Jiron̄ Kōm kōn Kabun̄ eo Am
Shauna Moore, Virginia, USA
Ilo juon tūreep n̄an loļo̧k būratōr eo aō, Iaar jijet lik ilowaan baļuun eo ijo rijerbal ro raar jijet ie. Ļain in jijet ko ruo ilo jikin eo me ej jujel n̄an doon.
Iaar kwaļo̧k kajjiō n̄an armej ro rej jijet ipeļaakū im bwe Ipojak in jikuuļ ilo Brigham Young University. Juon em̧m̧aan eo eaar jijet itujepar eō eaar ba bwe leddik eo nejin ewōr juon m̧ōttan eo ej kab em̧m̧akūt n̄an jerbale juon mijen aolep raan. Leddik eo nejin ejeļā jidik kōn Kabun̄ in, ak e ejjeļo̧k men ejeļā. Rijerbal eo em̧ōkaj an ba bwe eban kōņaan pād “ilo Kabun̄ in” kōnke ej jum̧ae kōrā. Em̧m̧aan eo eaar ba eaar ron̄ jet men ejja kain ko wōt—bwe Kōrā ro Rekwojarjar ilo Raan-ko Aliktata edik aer aorōk jen em̧m̧aan ro, bwe rejjab maron̄ kabwijer priesthood eo ak tōl ilo kweilo̧k ko, im bwe Kabun̄ in em̧m̧aan men eo ej tōl.
Innām, oktak tok n̄an eō, eaar kajjitōk, “Ekōjkan am en̄jake kōn menin?” Aolepen armej ro jiljilimjuon raar oktak tok n̄an eō im kōttar.
Menono eo aō eaar jino bam̧. Āinwōt juon ajri Iaar kemejmej e Laajrak in Tōmak ko n̄an juon eo inej ioone, im āinwōt juon jodikdik im rūm̧m̧an ded Iaar kaminene kwaļo̧k naan in kam̧ool in ettōņak eo an Joseph Smith im kōn Bok in Mormon. Bōtaab ejjeļo̧k Aō ļōmņak ekōjkan uwaake kajjitōk eo an em̧m̧aan eo. Iaar jar ilo an ejjeļo̧k ainikiō n̄an Jemedwōj Ilan̄ n̄an tōl eō.
Innām Iaar ba naan ko m̧okta me raar itok n̄an kōlmenļo̧kjeņ eo aō: “Kwojjab jeļā kōn Dououl eo an Kōrā.” Erreitok eo turin mejāer ar kwaļo̧k bwe rejjab.
“Jerbal ko an priesthood ilo ekkeijel ippān kōrā, aolep ro rej membōr in Doulul an Kōrā,” Iaar kōmeļeļeik. “Ewōr am būreejtōn an Doulul an Kōrā eo ej tōl aolepān m̧akūtkūt ko an kōrā ilo Kabun̄ eo peļaakin laļ in. Eddo eo an kōrā ej n̄an boktok inem̧m̧an im jouj n̄an mour ko an membōr im eļaptata n̄an mour ko an baam̧le ko.”
Armej ro ipeļaakū raar itok limo in ron̄jake.
“Jej mour ilo juon iien eankeke n̄e jet kōrā rekōņaan bwe kōrā ren jerbal im ļōmņak āinwōt em̧m̧aan. Bōtaab kōmij tōmak Anij eaar ajije jerbal ko. Kōmij kōtmāne kōrā ro n̄an erom ritōl ro ilubwilijin kōrā im kakobaik ritōl ro ilo m̧oko m̧weer. Em̧m̧aan ro rej pedped iood n̄an kapilōk ilo jikin kein. Ej juon jon̄an eo ejjejet. Ekōm̧m̧an bwe doulul ko an Kabun̄ in im m̧oko m̧ōd ren jeram̧m̧an. Ijoke kōrā e jab anemkwōj jān m̧aan, ak m̧aan anemkwōj jān kōrā, ilo Irooj (lale 1 Korint 11:11). Kōm̧ij tōmak bwe jejjab likio eļān̄n̄e jejako jen doon. Kōmij jab tōmak bwe jekar ejaak n̄an jiāek doon ak n̄an jipan̄ doon.”
Iaar en̄jake aō jeram̧m̧an ke Ij dedeļo̧k. Ijeļā bwe naan ko Iaar kōnono kaki rej jen Jetōb. Aolep armej ealikkar aer kar m̧ōņōņō kōn kōmeļele eo aō. Innām em̧m̧aan eo eaar ba,“Jiron̄ kōm eļapļo̧k kōn Kabun̄ eo am.”
Innām, ruo awa bar tokālik, Iaar bōk iien eo elem̧ōņōņōtata kōnono kōn Jepļaaktok eo, uwaake kajjitōk ko, im kwaļo̧k naan in kam̧ool kōn ko̧jpeļ eo Ij iakwe.