Public Affairs: Nagdugtong sa Simbahan ug Komunidad
Samtang ang mga lider sa priesthood nakigtrabaho uban sa stake ug district public affairs councils, silang tanan makatabang sa paglig-on sa ilang mga komunidad—ug pagtukod sa gingharian sa Dios dinhi sa yuta.
Sa dihang si Carol Witt Christensen gitawag nga moserbisyo isip public affairs director sa Topeka Kansas Stake, mibati siya og “kahadlok ug dili angay” nga makig-istorya sa mga reporter ug editor sa balita para sa mga lider sa stake.
“Ang pagduol sa mga tigbalita ingon og makahadlok,” siya mihinumdom. Ug bisan kon nag-major siya og English sa kolehiyo, siya miingon nga siya “dili kahibalo kon unsaon sa pagsulat og mga artikulo.”
Bisan sa iyang pagduha-duha sa iyang kaugalingon, si Sister Christensen mihukom nga mosalig sa iyang pagpamatuod, sa kapamilyar sa iyang komunidad, ug sa iyang pagtuo nga ang iyang calling gikan sa dinasig nga mga lider sa priesthood. Siya miingon nga siya nagsugod sa pagbansay gikan sa Public Affairs Department ug “nakakat-on sa [iyang] katungdanan, ug pagbuhat sa buhatan diin [siya] natudlo, diha sa tanan nga kakugi” (D&P 107:99).
Siya misugod sa pagbasa og maayo sa sinemana nga seksyon sa relihiyon sa iyang lokal nga newspaper aron sa pagtino unsa ang makahuluganon nga balita. Siya nanawag sa tigsulat sa relihiyon aron mahibaloan ang mga deadline sa dili pa niya isumiter ang iyang unang news release.
“Nakabantay ko sa gagmayng mga matang sa balita nga giimprinta ug misugod sa pag-focus sa mga kalihokan, mga tawo nga makapaikag, ug mga nabuhat diha sa simbahan nga angayang ipahibalo diha sa among newspaper,” siya mihinumdom.
Sa paglabay sa panahon, si Sister Christensen nakakat-on nga ang media relations sobra pa kay sa pagkuha lang og mga ideya para sa istorya. Kabahin usab kini sa pagpakisayud sa media ug pagtabang sa mga reporter sa pagbuhat sa ilang trabaho ug sa samang higayon nagtabang kanila nga makasabut sa Simbahan.
Human sa sunod-sunod nga mga kalampusan, lakip ang usa ka artikulo kabahin sa programa sa seminary sa stake nga mabasa sa lokal nga newspaper, miingon siya nga siya nakaangkon og pagsalig ug “mibati og dakong tinguha sa pagdala sa Simbahan ‘gikan sa kangitngit’” (tan-awa sa D&P 1:30). Karon, mga tuig ang milabay, si Sister Christensen nagserbisyo gihapon isip public affairs director sa iyang stake ug miingon nga “nagpadayon ang dakong tinguha.”
“Kadaghanan sa among gitinguha nga buhaton sa public affairs,” siya nagpasabut, “nagpakita nga kita nahigugma, nagtuo, ug nagsimba ni Jesukristo; makighigala, makig-alayon, ug magserbisyo sa atong mga kaigsoonan sa komunidad; ug ipabati sa katawhan ang gipahiuli nga ebanghelyo ug ang Simbahan.”
Ang mga lider sa priesthood sa tibuok kalibutan naggiya ug nag-awhag sa mga public affairs specialists ug councils samtang sila nagtinabangay niadtong anaa sa ilang dapit aron makabenepisyo ang ilang mga komunidad, makorihian ang sayop nga panghunahuna, ug maipakita nga ang mga miyembro sa Simbahan nagsunod ni Jesukristo.
Bisan kon ang mga nag-unang paningkamot ni Sister Christensen naka-focus sa media relations, aduna nay daghang mga paagi nga ang Church public affairs councils nagsunod sa dinasig nga direksyon sa priesthood samtang nagtabang usab sa pagtukod sa ilang mga komunidad ug sa gingharian sa Dios.
Mga Relasyon sa Komunidad ug Gobyerno
Mga 65 ka milya (105 km) gikan sa Topeka, sa Lenexa Kansas Stake, si Presidente Bruce F. Priday, stake president, ug Sister Carol Deshler, stake public affairs director, nagtinabangay sa pagtukod og positibong relasyon ngadto sa impluwensyal nga mga miyembro sa ilang komunidad. Gusto nilang ipaila kanila nga ang mga Santos sa Ulahing mga Adlaw “mga buotan nga silingan, usa ka positibo nga impluwensya sa komunidad, ug mga sumusunod ni Jesukristo,” miingon si Presidente Priday.
Si Sister Deshler, kinsa nakig-alayon sa stake presidency ug ubang mga sakop sa stake’s public affairs council, nangita og mga oportunidad nga makig-partner sa ubang mga grupo sa tinuohan ug organisasyon sa komunidad aron mas makaserbisyo sa mga katawhan sa ilang dapit.
“Hapit ang tanan namong mga kalampusan sa pakig-alayon sa mga grupo sa komunidad resulta sa tinagsa-tagsa nga mga pakigrelasyon,” miingon si Sister Deshler. Sama pananglit, usa ka miyembro sa laing tinuohan ug usa ka miyembro sa iyang stake nagdungan og paniudto ug naghisgot og mga pamaagi nga ang duha ka grupo magtinabangay sa pagbuhat og makaayo sa komunidad. Ang panag-istoryahayanay nakahimo sa unom ka tawo—tulo sa kada simbahan—nga moporma sa komite nga “Better Together” aron magtinabangay sa paghunahuna og ideya alang sa partnership.
Kana nga partnership nakahimo og usa ka benefit concert niadtong 2010 nga giapilan sa mga choir sa lain-laing simbahan. Aron makasulod kinahanglan nga magdala og usa ka bag nga mga grocery, nga ang nakabenepisyo mao ang usa ka lokal nga tipiganan sa pagkaon [food pantry]. Mga 700 ka mga tawo gikan sa komunidad mitambong sa kalihokan, nga gipahigayon sa bag-ong nahuman nga stake center. Usa ka resepsyon ang giorganisar aron ang mga lider sa komunidad ug relihiyon magkaistoryahanay sa dili pa magsugod ang concert.
Pagkahuman sa concert, upat pa ka simbahan, duha ka sakop sa city council, ug ang hepe sa kapulisan mihangyo nga marepresenteran sa komite sa Better Together, nga karon mag-miting na kada bulan. Ang concert nahitabo pag-usab niadtong 2011, nianang higayona laing simbahan ang nag-host, nga adunay pito ka mga simbahan ang miapil, ug mga 1,000 ka mga sakop sa komunidad ang mitambong.
“Ang maayo nga mga pagbati ug panaghiusa isip sumusunod ni Jesukristo nabati sa makahuluganong paagi tali sa mga simbahan,” miingon si Sister Deshler. Kadtong mga pagbati sa wala madugay naklaro sa dihang si Presidente Priday anaa sa airport kapin sa 1,000 ka milya (1,600 km) gikan sa panimalay. Usa ka babaye nga wala pa niya mahimamat miduol kaniya ug miingon nga siya nakaila kaniya sa benefit concert sa Better Together, diin siya miapil ug nakasinati nga kini talagsaon.
Siya miingon kaniya, “Sukad-sukad wala pa ako makabati og susama nga pagbati sa gugma alang sa uban diha sa among komunidad kaysa akong nasinati niini nga mga kalihokan. Salamat sa inyong pag-cosponsore niini nga mga concert. Miyembro ko sa laing kongregasyon, apan kami adunay halawum nga respeto ug pagdayeg sa Ang Simbahan ni Jesukristo sa mga Santos sa Ulahing mga Adlaw.”
“Kana,” miingon si Presidente Priday, “mao ang public affairs. Samtang kita nangita og mga paagi sa pagkab-ut sa atong mga tumong, kita nakakaplag og daghang espesyal nga mga higala sa komunidad. Kita adunay pagtahud sa mga pagtuo sa usag-usa ug tinuod nga gugma alang sa usag usa.”
Ang pagkab-ut sa ingon nga kooperasyon ug respeto gikan sa mga lider sa komunidad namatud-an nga epektibo usab sa Eastern Europe. Si Katia Serdyuk, director sa media relations sa Ukraine public affairs council, nakig-alayon sa mga public affairs missionaries ug sa lokal nga mga lider sa priesthood sa pagpalambo sa mga relasyon tali sa Simbahan ug komunidad. “Daghang mga tawo adunay sayop nga panghunahuna ug impormasyon kabahin sa Simbahan,” miingon si Sister Serdyuk. “Isip public affairs specialists nga nakig-alayon sa mga lider sa priesthood, kami naningkamot nga mausab kadto nga mga panghunahuna pinaagi sa pakig-alayon sa impluwensyadong mga lider, sa media, ug sa kinatibuk-ang publiko. Ang malampusong mga paningkamot sa public affairs makamugna og palibut diin ang impluwensyadong mga tawo makatabang sa Simbahan sa pagkab-ut sa mga tumong niini samtang kita usab nagtabang kanila nga makab-ut usab ang ilang mga tumong.”
Sa Zhytomyr, Ukraine, ang mga miyembro sa Simbahan miapil sa usa ka reception nga gipasiugdahan sa mayor sa siyudad, si Olexander Mikolayovich Bochkovskiy, sa pag-ila sa humanitarian project sa Simbahan nga nagsangkap sa gikinahanglan kaayo nga mga ekipo sa pito ka eskwelahan sa siyudad. Giila usab ang mga paningkamot sa pagserbisyo sa komunidad sa mga miyembro sa Simbahan sa siyudad sa Gagarin Park, nga gipahigayon niadtong Abril ug Oktubre 2011. Ang Zhytomyr Branch president, si Alexander Davydov mirepresentar sa Simbahan ug mipasalamat sa pagdayeg sa siyudad.
Pagplano sa Kalihokan
Dugang sa relasyon sa media ug komunidad, laing oportunidad alang sa public affairs magagikan sa pagplano ug pag-host sa mga kalihokan, miingon si Daniel ug Rebecca Mehr, kinsa bag-ohay lang nakakompleto og usa ka public affairs mission sa Caribbean Area.
“Ang pagpaapil sa mga miyembro sa pag-edukar sa ilang mga higala pinaagi sa mga kalihokan nga may komon nga tradisyon, sama sa cultural event, usa ka panihapon, usa ka proyekto sa pagserbisyo, o uban pang mga kalihokan, mahimong epektibo kaayo sa pakigrelasyon,” miingon si Sister Mehr.
Apan, si Brother Mehr nagpasidaan nga usa sa dakong sayop sa mga public affairs specialists mao ang “pagsugod sa pagplano sa mga kalihokan nga wala gikonsiderar ang mga panginahanglan sa komunidad ug wala makigtambag sa mga lider sa priesthood.”
Sila si Elder ug Sister Mehr nagtuo nga ang tinuig nga plano nga adunay direksyon sa mga lider sa priesthood diha sa stake ug ward mao ang usa ka paagi sa pagtabang sa paggiya sa pagplano sa kalihokan gikan sa sinugdanan. Sa paghimo og ingon nga tinuig nga plano, si Sister Mehr mirekomendar sa pagkoordinar sa mga kalihokan gamit ang upat ka lakang sa proseso sa pagplano nga naka-focus sa maayo kaayo nga resulta ug may kalabutan sa mga panginahanglan sa komunidad ug mga tumong sa lokal nga lider sa priesthood:
-
Unsa ang labing panginahanglan sa atong komunidad?
-
Unsa ang mga isyu sa atong dapit nga nakaapekto sa paglambo sa Simbahan, sa positibo ug negatibo nga mga paagi?
-
Si kinsa ang mga lider sa komunidad nga atong makauban sa pagtubag sa mga panginahanglan ug pagsulbad sa mga problema?
-
Unsaon nato sa pagsugod o pagpadayon og relasyon uban niini nga mga lider?
Kon kining mga pangutana matubag, ang mga lider sa priesthood ug ang public affairs councils makalikay sa pagmugna og “mga kalihokan aron lang nga may kalihokan,” miingon si Sister Mehr. Apan ang mga council makaplano ug makabuhat og mga kalihokan nga makamugna og pagsalig tali sa komunidad ug mga lider sa priesthood. Kini nga mga kalihokan makahatag usab sa mga miyembro sa Simbahan ug sa komunidad og oportunidad nga makaistorya ug magkahigalaay.
Sa Dominican Republic niadtong 2010, sama pananglit, ang mga lider sa priesthood, public affairs councils, ug mga miyembro sa komunidad nagtinabangay sa usa ka kalihokan nga nagpakita sa mga paningkamot sa Mormon Helping Hands. Sila si Brother ug Sister Mehr midapit sa pipila ka mga lider sa nasud nga ilang katrabaho.
“Daghang inila nga mga indibidwal nga nagrepresentar sa daghang mga institusyon ug organisasyon ang mitambong,” mihinumdom si Brother Mehr, nagdugang nga ang Area Presidency sa Simbahan mitambong usab.
“Ang kalihokan malampuson kaayo,” siya mireport. “Nagkadaghan, kami nakasinati nga ang mga mayor ug mga organisayon sa siyudad naghangyo sa atong panabang sa pagpanglimpyo. Dugang niini, adunay maayong pagpaila sa Simbahan ngadto sa daghang mga organisasyon.”
Samtang ang paglakip sa direksyon sa priesthod mahinungdanon kaayo sa kalampusan sa pagplano sa kalihokan, dili lang kini mao ang ikonsiderar. Si Kathy Marler nagserbisyo sa multistake public affairs council sa San Diego, California, USA. Usa sa iyang mga higala sa laing tinuohan miingon nga ang mga Santos sa Ulahing mga Adlaw maayo nga modapit sa uban ngadto sa mga kalihokan nga gipasiugdahan sa Simbahan apan kasagarang napakyas sa pakigtambayayong sa uban sa mga kalihokan sa laing mga simbahan.
Si Sister Marler nakahinumdon sa iyang higala miingon, “Mohangyo lamang kamo sa uban sa pagsunod. Mas maayo unta kon inyo kaming pangutan-on kon kami nagkinahanglan ba og tabang. Ang tubag kay klaro kaayo nga oo.”
Pinaagi sa pag-ila sa mga panginahanglan sa uban, miingon si Sister Marler, ang public affairs council usahay mas makatabang sa komunidad kay sa mismong pag-host sa kalihokan.
Komunikasyon ug Pagdumala panahon sa Emerhensya
Bisan tuod nga kadaghanan sa buhat sa public affairs mahitabo sa matag adlaw nga sitwasyon sa kinabuhi sa komunidad, kini usab makatabang sa pagpangandam sa usa ka stake, nasud, o dapit sa Simbahan sa pagdumala sa mga emerhensya, sama sa nahitabo sa miaging tuig sa Japan.
Sa dihang si Bishop Gary E. Stevenson, Presiding Bishop, Presidente kaniadto sa Asia North Area, nakita gayud niya sa unsa nga paagi ang 2011 nga linog nakausab sa kinaiya sa media. “Ang linog ug tsunami nakapa-focus sa mga tawo sa kalibutan ug sa tibuok Japan ngadto sa nagun-ob nga amihanang silangan nga baybayon sa Japan,” siya mihinumdom.
Si Bishop Stevenson miingon nga ang pagkagun-ob nakamugna og “taas kaayo nga lebel sa interes” sa humanitarian aid ug mga kalihokan sa bolunter nga gitanyag ngadto sa Japan, lakip niadtong gihatag sa Simbahan.
Pipila lang ka-adlaw human sa tsunami, ang Simbahan nagsugod sa pagtabang sa mga miyembro ug dili miyembro nga mga biktima. “Ang lokal ug internasyonal nga media misugod sa pagsunod sa matag panghitabo,” miingon si Bishop Stevenson.
Sa dihang ang Simbahan nagsangkap og 250 ka tonelada nga mga supply sa humanitarian aid ug nakatampo og 24,000 ka mga bolunter nga migahin og 180,000 ka mga oras sa pagserbisyo, ang lokal nga mga lider sa munisipyo nakamatikod sa mga paningkamot sa pagluwas, mihinumdom si Bishop Stevenson. Sa usa ka nasud diin dili moabut og dos porsyento ang populasyon nga Kristiyano, pipila niadto nga mga lider gustong mas masayud kabahin sa tahas sa Simbahan niini nga mga paningkamot. Kana nga kakuryuso, siya miingon, naghatag og oportunidad sa mga public affairs specialist dili lang sa pagtabang niadtong nanginahanglan pag-ayo apan sa pagpasabut usab. Sama pananglit, usa ka semana human nga miigo ang tsunami sa Japan, usa ka reporter ang misulat: “Ang bugtong butang nga susama kamaayo sa abilidad sa simbahan sa Mormon sa pagsangyaw sa pulong mao ang abilidad niini sa pagtabang panahon sa mga emerhensya. … Ang simabahan wala lang mag-focus sa iyang kaugalingon nga panon.”1
Kining positibo nga mga report nahimong posible tungod sa daghang mga tuig sa paglig-on sa mga relasyon. Sila si Conan ug Cindy Grames, kinsa nagsugod sa pagserbisyo isip mga representante sa public affairs alang sa Asia North Area niadtong Agosto 2010, miingon nga “ang public affairs council sa Japan naghago sulod sa daghang katuigan uban sa mahinungdanong mga lider sa gobyerno sa tibuok nasud. Kining panaghigalaay nakatabang kanila nga makig-alayon sa lokal nga mga ahensya, nga andam nang modawat sa atong tabang.” Si Elder Yasuo Niiyama, nagserbisyo uban sa iyang asawa isip director sa Japan public affairs council sa Simbahan, naghatag og gibug-aton nga “bisan ang ulohang gobyerno sa Japan nakasabut kon unsa ka epektibo ang Simbahan ug unsa kita kadali nga makasugod og hatag og tabang.”
Usa ka pananglitan diin ang mga Japanese lider nakadayeg sa pagtabang sa Simbahan sa eksaktong panahon mao kadtong panahon nga ang lokal nga mga lider sa priesthood miila sa usa ka puno kaayo nga refugee shelter sa usa ka eskwelahan diha sa hilit nga dapit. Uban sa public affairs council ug sa lokal nga welfare manager sa Simbahan, ang mga lider sa priesthood miandam og pagkaon ug ubang mga relief supplies nga ihatud ngadto sa shelter, nga adunay mga 270 nga mga biktima sa tsunami nga nawad-an og mga balay.
Bisan tuod kadtong anaa sa shelter sa sinugdanan nasurprisa nga nakadawat og hinabang gikan sa usa ka simbahan nga Kristiyano, sa ikaduhang higayon nga miabut ang mga bolunteer sa Mormon Helping Hands, nga nagsul-ob og yellow vest, usa ka bata ang misyagit, “Ania na sila! Naghunahuna ko unsa kaha ang ilang dala karon!”
Human nga madawat ang mga donasyon, ang shelter coordinator miingon ngadto nila ni Elder ug Sister Grames, “Ang inyong simbahan ang nakahatag kanamo sa unang karne ug preskong utanon nga among naangkon human sa linog.”
“Nindot kaayo ang akong gibati,” miingon si Sister Grames, “nga tinuorayng nagmatinabangon dili lang ngadto sa shelter apan ngadto usab sa mga lider sa priesthood kinsa naningkamot pag-ayo sa pagtabang niadtong nanginahanglan.”
Si Elder Niiyama nagpasabut og laing positibo nga resulta sa mga paningkamot sa council: “Among nahibaloan nga ang pagpakigbahin sa impormasyon sa buhat sa kahupayan sa Simbahan uban sa mga miyembro ingon man sa impluwensyadong mga lider mahinungdanon kaayo sa among tumong sa public affairs. Mibati ko nga ang dili miyembro sa Simbahan karon adunay mas maayo nga panabut sa Simbahan ug ang mga miyembro mas masaligon sa kalig-on sa Simbahan sa Japan.”
Ang Public Affairs isip Instrumento sa Pagpangulo sa Lokal nga Priesthood
Isip mahinungdanong bahin sa usa ka tibuok kalibutan nga organisasyon, ang mga lider sa priesthood makabenepisyo sa mga public affairs council nga nahibalo sa lokal nga palibut ug makatabang sa pagserbisyo sa mga panginahanglan sa komunidad. Si Sister Serdyuk, sa Ukraine, namahayag, “Magantihon nga makita unsa ka maayo ang mga lider sa priesthood midawat sa public affairs isip instrumento sa pagkab-ut sa ilang mga tumong sa priesthood. Usa niining ehemplo mao ang pagpahigayon og serbisyo sa komunidad pinaagi sa mga paningkamot sa Mormon Helping Hands, nga nakapalambo og panaghiusa tali sa mga miyembro sa branch ug ward ug nakatabang nga makaugmad og mas suod nga relasyon tali sa Simbahan ug sa lokal nga mga komunidad.”
Paghulagway sa litrato pinaagi ni David Stoker
Sulod sa duha ka tuig ang Lenexa Kansas Stake sa Estados Unidos nakig-partner sa ubang mga simbahan sa dapit sa pagpahigayon og benefit concert. Ang gasto aron makasulod—usa ka bag sa mga grocery—nga gidonar ngadto sa usa ka lokal nga tipiganan og pagkaon. Niadtong 2011, mga 1,000 ka mga miyembro sa komunidad mitambong, lakip sa pipila ka mga opisyales sa simbahan ug gobyerno.
Gilitratohan ni Carol Deshler
Human sa linog niadtong 2011 sa Japan, ang mga lider sa priesthood nakig-alayon uban sa mga public affairs specialist sa pagdala sa mga paningkamot sa pagluwas pinaagi sa programa sa Mormon Helping Hands. Niining humanitarian nga mga paningkamot, usa ka reporter ang misulat: “Ang bugtong butang nga susama kamaayo sa abilidad sa simbahan sa Mormon sa pagsangyaw sa pulong mao ang abilidad niini sa pagtabang panahon sa mga emerhensya.
Gilitratohan ni Conan Grames