Tingbaot Olgeta we Oli Gat Wan Gudfala Laef

Niuwel K. Witni (1795–1850)

Niuwel Kimbol Witni i bin bon long Vemon, YSA, long 5 Febware 1795. Hem i bin mo gat talen blong kam wan bisnisman mo bin statem wan frensip mo bisnis patnasip wetem Sidni Gilbet. Long ol eli dei blong bisnis blong tufala, tufala i bin travel oltaem. Long wan long ol bisnis trip blong tufala, Niuwel i bin mitim Elisabet An Smit long Ketlan, Ohaeo. Niuwel mo An i bin mekem fren blong tri yia mo mared long 1823.

Tugeta Niuwel mo An i bin lukaotem trutok mo, blong smol taem, tufala i joenem Kampbelaet muvmen, we oli biliv se oli bin putumbak olfala kristin laef. Wan naet Niuwel mo An i bin prea “blong askem long Lod olsem wanem [tufala] i save kasem presen we i Tabu Spirit.” An i bin tokbaot visen we tufala i bin kasem olsem ansa long prea blong tufala: “Spirit i bin kam long mitufala mo wan klaod i kavremap haos. … Afta mitufala i bin harem wan voes i kamaot long klaod, we i talem: ‘Rere blong kasem ol toktok blong Lod, from i stap kam.’”¹

Smol taem afta long ansa blong prea blong tufala, long Oktoba 1830, Ol Lata dei Sent misinari oli bin kam long Ketlan. Long Novemba, Niuwel mo An i bin baptaes. Wan manis nomo afta, Josef mo Ema Smit i bin kam afta mo noknok long doa blong Witni famle. Taem Josef i singaotem Niuwel long nem blong hem, Niuwel i no save talem se hem i save nem blong Josef, mekem se Josef i ansabak, “Mi mi Josef, mo Profet; yu bin prea from mi, mo mi hemia, naoia wanem nao yu wantem long mi?”² Afta, Witni famle i lukaotem famle Smit long haos blong olgeta blong sam wik mo givim wan hom long olgeta long Septemba 1832.

Antap long wanem we tufala i bin mekem blong givim ples long Smit famle blong stap long hem, Niuwel i bin givim, long Jos, spes antap long stoa blong hem blong yusum. Long stoa blong Witni, ol lida blong Jos oli bin gat ol miting mo Skul blong Ol Profet.

Long Disemba 1831, oli bin singaotem Niuwel olsem seken bisop blong Jos, mo afta, i bin stap olsem maneja blong ol wok long saed blong faenens blong Jos, I stap helpem Jos blong manejem ol mane blong hem mo mekem se i no gat kaon. Long drae taem blong 1838, Witni famle i bin muvaot i go long Fa Wes, Misuri, ples we oli bin singaotem bakegen Niuwel olsem wan bisop, mo 10 yia afta, hem mo famle blong hem oli bin krosem ol flat ples long Sol Lek Siti, mo longwe hem i bin stap olsem Prisaeding Bisop blong Jos.

Niuwel i bin ded long 24 Septemba 1850, long Sol Lek Siti afta we hem i bin gat wan sik we i mekem hem i faenem i had blong pulum gud win.

Ol Not

1. Elizabeth Ann Whitney, oli kwotem insaed long Edward Tullidge,The Women of Mormondom (1877), 41–42.

2. Joseph Smith, oli kwotem insaed long Elizabeth Ann Whitney, “A Leaf from an Autobiography,” Woman’s Exponent, 15 Ogis 1878, 51.

Andanit, long lef: Wan pikja we oli droem blong Niuwel K. Witni. Andanit, long raet: Hem i stoa rum antap long haos blong Niuwel K. Witni long Ketlan, Ohaeo, we Skul blong Ol Profet mo ol miting blong Jos oli stap tekem ples long hem. Andanit: hem i stoa blong Witni famle.