na ou ta’u atu ia te ia, o loo i ai moni lava aposetolo ma perofeta i luga o le fogaeleele, e pei lava o le taimi o Iesu Keriso. Na ou ta’u atu ia te ia e uiga i le Perofeta o Iosefa Samita ma le Toefuataiga o le talalelei. Ona ou tuuina atu lea ia te ia o tusi uma lava a le Ekalesia na i ai i la’u taavale. Na ia tuuina mai lona igoa ma le numera o lana telefoni, ina ia mafai ona faafesootai atu faifeautalai ia te ia. Na faaiu la maua talanoaga, i le faailoaina mai o lona agaga faafetai faamaoni.
A o agai ese atu la’u taavale, na faatumulia o’u mata i loimata. Na ou lagonaina le agaga faafetai na ou tuuina se kopi o le “O Le Aiga: O se Folafolaga i le Lalolagi” i luga o le nofoa o le taavale.
Ou te lei faagaloina lava le vaaiga o le naunautai i mata o lena alii. O lenei aafiaga o se lesona faagalogata e uiga i le mana o le folafolaga i le aiga, o le moni o faaaliga o ona po nei, ma le taua o le faasoa atu o le talalelei i aso uma—ma o nisi taimi o tulaga—e le’i fuafuaina.