Kini nga Teksto Hebreohanon

Derk Palfreyman, Utah, USA

Human og basa sa Daang Tugon pipila na ka tuig ang milabay, nakaangkon ko og interes sa mga pagtulun-an niini, ilabi na sa mga sinulat ni Isaias, ug nagpadayon sa pagtuon niini. Niadtong 2010, nakatupad nako diha sa eroplano ang usa ka Jewish rabbi. Gisugdan nako ang panag-istoryahanay pinaagi sa pagpangutana kaniya kabahin sa pipila ka mga bersikulo sa Isaias. Sa nagpadayon ang among panag-istoryahanay, among nahisgutan ang kaimportante sa awtoridad sa priesthood sama sa masabtan diha sa Daang Tugon.

Ang rabbi nangutana kanako kon asa ang mga miyembro sa simbahan nakakuha sa ilang awtoridad sa priesthood. Gipahimudsan nako ang panahon pinaagi sa pag-istorya kaniya kabahin sa Unang Panan-awon ni Joseph Smith ug ang pagpahiuli sa Aaronic ug Melchizedek Priesthood. Among nahisgutan ang paghubad sa Basahon ni Mormon ug ang mga katuyoan niini isip “Lain nga Tugon ni Jesukristo.”

Ang rabbi nakuryuso. Siya nangutana kon pila ang edad ni Joseph sa dihang iyang nadawat ang Unang Panan-awon. Sa dihang ako siyang giingnan nga si Joseph 14 anyos, susama og edad ni Samuel diha sa Daang Tugon, siya mitubag nga daghang mga propeta ang gitawag sa dihang batan-on pa sila. Siya miingon nga kini nahisubay lang nga ang Dios motawag ni Joseph sa batan-on pa.

Giablihan nako ang akong mga kasulatan, ug kaming duha nagbasa sa mga pagpamatuod sa Tulo ug Walo ka mga Saksi. Giingnan nako siya nga ang pipila sa mga saksi mibiya sa Simbahan apan walay usa ang milimud nga nakita ang bulawang mga palid.

“Nganong nakaako sila sa pagbiya sa Simbahan human makakita sa anghel ug sa mga palid?” siya nangutana.

“Nakahinumdom ko nga ang mga anak sa Israel naghimo og bulawang baka sa mubong panahon human nakasaksi sa pagtunga sa Pulang Dagat,” mitubag ko.

Iyang gipakli ang 1 Nephi ug misugod sa pagbasa. Siya mihunong ug miingon, “Kini nga teksto Hebreohanon.”

Dayon iyang gipasabut nganong ang text ingon og Iningles nga hubad gikan sa Hebreohanon. Giingnan nako siya nga ang basahon sinulat sa usa ka tribo sa Israel. Gikutlo nako ang Ezequiel 37:15–20, nga naghisgut sa sungkod [stick] ni Juda ug sungkod ni Jose. Kami nagkauyon nga ang sungkod ni Juda nagrepresentar sa Biblia, ug akong gipasabut nga ang sungkod ni Jose mao ang Basahon ni Mormon.

Human sa among tulo ka oras nga panag-istoryahanay ang rabbi mipahayag og interes nga makaangkon og kopya sa Basahon ni Mormon. Sa akong pag-uli, gipadalhan nako siya og personalized nga kopya nga may sinulat nako nga pagpamatuod. Mapasalamaton ko nga ang akong mga paningkamot sa pagtuon sa Daang Tugon nakaandam kanako sa paghisgot sa mga kasulatan ug pagpakigbahin sa akong pagpamatuod ngadto sa akong bag-ong higala, usa ka rabbi.