Elder Larry Echo Hawk
Sa Seventy
Sukad niadtong adlawa sa 1972, sa dihang si Elder Larry Echo Hawk nakadungog ni Elder Spencer W. Kimball (1895–1985) namulong nga naglantaw sa mga Native Americans isip edukadong mga lider, iyang gipahinungod ang iyang kinabuhi sa “pagbayaw sa katawhan.”
Usa ka miyembro sa Pawnee Nation, si Elder Echo Hawk natawo sa Cody, Wyoming, USA, niadtong Agosto 1948 ngadto nila ni Ernest ug Jane Echo Hawk. Siya nagdako sa Farmington, New Mexico, USA, diin siya ug ang iyang pamilya gitudloan ug gibunyagan sa LDS nga mga misyonaryo niadtong 1962.
Sa edad nga 17, human maigo ang iyang mata sa baseball, siya misaad sa Ginoo nga kon dili siya mabuta, siya mobasa sa Basahon ni Mormon. Naayo ang iyang mata ug nagbasa og 10 ka pahina kada adlaw hapit sa tulo ka bulan.
“Kadto mao ang pinaka espiritwal nakong kasinatian, sa dihang ang Espiritu Santo mipamatuod kanako nga ang Basahon ni Mormon tinuod,” miingon si Elder Echo Hawk. “Kana nga kasinatian nakadasig kanako pag-ayo nga molambo sa tibuok nakong kinabuhi.”
Siya nakaeskwela sa Brigham Young University–Provo tungod sa pagka-eskolar sa football ug nakaangkon og mga degree sa physical education ug zoology. Niadtong 1970 gipagawas siya nga madungganon sa United States Marine Corps human sa duha ka tuig nga pagserbisyo. Siya migradwar sa University of Utah nga may juris doctorate degree niadtong 1973.
Si Elder Echo Hawk nakaserbisyo isip abogado, state legislator, state attorney general, usa ka propesor sa BYU law, ug Assistant Secretary of the Department of the Interior for Indian Affairs—mo-resign siya niini nga posisyon sa pagdawat sa calling sa Unang Korum sa Seventy.
Si Elder Kimball ang mipahigayon sa kaminyoon nila ni Elder Echo Hawk ug sa iyang asawa, si Terry Pries, sa Templo sa Salt Lake niadtong Disyembre 1968. Ang iyang asawa anaa sa iyang kiliran samtang siya nagserbisyo isip magtutudlo, bishop, high councilor, ug stake president. Sila ginikanan sa unom ka mga anak.