Ol Yut blong Brasil I Putum Tugeta Famle Histri, Tempol Wok
Rosé A. Moskao i bin stap luk wan samting: ol yut we i bin stap kam blong go long Kampinas Brasil Tempol i bin spendem plante taem blong sidaon mo wet.
Brata Moskao, daerekta blong famle histri senta we i stap narasaed nomo long tempol, i bin save se from oli stap longwe long tempol, plante yut i mas travel blong kasem tempol, plante i kam long ol bas haos mo stap blong sam dei. Taem bitwin ol sesen blong olgeta long ples blong baptaes mo ol kakae mo blong wet long ol papa mo mama blong olgeta mo ol lida we oli stap tekpat long ol nara tempol odinens, hemia oli no save mestem.
Be ating, hem i ting se, hem i save givim long ol yut wan nara samting blong stap mekem long tempol yad, long ol taem we oli fri.
Mekem se hem i bin mekem.
Wan Invitesen
Hem i stat blong invaetem ol yut i go long senta mo glad blong tijim olgeta olsem wanem blong mekem wok blong indeks blong FamilySearch (wok blong taepem ol famle rekod i go long program blong Jos).
Long fastaem, sam oli bin sem mo no wantem save. Be brata Moskao i bin talem se taem hem i bin toktok long olgeta long saed blong wok blong sevem pipol aot long tudak mo tekem ol nem blong olgeta i kam long laet blong soem se oli stap folem ol toktok blong wan profet we i laef, samting ia i bin tajem ol yut (luk long David A. Bednar, “The Hearts of the Children Shall Turn,” Liahona mo Ensign, Nov. 2011, 24–27).
Blong tempol mo famle histri senta i bin stap long sem ples i minim wan samting; i soem long wan wei we yumi luk se tempol mo famle hisri wok i tu pat blong wan bigfala hadwok. Hemia, Joj A. Oks, Kampinas Brasil Tempol presiden i talem, i wan samting we ol yut long tempol distrik oli kam blong lanem.
“Bifo oli pusum olgeta blong tekpat long famle histri wok ia, stamba tingting bihaen long trip blong olgeta i go long tempol, i blong mekem ol baptaes blong olgeta dedman. Naoia eksperiens blong fasin blong rekodem ol nem i kam pat blong wok blong olgeta,” hem i talem.
Wan Taem blong Save Wan Niu Samting
Taem ol yut oli kam long senta, Brata Moskao mo ol misinari we oli stap volontia long senta, oli tokbaot ol prinsipol ia long wan sot toktok:
-
Oli stap kam ol sevya long hil blong Saeon (luk long Obadaea 1:21).
-
Oli stap mekem folem toktok blong wan profet (luk long “The Hearts of the Children Shall Turn”).
-
Oli stap sevem man aot long tudak—tudak blong ol olfala film mo ol buk blong ol ofis blong rejistri mo ol jos we i fulap long das. Fasin blong indeks i blong karem ol nem ia oli kam long laet mo mekem oli stap long wan wei we famle blong olgeta i save lukaotem olgeta mo faenem olgeta.
-
Taem oli joenem wok ia, bae oli tekpat long wan nara pat blong topik we i gat moa glori long ol narafala topik, we i blong gospel ia we i no save en, we nem blong hem i baptaes blong olgeta we oli ded” (luk long D&C 128:17).
-
Bae oli yusum taem blong olgeta long bigfala wok ia blong karembak olgeta we oli ded finis, we hemia i blesem ol famle.
-
Yumi evriwan i pat blong famle blong God, mekem se taem oli putum ol nem blong ol pipol we oli no save, oli stap helpem famle yet.
-
Taem oli andastanem olsem wanem blong tekpat mo mekem indeks, oli gat wan janis blong tijim ol memba blong famle blong olgeta mo ol nara pipol long ol wod mo branj blong olgeta blong tekpat tu.
Brata Moskao mo ol misinari oli yusum ol kompiuta blong senta blong soem long ol yangfala ia olsem wanem blong stat rekodem lis blong ol nem mo olsem wanem blong putum long kompiuta mo yusum taem oli go hom. Taem oli andastanem, Brata Moskao i bin talem, oli “stat rekodem lis blong ol nem wetem wan paoa we i no olsem ol narawan.”
Wan Intres long Wok Ia
Ol namba i soem intres ia. Long fas tu manis blong 2012, ol visita oli mekem lis blong ol nem 6,370; aot long namba ia, 3,305 ol yut we oli gat 12 kasem 18 yia, oli bin mekem indeks blong olgeta. Tru samting se, intres blong mekem indeks blong ol nem ia i bin kam antap tumas, mekem se Kampinas famle histri senta i oltaem muvum nomol aoa blong hem long 8 klok moning i go kasem 6 klok aftenun, mo i stap open iven kasem 10 klok long naet.
Be ol yut oli no putum wok ia i stap taem oli stap aot long tempol. Taem oli kasem hom, oli gohed blong mekem wok ia we Brata Moskao i singaotem “ami blong ova 170,000 aktiv yut we i stap mekem indeks blong ol nem we Jos i gat tedei.” Plante oli mitim ol gol blong Diuti blong Mi long God mo Progres blong Miwan wetem wok blong olgeta blong mekem indeks blong ol nem.
Wan Paoa blong Lidim Man blong Mekem Gud
Eli long yia ia, Isabela A., we i gat 16 yia, blong Vila Vela Espirito Santo, Brasil, i bin travel wetem mama mo sista blong hem i go long tempol; las dei blong trip ia i bin long wan yia aniveseri blong ded blong bubuwoman blong hem. Isabela i bin baptaes long bihaf blong bubuwoman blong hem, mo mama blong hem i bin mekem ol nara tempol odinens.
“Mi bin filim long trip ia se mi nidim blong mekem wan gud samting,” Isabela i eksplenem. “Mi bin wantem blong lanem blong mekem indeks blong ol nem, mo mi bin kasem help i kam long Brata José Moskao.
“Afta, taem mi bin baptaes long bihaf blong bubuwoman blong mi, Spirit i bin tajem mi bigwan. Mi bin luksave se i gat plante pipol narasaed long vel we oli gohed blong wet, mo oli nidim help blong mi. Mi bin luksave se mi save givim smol taem blong mi blong givim seves, mo we mi save mekem plante samting blong ol pipol ia. Fasin blong mekem indeks blong ol nem i wan wok blong lav.”
Long taem blong ol trip i go long tempol, ol yut long Kampinas Brasil Tempol distrik i tekpat long wok blong indeks blong FamilySearch bitwin ol sesen long ples blong baptaes.
Foto i kam long José A. Moskao