Jodikdik in Brazil ro rej Kobaļo̧k ilo Menmenbwij an Baam̧le, Jerbal an Tampeļ
José A. Moscão eaar kile juon iaļ eo eoktak: jodikdik ro me raar itok n̄an Campinas Brazil Temple raar joļo̧k eļap iien n̄an jijet im kōttar.
Būratōr Moscão, eo ej jeban jentōr eo an menmenbwij an baam̧le eo epaake tampeļ eo, kar jeļā bwe kōn ettoļo̧k in an jodikdik ro kar jipadektok tampeļ eo, elōn̄ iaer raar itok ilo van ko im pād ium̧win jejjo raan ko. Iien eo ikōtaan session ko aer ilo iien kōpeptaij eo im iien m̧ōn̄ā ko im aer kōttar ro jineer im jemāer im ritōl ro aer ro raar bōk koņaer ilo kain̄i ko jet an tampeļ eo, kar jab maron̄ jerwaani.
Ak bōlen, eaar ļōmņak, emaron̄ leļo̧k n̄an jodikdik ro juon men eo n̄an aer alooje peļaakin tampeļ eo jabdewōt iien n̄e ewōr aer iien.
Kōn menin eaar kōm̧mane.
Juon Kūr
Eaar jino karuwaineneik jodikdik ro n̄an jentōr eo im leļo̧k im katakin er wāween kōm̧man FamilySearch indexing.
Ilo jinoin jet raar jook ak jenliklik. Ak Būratōr Moscão eaar ba bwe ke eaar kōnono n̄an er kōn wāween lo̧mo̧o̧ren armej jān marok im bōktok er n̄an meram āt ko etaer ilo pokake naan ko an juon rikanaan emour, jodikdik ro raar en̄jake (lale David A. Bednar, “The Hearts of the Children Shall Turn,” Liaona im Ensign, Nov. 2011, 24–27).
Bwe tampeļ eo im jentōr eo an menmenbwij an baam̧le rej pād ilo ejja em̧ eo elukkuun aiboojoj; ej kwaļo̧k juon wāween eo bwe tampeļ im jerbal in menmenbwij an baam̧le rej ruo m̧wen̄an ko an juon jibadbad eļap. Bwe, George A. Oakes eaar ba, Campinas Brazil Temple būreejtōn, ej juon men eo me jodikdik ro ilo tampeļ district in rej jino in ekkatak.
“M̧okta jen ad kwaļo̧k n̄an aer jino bōk koņaer ilo menmenbwij an baam̧le im indexing, tūreep eo aer n̄an tampeļ eaar pedped wōt ioon jibadbad eo n̄an aer peptaij kōn ro remej. Kiiō en̄jake ko kōn indexing rej jino erom̧ m̧ōttan jerbal eo aer,” eaar ba.
Juon Kadkadin
Ke jodikdik ro raar itok n̄an jentōr eo, Būratōr Moscão im mijenede ro rej baļinteer ilo jentōr eo raar kōnono kōn laajrak in pedped ko ilo juon wāween ekadu, juon iien jineet eo ejjab lukkuun poļōmen:
-
Raar erom̧ rilo̧mo̧o̧r ro ilo toļ Zaion (lale Obadaia 1:21).
-
Rej eo̧ron̄ kūr eo an juon rikanaan (lale “The Hearts of the Children Shall Turn”).
-
Rej lo̧mo̧o̧ren armej jān maroklep—maroklep eo an pija ko etto im jerwaani im bok ko rōbūn̄aln̄al jen opiij in rekoot ko im kabun̄ ko. Indexing ej bōktok āt ko n̄an meram im kapidodo pukōti bwe baam̧le ko aer ren maron̄ lo er.
-
Ilo kobaļo̧k ilo jerbal in, renaaj bōk koņaer ilo bar juon wāween eo elukkuun aiboojoj an aolep armej ro rej jān ko̧jpeļ eo ejjeļo̧k jem̧ļo̧kin, āinwōt peptaij kōn ro remej (lale D&C 128:17).
-
Renaaj kōjerbal iien ko aer ilo jerbal in eļap n̄an lo̧mo̧o̧ren ro remej, eo ej kōjeram̧m̧an baam̧le ko.
-
Kōj aolep rej m̧ōttan baam̧le eo an Anij, kōn menin ilo indexing āt ko etan armej rej jab jeļā, rej pād wōt ilo aer jipan̄ wōt baam̧le ko aer.
-
M̧ae rej meļeļe wāween eo n̄an bōk koņaer ilo indexing, innām ewōr juon aer iien em̧m̧an n̄an katakin membōr in baam̧le ko aer im rūm̧m̧an ded ro jet ilo ward im branch ko aer n̄an aer barāinwōt bōk koņaer.
Būratōr Moscão im mijenede ro innām rej kōjerbal kamputōr ko an jentōr eo n̄an kwaļo̧k n̄an jodikdik ro wāween eo n̄an aer jino indexing im wāween n̄an install im kōjerbal software eo n̄e rej pād m̧weo m̧weer. M̧ae rej meļeļe, Būratōr Moscão eaar ba, rej “jino index kōn juon kajoor āinwōt ejjan̄in kar wōr.”
Juon Lem̧ōņōņō kōn Jerbal eo
Elōn̄ ro rej kwaļo̧k lem̧ōņōņō in. Ilo allōn̄ ko ruo m̧okta ilo 2012, rilotok ro raar indexed 6,370 āt ko; 3,305 iaan āt ko raar index jen jodikdik ro iiō ko aer rej 12 n̄an 18. Ilo m̧ool, n̄an leļo̧k orļo̧k eo ej eddōkļo̧k ilo indexing, Campinas family history center eo emakijkij an kaitokļo̧k awa in jerbal ko an 8:00 a.m n̄an 6:00 p.m. im peļļo̧k wōt totata āinwōt 10:00 p.m.
Ak jodikdik ro reban etal jān tampeļ eo eļan̄n̄e rejjab index. N̄e rej tōparļo̧k m̧weo, rej wōnm̧aanļo̧k wōt kōn jerbal eo aer eo Būratōr Moscão eaar kūr “jarin tariņae eo elōn̄ļo̧k jen 170,000 ri index ro reniknik an Kabun̄ in rainin.” Elōn̄ rej tōpar kōttōpar ko aer n̄an Jerbal eo Aō n̄an Anij im Personal Progress eo ilo jerbal in index eo aer.
Juon Kareel eo Em̧m̧an
Jinoin iiō in, Isabela A., 16 iiō dettan, jen Vila Velha, Espírito Santo, Brazil, eaar etal ippān jinen im jejtōr eo an n̄an tampeļ eo; raan eo āliktata ilo tūreep eo eaar juon iiō in kakememej mej eo an jibūn. Isabela eaar peptaij kōn jibūn, im jinen eaar kōm̧m̧ane kain̄i ko jet an tampeļ kōn e.
“Iaar en̄jake ilo tūreep eo bwe Iaar aikuj in kōm̧m̧ane juon men em̧m̧an,” Isabela eaar kōmeļeļeiki. “Iaar kōņaan in ekkatak kilen index, im Iaar bōk jipan̄ jān Būratōr José Moscão.
“Innām, ke Iaar peptaij kōn bubu, Jetōb eo eaar lukkuun un̄ūr eō. Iaar kile bwe eaar lōn̄ armej ro itulikin rōn̄el eo ro rej jab jem̧ļo̧k aer kōttar, im rej aikuji jipan̄ eo aō. Iaar kile bwe imaron̄ leļo̧k wōt jidik in iien eo aō n̄an jerbal im bwe imaron̄ kōm̧m̧an ijo eļap n̄an armej rein. Indexing ej juon jerbal in iakwe.”
Ilo tūreep ko n̄an tampeļ eo, jodikdik ro ilo Campinas Brazil Temple district rej bōk koņaer ilo FamilySearch indexing ikōtaan session ko ilo iien kōpeptaij eo.
Pija jen José A. Moscão