I aki Kona Ni Bwabetitoaki Naba Ngai?
Naati a riai ni bwabetitoaki ibukin kabwaraan aia bure ngkana e koro waniua aia ririki (taraa D&C 68:27).
“Nuno ao Miriam, kam kona n ira ana katooto Iesu Kristo ao ni bwabetitoaki n te Kaonobong are imwiina?” E titiraki Titita Silva.
E aki kona ni kakoaua ongona Paulo. Mitinare n aine a tibwa tia ni kaoa mwanena ao tarina ae kaka 10-aia ririki bwa a na bwabetitoaki!
“Eng. Eng.” a kaeka bwebwe ma te kukurei.
E aki kona ni kaina ngarena Miriam. Nuno ao Titita Lopes a uaia ni uboi baia. Tibuna te aine e kaota kukureina ni moangare man ana kaintekateka ae bubura ni uraura n te koona.
Inanon tabeua te wiiki ao a tia mitinare n aine n reireina Paulo ma tarina ao mwanena ni mweengan Tibuia te unaine are e maeka n atimwakoron São Miguel ae kiriin, man karekare angina, 1,000 te maire (1,600 km) raroana man te meinraen Portugal. Paulo e tangiria ni kauka mataroan ana auti Tibuna te aine are mai i moa ni karekea te ang ae mwaitorotoro mai taari ngke e taraia Titita Lopes ao Titita Silva a rianna ni waerake nakoina n reireinna taekan te euangkerio.
Mitinare n aine a taku te reirei ae onoti n te bong aei. Ngkai Paulo e ataia bwa bukin tera. Nuno ao Miriam a nang bwabetitoaki n aron are e reirei Iesu! Paulo e tangiria naba n ira ana katooto te Tia Kamaiu.
“Titita, I kona ni bwabetitoaki n te Kaonobong ae na roko naba?” e titiraki ma te ingainga n nano, n taua ni kaniia riki Ana Boki Moomon nakoina.
E ngare Titita Silva ma n ioioa atuuna. “Kabwara au bure, Paulo. E a tia te Uea n tuangiira bwa ti bane ni kainnanoa te bwabetito ma ti ngkana e a tia ni koro waniua ara ririki ni maiu. Bukina bwa ai tibwa onoua am ririki, ko aki kona ni bukinaki ibukin am rinerine moa.”
“Ma, titita,” Paulo e aki kukurei, “I a tia n tataro ao ni wareka Ana Boki Moomon ma au utu, n aron are kamwa tia n reireinai. I nakon te Moanrinan ni katoa wiiki ma Tibu te unaine ao Uncle Mário. I ataia bwa e koaua te Ekaretia! I aki kona ni bwabetitoaki ma Nuno ao Miriam?”
“Ko a tia ni karaoa te mwakuri ae moan te tamaroa ni maiuakin tuua ao n reiakina taekan te euangkerio,” E taku Titita Lopes. “Ma ko na tiku naba n tataninga uoua te ririki imwain ae ko bwabetitoaki.”
Buuan Paulo e moanna ni moora, ao rannimata aika korakora a kaona nanon matana. E kibarake ao e biri nakon ana ruu ieta, te tabo are e matu iai ma tarina.
Imwiin tangina iaon uningana inanon tabeua te miniti, Paulo e ongo bukibukin waen te aomata n tamwarakea te kaintamwarake nakon te ruu are ieta. Uncle Mário e tekateka iaon ana kainiwene Paulo.
“Tera ae riki, Paulo?” E titiraki Uncle Mário.
“Titita Silva ao Titita Lopes a taku I aki kona ni bwabetitoaki, ma a kona Nuno ao Miriam,” E taku Paulo. “I tangiria ni kan riki bwa te membwa n te Ekaretia! I tangiria n anene man booki n anene n te bootaki n toa ao n reikina taekan booki aika tabu n te Maonrinan. I aki tangiria bwa n na katukaki.”
“Paulo, ko kona n teimatoa n riki bwa kaain te Ekaretia, e ngae ngke ko tuai n tau nakon te bwabetito,” Uncle Mário e taetae ni karaurau.
“Ni kanga?” Paulo e kaneneboia uningana.
“Eng, ko ataia ae te Moanrinan e katauraoa ana burokuraem n te bootaki n toa,” E taku Uncle Mário. “Am tia reirei n te Moanrinan e tuangai bwa e kakaeia taan anganano bwa ana kaota aia kakoaua n te burokuraem. Anne te anga teuana ae ko kona n ibuobuoki iai n te taromauri,” E kabwarabwara Uncle Mário.
“E koaua?” E teirake n tekateka Paulo ni kaitara uncle. E iangoia tabeua te miniti. “Tao I kona ni kaota au kakoaua n aia bwabetito Nuno ao Miriam naba!”
“Anne te iango ae moan te tamaroa!” E taku Uncle Mário. “E ngae ngkana ko rangin ni uarereke nakon te bwabetito, ko kona n taekina am kakoaua.”
E kibarake Paulo man ana kainiwene ao e kawaekoa n ruo man te kaintamwarake.
“Ko na nakea, Paulo?” E wewete Uncle Mário.
“N na nako ni kataneiaai ni kaota au kakoaua nakoia mitinare!” E kaeka n takarua Paulo ma te kukurei. “N na tibwauaia ngkana I tataninga au tau ni bwabetito!”
Kamataata iroun Jared Beckstrand