Linda S. Reeves
Ikaduhang Magtatambag sa Kinatibuk-ang Kapangulohan sa Relief Society
Nakat-unan ni Linda Sheffield Reeves sa iyang kabatan-on gikan sa lig-on, kinabig nga mama ang pagduol sa Dios panahon sa kalisdanan ug paningkamutan ang pinakamaayo sumala sa gitudlo sa iyang amahan.
“Sayo ko nga nakabaton og lig-ong pagpamatuod tungod sa mga hagit nga nakatabang sa dali nakong pagkahingkod sa espirituhanon,” miingon siya.
Natawo si Sister Reeves sa Los Angeles, California, USA, niadtong Agosto 1951 kang Elbert Jolley ug Barbara Welsch Sheffield. Nahinumduman niyang nagtan-aw sa daghang bitoon nga kalangitan pagka-13 anyos sa Young Women camp ug mihalad ug yano, kinasingkasing nga pag-ampo: “Amahan, Ikaw naa ba diha?”
“Gilibutan ako sa Iyang Espiritu, sa kahibalo sa Iyang presensya ug katinuod, ug sa Iyang gugma kanako,” miingon siya.
Nahimamat ni Sister Reeves si Melvyn Kemp Reeves sa iyang ward sa Pasadena. Nag-date sila samtang nag-eskwela sa Brigham Young University human sa iyang misyon. Naminyo sila niadtong Hunyo 1973 sa Templo sa Los Angeles California ug nahimong ginikanan sa 13 ka anak.
Bisan sa mga pagsulay, si Sister Reeves lig-on sa iyang pagpamatuod sa Pag-ula, ilabi na dihang namatay ang 17 anyos niyang anak nga babaye, si Emily Michelle, sa usa ka disgrasya niadtong 2005.
“Ang kalisdanan usa ka maayong magtutudlo,” miingon siya. “Mopalig-on kanato ang kalisdanan ug mag-andam alang sa umaabut nga pagserbisyo sa gingharian, sa panimalay, ug sa komunidad, ug sa pagka-instrumento sa mga kamot sa Dios.”
Sa wala pa siya tawga ngadto sa kinatibuk-ang kapangulohan sa Relief Society, kauban nga miserbisyo si Sister Reeves dihang nangulo ang iyang bana sa California Riverside Mission sugod 2008 hangtud 2011. Miserbisyo siya isip presidente sa Relief Society sa stake, presidente sa Young Women sa ward, chorister sa Primary, ug magtutudlo sa Sunday School.
Migradwar si Sister Reeves sa BYU niadtong 1974 nga may degree nga special education. Daghan siya og ganahan, lakip sa art, musika, pagpanglitrato, family history, ug misyonaryo nga buhat. Walay kahadlok nga mopagawas sa hunahuna, ilabi na sa pagpakigbahin sa ebanghelyo ni Jesukristo sa tanan nga iyang ikahimamat.