Toktok I Mekem Mi Kam Strong Moa
Ol foto oli kam long Josue A. Pena mo Gloria Hait
Ol yangfala oli testifae abaot ol taem we skripja i bin tijim olgeta, i bin leftemap tingting blong olgeta, mo i bin lidim olgeta.
Mifala i bin askem ol yut blong talemaot long mifala abaot wan taem we wan skripja we oli bin lanem baehat i bin helpem olgeta, olsem we Elda Rijad G. Skot blong Kworom blong Olgeta Twelef Aposol i bin tokbaot long Oktoba 2011 jeneral konfrens (luk long kolom long saed). Hemia sam long ol ansa blong olgeta.
Pis long Sol blong Mi
God i promesem pis long sol blong hem mo talem long hem se ol samting we i stap kam agensem hem mo ol hadtaem blong hem bae oli blong smol taem nomo (luk long D&C 121:7).
Skripja we i bin leftemap tingting blong mi plante ova long ol yia hem i stap long Doctrine and Covenants 121:7 taem we Profet Josef Smit i bin stap long Libeti Kalabus, i bin stap krae long Papa long Heven blong kasem help. Mi bin lanem ves ia baehat long seminari, mo mi bin tingbaot taem we mi bin nidim kamfot. Hem i stap mekem mi tingbaot se Papa blong mi we i stap long Heven i stap lavem mi, mo Hem i save gud long ol tes blong mi. Mi bin yusum ves ia blong tekem pis i kam long ol taem blong tingting i fasfas mo long ol taem we mi no bin strong.
Ves ia i bin helpem mi taem mi bin pat blong wan lafet we i jenis i kam wan samting we mi bin save se mi no sapos blong stap long hem. Wetem naes fasin, mi bin talem no long ol fren blong mi, taem oli bin askem mi blong dring o smok. Ves ia i bin givim mi, paoa ia we mi bin nidim, blong stanap from ol bilif blong mi.
Ves ia, i bin helpem mi tu blong mekem wan desisen we i had. Fren blong mi mo mi, mitufala i no save seperet blong faef yia. Mitufala i plei spot tugeta, go long ol trip tugeta, mo hangaraon evri wiken. Be hem i stat blong hangaraon wetem wan grup blong ol fren we oli olfala moa, we mi mi no bin wantem stap wetem olgeta. Long en, hem i mekem mi jusum blong gat hem olsem wan fren, o blong stap stap nomo wetem ol bilif blong mi long saed blong Tok blong Waes mo loa blong jastiti. Mi bin harem nogud tumas. Mi neva save se, blong stanap from wan samting we mi bin bilif, i save had olsem. Be mi bin jusum blong mekem sam niu fren, mo oltaem, gat long maen blong mi promes ia we Papa long Heven i bin mekem long Josef Smit, se evri samting bae i gud.
I no gat wan samting we i moa gud, blong mi save livim ol bilif blong mi, mo mi bin gat eksperiens blong wan glad we i tru mo i stap longtaem taem mi bin jusum raet. Skripja ia i bin mekem testemoni blong mi i kam strong moa mo i bin givhan long mi taem we mi bin nidim.
Loren J. 16 yia, Akansas, YSA
Ol Samting we Yumi No Strong long Olgeta, I Mekem Yumi Kam Strong
Sam manis bifo long taem blong eksam long hae skul, mi no bin filim se mi rere. Mi bin save gud se bae i no posibol nating blong mi mekem gud. Mekem se mi tanem mi i go long Papa long Heven long prea. Taem mi bin stap prea, ol toktok ia oli bin kam long maen blong mi: “Mo sapos ol man i kam long mi bae mi soem long olgeta, samting we i no strong blong olgeta. Mi givim long ol man samting we i no strong blong mekem se oli save putum tingting blong olgeta i stap daon; mo gladhat blong mi i naf blong evri man we i putum tingting blong olgeta i stap daon long fored blong mi; from sapos oli putum tingting blong olgeta i stap daon long fored blong mi, mo gat fet long mi, afta bae mi mekem ol samting we [oli] no strong [long olgeta bae i mekem olgeta oli] kam strong.” (luk long Ita 12:27).
Mi bin luksave se taem mi prea long Papa long Heven blong kasem paoa blong fesem ol jalenj mo ol tes, Hem i stap blesem mi mo i stap helpem mi blong winim ol samting we mi no bin strong long olgeta. Blong stap talemaot wari blong mi long Lod i samting we i moa gud we mi bin save mekem. Hem i tija we i gud moa, mo mi save se Hem i bin helpem mi.
Irvin O. 16 yia, El Salvador
Prea Oltaem
Lod i talem se yumi mas prea oltaem, blong yumi save kamaot olsem man we i win; blong yumi save winim Setan, mo blong yumi save ronwe long ol han blong ol wokman blong Setan we oli stap sapotem wok blong hem (luk long D&C 10:5).
Ves ia i helpem mi blong fesem ol temtesen. Taem mi stap rere blong mekem wan samting we mi save se i rong, ves ia mo mesej blong hem i kamaot insaed long maen blong mi. Evri taem we mi stap prea afta we mi gat tingting ia i kamaot, mi kasem help we mi nidim blong winim ol temtesen we mi stap fesem.
Jesi F. 17 yia, Yuta, YSA
Mi Stap Wetem Yu
Lod i talem se yumi mas gat fasin blong save wet longtaem long ol hadtaem, from we bambae yumi gat plante; be yumi mas stap strong agensem olgeta, from we Hem i stap wetem yumi, go kasem en blong laef blong yumi (luk long D&C 24:8).
From se mi bin lanem skripja ia baehat, hem i bin wan blesing long mi, speseli taem mi bin filim se mi fraet o mi stap miwan. Taem mi tingbaot skripja ia, mi gat strong paoa long tingting mo mi filim gud moa. Olsem ol yang man mo ol yang woman, yumi nidim paoa mo sapot, speseli taem yumi stap fesem ol tes mo ol jalenj. Nomata we samtaem yumi no save wanem i stap kam long fiuja, o yumi wantem givap long fiuja, mi save se mi save gat tras long Lod mo akseptem Hem we i openem han blong Hem long mi.
Taem mi bin smol, long hom mo long Praemeri oli bin tijim mi se oltaem, Lod bae i stap long saed blong mi sapos mi mekem pat blong mi. From ol tijing ia mo tu, from skripja ia, mi save se mi save dipen long Hem oltaem.
Sofia I. 15 yia, Yurugwe
Ol foto oli kam long Welden K. Andesen mo Kristien Albanes