Gahum diha sa Pag-ampo
Ang kabatan-onan gikan sa isla sa Cebu sa Pilipinas naghisgot mahitungod sa pagkadawat og mga tubag sa ilang mga pag-ampo.
Sa mga napulo ka liboan ka mga isla sa kalibutan, usa ka pundok nga 7,107 ka mga isla ang nahimo nga nasud sa Pilipinas sa Habagatang Asya. Usa ka padayon nga panultihon nga komon sa Pilipinas nag-ingon nga dunay 7,107 ka mga isla, inig kahunas sa dagat. Ang gidaghanon sa isla mo-us-os ngadto sa 7,100 sa pagtaob sa dagat, kon ang uban masanapan sa dagat. Unya unsaon man sa mga kabatan-onan sa Pilipinas nga dili maunlod sa tubig ang ilang mga ulo kon gibati nilang gisanapan? Modangop sila sa Langitnong Amahan sa pag-ampo.
Dunay mga panahon sa atong kinabuhi diin kita mobati nga nag-inusara, apan kon mahinumdom kita nga ang atong Langitnong Amahan kanunay nga anaa alang kanato—kanunay nga andam sa pagpamimaw ug pagtubag sa atong mga pag-ampo—makasalig kita niana nga kamatuoran ug mobati sa paglaum ug pagsalig nga dala niana nga kahibalo.
Ang Pag-ampo Makahatag og Pagsalig
Si Joselito B. naghisgot mahitungod sa pagpaapil kaniya sa usa ka storytelling contest sa dihang siya 12 anyos pa. Gihangyo siya sa iyang magtutudlo nga memoryahon ang 10 ka pahina nga script nga gamiton niya sa pagpasundayag atubangan sa gatusan ka laing mga estudyante ug magtutudlo. Makalisang kini nga tahas ni bisan kinsa, ilabi na kang Joselito, kinsa sagad nga mahadlok kon naa sa entablado.
“Mao nga ang una nakong gibuhat mao ang pag-ampo ug pagpangayo og giya,” miingon si Joselito. “Sa akong pag-ampo nangayo ko nga kon may makalimtan man ko nga bahin sa script, makapadayon lamang ako ug makahimo’g bag-ong mga pulong nga mohaum sa akong istorya. Human sa akong pag-ampo, akong nahinumduman ang paborito nakong kasulatan gikan sa Biblia sa Daang Tugon. Naa kini sa Mga Proverbio 3:6, nga nag-ingon, ‘Sa tanan nimong mga dalan ilha siya, ug siya magamando sa imong mga alagianan.’”
Gikulbaan si Joselito. Apan naningkamot gayud siya sa tibuok semana sa pagmemorya sa script. Ug nag-ampo siya kadaghan sa matag adlaw. Sa katapusan ang adlaw sa kontest miabut na.
Atol sa mga pagtimbaya sa pagbukas sa kontest, ginerbiyos pa gihapon si Joselito. “Apan atol sa pag-istorya maayo ra ako,” miingon siya. “Gibuhat lang nako ang akong pinakamaayo, ug nahibalo ko nga ang Dios motabang kanako. Nabalaka ko ug nahadlok tungod kay dunay daghan kaayong estudyante, apan gitubag sa Dios ang akong mga pag-ampo.”
Dili lamang kay nahinumduman ni Joselito ang script sa iyang istorya, apan napahigayon usab niya kini nga maayo kaayo nga na-first siya sa kontest. Miingon si Joselito, “Ang pag-ampo mao ang tubag kon walay usa sa palibut nga makahupay kanimo. Ang Dios kanunay anaa sa pagtabang kanimo.”
Ang Pag-ampo Makahatag og Kalig-on
Isip usa ka batan-ong lalaki nga nagtubo sa usa ka aktibo nga Santos sa Ulahing mga Adlaw nga pamilya, si Ken G. wala kaayoy problema sa paghupot og taas nga mga sumbanan. Apan sa dihang nagsugod na siya sa high school, nagkaanam og kalisud ang mga butang ug si Ken usahay mobati nga layo sa maayong impluwensya sa iyang pamilya—ilabi na kon naa sa eskwelahan.
“Ang akong mga higala sa high school suod kaayo kanako bisan og dili sila mga miyembro sa Simbahan,” miingon si Ken. “Suod gihapon kaayo kami. Ang problema kay nagsugod sila sa paghimo og mga butang nga wala masubay sa mga sumbanan sa atong Simbahan.”
Sa balay wala gayud magproblema si Ken sa pagpili sa matarung, apan miingon siya nga kon moabut siya sa eskwelahan ug wala na ang iyang pamilya nga nagtabang sa paggiya kaniya, makahimo siya og sayop nga mga pagpili. “Moangkon ko nga mibuhat ko og mga butang nga dili uyon sa mga sumbanan sa Simbahan, mao nga sa seminary akong gibati nga ako kanunay ang giigo sa leksyon.”
Didto naamguhan ni Ken nga gusto siyang mag-usab, apan gibati niyang dili paigo ang iyang kalig-on sa paghimo niini sa iyang kaugalingon. “Mao nga mihimo ko og desisyon nga mag-ampo sa Dios nga hatagan ko og kusog ug kaisug sa pagbalibad sa akong mga higala kon mohimo sila og dili maayong mga butang,” mipasabut siya. “Ug akong gibati nga gitubag sa Dios ang akong mga pag-ampo. Mas sayon na kanako ang pagbalibad sa matag higayon nga hangyoon ko sa akong mga higala sa paghimo og sayop o motintal kanako. Anaa na kanako ang kahibalo ug nasayud kon unsay husto ug sayop. Apan, pinaagi sa pag-ampo, akong gibati nga duna koy gahum ug gasa sa pagbalibad ug sa paghimo sa unsay matarung.”
Miingon si Ken nga ang pinakaimportanting butang nga iyang nakat-unan gumikan niini nga kasinatian mao nga “ang pag-ampo usa ka timailhan sa imong pagpaubos, tungod kay imong gidawat nga huyang ang imong kaugalingon ug nga ang Dios lamang ang makatabang kanimo nga mahimong lig-on” (tan-awa sa D&P 112:10).
Ang Pag-ampo Makahatag og mga Panalangin
Usahay nagkinahanglan kita og labaw pa kay sa kahupayan o kalig-on lamang; usahay mas gikinahanglan nato ang mga panalangin nga mahikap. Si Tania D. nahinumdom sa ingon niana nga panahon. Ang iyang pamilya nag-atubang og grabe nga pinansyal nga kalisud. “Sabado kadto sa gabii, ug duna lamang kami 40 ka pesos [mga US$1] nga nahibilin alang sa semana, ug wala kami ikapanihapon o bisan gani uling alang sa among stove sa balay,” miingon si Tania. “Gihatagan ko sa akong mama og lista sa tanan namong gikinahanglan, ug nagkinahanglan kami og 250 pesos aron mapalit ang tanan. Ang unang kinahanglan namong paliton mao ang uling aron makaluto og panihapon.” Nakita ni Tania nga walay igong kwarta alang sa tanan. Dayon naamguhan niya nga wala silay kwarta nga pamilete sa bus padulong sa simbahan inig ka ugma. “Giingnan nako si mama nga wala mi kwarta nga ikapamilite padulong sa simbahan. Apan matinud-anon kaayo ang akong mama, ug yano ra ko niyang giingnan nga ‘mohatag ra ang Dios.’
“Sa akong pagpadulong sa tindahan naghilak ko tungod kay wala mi igong kwarta alang sa tanang gikinahanglan, ug wala ko kahibalo unsay buhaton,” miingon si Tania. Samtang iyang gilukot ang usa ka 20 pesos nga papel ug gisulod sa iyang bulsa, gibuhat niya ang bugtong butang nga mao ray iyang nahunahunaan nga buhaton nga makatabang—nag-ampo siya. “Nag-ampo ko sa Langitnong Amahan nga unta makakita mi og paagi nga makakuha sa among mga gikinahanglan.”
Apan dihang miabut siya sa unang tindahan, nakita niya nga ang presyo sa uling misaka na gikan sa 5 ngadto sa 20 pesos. “Nagpanuko ko sa pagpalit niini,” miingon si Tania, “apan akong gibati nga naghunghong ang Espiritu Santo kanako nga paliton gihapon kadto, mao nga akong gipalit. Karon 20 pesos na lang ang nahibilin, apan daghan pa ko og palitunon, lakip sa mga diaper alang sa akong manghod ug limpyong tubig nga mainom. Mao nga miadto ko sa sunod nga tindahan sa pagpalit og pagkaon alang sa among panihapon, apan mahal kaayo kini. Mikuot ko sa akong bulsa diin didto nako gisulod ang 20 pesos nga papel, ug didto dunay lima ka tag 20-pesos nga linukot. Nagsugod ko sa paghilak atubangan sa tag-iya sa tindahan.
“Sa katapusan akong napalit ang tanan namong gikinahanglan,” miingon si Tania, “ug duna pa kami igong ikapamilite sa pag-adto sa simbahan pagka-ugma. Pag-uli nako sa balay, miadto ko sa akong kwarto ug mihalad og pag-ampo sa Dios sa pagpasalamat Kaniya sa panalangin nga Iyang gihatag kanamo. Nahibalo ko nga ang Dios buhi gayud ug motubag sa atong mga pag-ampo, ilabi na sa mga panahon nga ato gayud Siya nga gikinahanglan ug mohalad kita og usa ka tinuoray nga pag-ampo. Sa tinuoray motubag Siya niana nga pag-ampo.”
Ang Pag-ampo Makapaduol Nato Kanunay sa Atong Langitnong Amahan
Samtang sigurado kita nga maminaw ug motubag ang atong Langitnong Amahan sa atong mga pag-ampo, kinahanglan kitang mahinumdom nga ang atong mga pag-ampo dili kanunay nga matubag diha-diha dayon ug dili kanunay nga tubagon sa paagi nga maoy atong gusto. Tubagon ang atong mga pag-ampo sumala sa kabubut-on sa Dios ug sa hustong panahon.
Ang matag usa niini nga mga batan-on nga gikan sa isla sa Cebu sa Pilipinas nakakat-on nga sa maayo ug sa dautang mga panahon, bisan naa man kita sa daghang mga tawo o nag-inusara, bisan kon taob man o hunas, anaa kanunay ang atong Langitnong Amahan alang kanato. Ug kon modangop kita Kaniya pinaagi sa tinuoray nga pag-ampo, andam Siya kanunay sa pagpanalangin kanato.
Gikan sa wala: Sila si Joselito, Joahnna, Rosa, ug Ken nagpundok atubangan sa Cebu City Philippines Temple.
Sa wala: gilitratohan ni Edwin Redrino; sa tuo: litrato © iStockphoto.com/Hector Joseph Lumang