Mga Ideya sa Family Home Evening
Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.
“Ang Kalig-on sa Atong Panulundon,” pahina 16: Basaha ang artikulo uban sa inyong pamilya. Hatagi og gibug-aton ang pahayag ni Elder L. Tom Perry: Sama nga ang mga pioneer mipalambo pag-ayo sa disyerto sama sa rosas, mao usab ang atong mga kinabuhi ug pamilya mahimong molambo kon atong sundon ang ilang ehemplo ug mosunod sa ilang mga tradisyon. Ikonsiderar sa pagpangutana kon sa unsang paagi ang inyong pamilya mas makasunod sa ehemplo nga gipakita sa mga pioneer. Mahimo ninyong tapuson pinaagi sa pagkanta “Dali, Dali, Kamo mga Santos” (Mga Himno ug mga Awit sa mga Bata, nu. 2).
“Pag-atubang sa Umaabut nga may Paglaum,” pahina 35: Mahimo ninyong i-summarize ang istorya ni Brother Grilo o mosaysay og personal nga istorya kon sa unsang paagi kamo o ang inyong kaila miatubang sa umaabut nga may paglaum. Tabangi ang mga sakop sa pamilya nga magamit ang mensahe sa ilang kinabuhi pinaagi sa pagpangutana: “Unsa ang mga hagit nga nakapalisud kaninyo sa pagbaton og pagtuo sa umaabot? Unsa ang inyong mahimo aron magmapositibo samtang kamo nag-atubang niining mga hagit?” Ikonsiderar sa pagtapos pinaagi sa pagbasa sa katapusang duha ka mga paragraph sa artikulo.
“Unsa ang Lunsay nga Pagpamatuod?” pahina 54: Sugdi ang inyong leksyon pinaagi sa pagpakigbahin, unsa ang pagpamatuod nga gitudlo sa artikulo. Dayon ikonsiderar ang pag-summarize sa mga pangutana kabahin sa pagpamatuod (tan-awa sa mga pahina 56–57). Kon dasigon, pagdapit og sakop sa pamilya sa pagpamatuod atol sa family home evening o sa pagsulat sa ilang pagpamatuod diha sa ilang journal.
“Usa ka Hunghong sa Kamabination,” pahina 59: Basaha ang Lucas 6:27. Dayon ipakigbahin ang istorya nila ni James ug Carson, mohunong og kadiyot aron sa pagpangutana sa mga pangutana nga makita sa ubos sa unang pahina. Awhaga ang mga sakop sa pamilya nga magmabination ngadto sa uban.
“Gawas sa Balay” nga mga Family Home Evening
Sa dihang 10 anyos ko, nabunyagan ko uban sa akong mga ginikanan ug mga igsoon. Malipayon kaayo ko nga nagtubo nga adunay regular nga family home evening. Ang family home evening mao ang kasingkasing sa among pamilya.
Namiyembro ko sa Simbahan sobra na sa 45 ka tuig. Uban sa akong lima ka anak, ang tradisyon nagpadayon. Ang Lunes sa gabii gireserba alang sa pamilya.
Sa katapusang Lunes sa bulan, kami adunay mas taas nga kalihokan nga gitawag og “gawas sa balay” nga family home evening. Kami manan-aw og sine, mobisita og masakiton, magdula sa parke, mobisita nila ni Lola ug Lolo (among mga apohan) ug daghan pa.
Ang dili nako makalimtan nga kasinatian mao kadtong giserbisyohan namo ang mga bata diha sa kalsada. Dili namo mapahayag ang hingpit nga kalipay nga among nabati sa pagtabang niadtong nanginahanglan. Kami misulay, sa among gamay nga paagi, sa pagpalipay niadtong mga bata ug sa pagpahibalo kanila nga adunay nabalaka kanila ug kitang tanan mga anak sa Dios.
Tita Mabunga Obial, Philippines