Kairaken Brazil a Toma ma Rongorongon te Utu, Mwakuri n te Tembora
José A. Moscão e noora te mwamwaingiing: kairake ake a roko nakon te Campinas Brazil Tembora “e maan aia tai n tekateka n tataninga imarenan taian tietion.” Jose A. Moscao
Te Tari Moscão, te taraekita n te tienta n rongorongon te utu are e tei ni kaitara ma te tembora, e ataia bwa ibukin te raroa a mwaiti kairake aika ana mwananga nakon te tembora, angiia a roko ma aia umanriana ao n tiku iai inanon tabeua te bong. Te tai imarenan aia tietion n te bwabetito ma tain te amwarake ao n tataningaia aia karo ma aia mataniwi ake a rinanon mwakurin te otenanti n te tembora aki kona n taonaki.
Ma tao, e iangoia, e kona ni karekea aia tai kairake n neweabaa tinanikun te tembora n te tai are e mwaawa iai aia tai.
Ai ngaia are e karaoia.
Te Kakao
E moana kaoakiia kairake nakon te tienta ao n anga reirei nakoia bwa ana kanga ni karaoa te FamilySearch intekiti.
N te moan tabeman a maama ke a kakantaninga. Ma e taku te Tari Moscão bwa ngke e taetae nakoia ibukin kamaiuakiia aomata man te roo ao n uotiia nakon te oota araia n ongotaekaia nakon ana taeka te burabeti ae maiu, a rootaki iai kairake (taraa David A. Bednar, “E na Rairi Nanoia Naati,” Liahona ao Ensign, Nobembwa 2011, 24–27).
Bwa te tembora ao te tienta n rongorongon te utu aika a kateaki n te tabo ae ti teuana e rangin ni kakawaki; e kabwarabwara raoi te kawai bwa te tembora ao te mwakuri ibukin rongorongon te utu bon mwakoron te mwakuri ae ti teuana. Anne, e taekinna George A. Oakes, te beretitenti n te Campinas Brazil Tembora, bon te bwai are a tia kairake ake a mena n aonon te tembora ni moana reiakinana.
“Imwaaina ae na kabwarabwaraaki nakoia reiakinan rongorongon te utu ao te intekiti, te kantaninga ibukin mwanangaia nakon te tembora bon ti ibukin te bwabetito ibukia mate. Ma ngkai taneiaia ma te intekiti e a riki bwa mwakoron aia mwakuri,” e taku.
Te Kamataata
Ngkana a roko kairake n te tienta, Tari Moscão ao mitinare a ibuobuoki n te tienta n rinanoi ao n anga reirei n te aro ae kimototo, n anga rongorongo:
-
A riki bwa taan kamaiu i aon te maunga are Tion (taraa Obaria 1:21).
-
Ana ongo ana wewete te burabeti (taraa “E na Rairi Nanoia Naati”).
-
A kamaiuia aomata man te rootongitong—te rootongitong ae maninga te aba taekana n te tai ae maan ao te boki n taumwii n aobiti ao te ekaretia. Karaoan te intekiti e kabebetea ataakin ara aikanne ao ni kabebetea aron kuneakiia bwa aonga aia utu ni kuneia.
-
Ni katoamauan te mwakuri aei, a na irekereke ma mwakuri riki aika rianako aroia n te kawai teuana, ae te kabanea ni mimitong ni bwaai nako are e kaineti ma taekinakin te euangkerio ae akea tokina, are aranaki bwa, te bwabetito ibukiia maate (taraa D&C 128:17).
-
A ana kabongana aia tai n te mwakuri ae tamaroa ni kamaiuakiia mate, are e kakabwaiaia utu.
-
Ngaira ni kabane boni mwakoron ana utu te Atua, ngaia are karaoan te intekiti n araia aomata ake aki ataia, a teimatoa ni buokiia aia utu.
-
N te tai are a ataa aron te mwakuri ma te intekiti, e reke aia tai n reireiniia kaain aia utu ao aomata tabeman ake a kairake inanon aia uoote ao mwaanga bwa ana ibuobuoki naba.
Tari Moscão ao mitinare a kabonganai ana kombiuta te tienta ni buokiia ni kaotaia aika tibwa te bwitabun aia ririki n aron kabonganakin te intekiti ao ni karini ao ni kabonganai tiaobutuea ngkana a roko ni mweengaia. Ngkana a oota raoi, e taku te Tari Moscão, a “waaki ni karaoi intekiti ma te korakora ae akea n aiarona.”
Te Ingainga Ibukin te Mwakuri
Te nambwa e kaota te ingainga n nano. Inanon namwakaina aika uoua ni moan 2012, a intekitini 6,370 taian ara; 3,305 maibuakoia ara aikana a intekitinaki irouia kairake aika 12 nakon 18 aia ririki. Ni koauana, ibukin nooran rikiraken te mwaiti ake a roko ni karaoa te intekiti, ao te Campina tienta ibukin rongorongon te utu e teimatoa ni kananaua ana tai n uki man te aoa 8:00 n te ingabong nakon te aoa 6:00 n te tairiki ao n tiku naba n uki n taira nakon te aoa 10:00 n te tairiki.
Ma kairake aki katuka te intekiti ngkana a kitana te tembora. Ngke a roko ni mwengaia, a reitinako ni karaoi nakoaia n aron are e taekinna te Tari Moscão “taan buaka are e raka iaon 170,000 intekitia aika a kakaonimaki n aron ae karekea te Ekaretia n te tai aei.” A rawata aika a koro bukin aia kouru n te Beku nakon te Atua ao Rikirakem Bon I Roum ma aia mwakuri n te intekiti.
Te Kairoro ibukin te Tamaroa
Ni moan te ririki aei, Isabela A., ana ririki 16, mai Vila Velha, Espírito Santo, Brazil, e mwananga ma tinana ao tarina nakon te tembora; te kabanean n tai ni mwananga bon te kateuana n ririki ni kauringa iai maten tibuna te unaine. Isabela e bwabetitoaki ibukin tibuna te unaine, ao tinana e karaoi otenati n te tembora ake tabeua ibukina.
“I namakinna n tain te mwananga aei bwa n na riai ni karaoa te bwai ae a tamaroa,” e kabwarabwara Isabela. “I tangiria n reiakina aron te intekiti, ao I karekea te ibuobuoki mairoun te Taari José Moscão.
“Imwin anne, ngke I a tia ni bwabetitoaki ibukin tibu te unaine, e ringai te Tamnei. I ataia bwa a mwaiti aomata ake a tia n riaon te rabuna aika a tataninga n aki toki, ao a tangira au ibuobuoki. I ataia bwa I kona n anga au tai ni beku ao I kona ni karaoa ae mwaiti ibukiia aomata aikai. Te intekiti bon te mwakuri n tangira.”
N tain te mwananga nakon te tembora, kairake man te aono ae Campinas Brazil Tembora a reitaki ni karaoa FamilySearch intekiti imarenan taian tietion n te bwabetito.
Rawetamnei iroun José A. Moscão