Mga Training Meeting sa Auxilliary diha sa Internet sa Iningles ug Spanish
Aron matabangan ang mga lider sa ilang pangatungdanan ug sa pagpaila sa kapanguhaang mga materyal nga magamit alang sa auxiliary leadership training, ang kinatibuk-ang kapangulohan sa upat ka mga auxilliary sa Simbahan mihimo og training alang sa mga lider sa auxilliary sa stake ug ward sa katapusan sa Marso. (Ang training alang sa mga lider sa Young Men himoon karong Mayo 10). Ang webcasts, sa linawas ug sa internet, gihimo o himoon alang sa tanang lima ka auxilliary sa Iningles ug Spanish. Usa ka summary sa upat ka sesyon sa training nga gihimo niadtong Marso ibutang dinhi alang sa dili maka-akses niini.
Primary
Ang tuyo sa Primary mao ang pagtabang sa mga bata ngadto sa dalan sa pagkakabig, miingon si Rosemary M. Wixom, kinatibuk-ang presidente sa Primary, atol sa auxiliary training alang sa mga lider sa Primary niadtong Marso 28 ug 29.
“Gusto namo nga ang [mga bata sa Primary] mobati, mohigugma, molihok,” miingon siya. “Gusto namong makabaton sila og pagpamatuod. … Ang pagpamatuod nagpasabut nga mao ang pagpamahayag. Gusto kaming mosaka pa og usa ka ang-ang. Ang pagkakabig nagpasabut sa paglihok. Gusto namo nga ang mga bata makabaton ug mobati sa binhi sa pagkakabig sa ilang kinabuhi.”
Sila si Sister Wixom ug iyang mga magtatambag, si Jean A. Stevens ug Cheryl A. Esplin, misulti sa mga lider sa Primary sa ward ug stake nga sila mahimong moabag sa mga ginikanan sa pagtanom niana nga mga binhi sa pagkakabig. Miingon si Sister Wixom nga ang proseso sa pagkakabig magsugod sa bata pa. “Mas maayo nga masugdan kini sa panimalay, diin ang mga ginikanan mohigugma sa Ginoo sa tibuok nilang kasingkasing, kalag, ug kusog. Ug dayon tudloan nila ang ilang mga anak.”
Miingon siya nga makasabut lamang ang mga bata unsay ipasabut sa pagkakabig “kon mogahin kita og panahon sa pagtudlo kanila.” Ug, niya pa, kon ang mga ginikanan ug lider sa Primary dili motudlo kanila, “ang kalibutan moy motudlo.”
Ang mga sakop sa Primary general board mipakita usab unsaon sa paggamit ang musika sa pagtudlo sa mga baruganan sa ebanghelyo sa mga kapanguhaan sa mga lider sa Primary diha sa LDS.org.
Relief Society
“Nangulo kamo og talagsaong buluhaton!” Si Julie B. Beck, nga na-release isip kinatibuk-ang presidente sa Relief Society sa sesyon sa Sabado sa hapon sa komperensya, miingon sa mga lider sa Relief Society atol sa auxiliary training session niadtong Marso 27 ug 28. “Kini ang buhat sa Ginoo.… Duna kitay mahinungdanon kaayong responsibilidad.”
Daghan og gihisgutan si Sister Beck, lakip ang katuyoan sa Relief Society, sa importanting tahas sa kababayen-an diha sa ilang pamilya, sa pagtudlo (labi na sa bag-ong mga sister sa Simbahan), pagtrabaho sa komunidad, ug sa mga baruganan sa pagpangulo.
Buhata ang mahinungdanon, miingon si Sister Beck. “Yano kini nga buhat, unya ang Ginoo mo-focus ra sa mga ideya. Kon mahulagway nato unsay angay buhaton, Iya kitang tabangan nga maimplementar ang gipadayag. Makadawat kita og pagpadayag samtang nagpadayon kita.”
Sa tanan nilang pagpanudlo, ang kapangulohan ug ang sakop sa Relief Society general board nag-focus sa pagpangita sa tubag diha sa Handbook 2: Administering the Church ingon man diha sa Anak nga mga Babaye sa Akong Gingharian: Ang Kasaysayan ug Buhat sa Relief Society.
Sunday School
Ang Leadership Training Library, mao ang bag-o nga bahin diha sa LDS.org, mao ang gi-focus gayud sa miting sa Sunday School auxiliary leadership training nga gihimo niadtong Marso 28.
Ang mga porsyon sa lain-laing mga video clip gikan sa library gipakita aron makasuporta sa diskusyon nga gi-outline ni Russell T. Osguthorpe, kinatibuk-ang presidente sa Sunday School, isip upat ka mahinungdanong hilisgutan diha sa miting:
-
Ang tahas sa lider sa Sunday School sa ward o stake.
-
Unsaon pagtabang sa uban nga makasabut sa tahas sa kapangulohan sa Sunday School sa pagpalambo sa pagpanudlo sa tanang organisasyon sa ward ug stake.
-
Unsaon sa pagtinambagay nga mas epektibo isip kapangulohan.
-
Unsaon sa pag-orient ang mga magtutudlo ug paghatag og padayon nga suporta.
“Sa Leadership Training Library, inyong makita, nga usa kini sa pinaka-importating himan sa pagtabang nga mabansay ang mga sakop sa ubang auxiliary ug Sunday School sa ilang mga responsibilidad,” miingon si David M. McConkie, unang magtatambag sa kinatibuk-ang kapangulohan sa Sunday School. “Ang library gihimo sa tanang auxiliary sa Simbahan, sa mga sakop sa Seventy, [ug] sa mga sakop sa Korum sa Napulog Duha ka mga Apostoles. Proyekto kini nga gihimo sulod sa daghang tuig, ug miabut na sa daghang mga dapit.”
Ang library ma-akses diha sa LDS.org pinaagi sa pagklik sa Menu diha sa home page ug dayon i-klik ang Leadership Training Library nga link sa Service nga kolum.
Young Women
“Ang mga sumbanan wala mausab, apan ang kalibutan nausab,” miingon si Elaine S. Dalton, kinatibuk-ang presidente sa Young Women, atol sa mga miting sa Young Women auxiliary training niadtong Marso 27 ug 28. Giawhag niya ang mga lider sa “pag-usab sa kalibutan” pinaagi sa pagkamaayong ehemplo sa pagpuyo og mahiyason nga kinabuhi.
“Ang inyong mga calling dili sulagma lamang,” miingon siya. “Ang inyong pamustura, panamit, ug pahiyom makaapekto sa batan-ong mga babaye … ang pagpakig-uban kanila ug pagtudlo sa kalipay sa pagkahimong usa ka babaye ug sa pagkinabuhi sa ebanghelyo. … Kinahanglan nga tarung ang atong sininaan. Kinahanglan nga magmabinantayon kita. Kinahanglan nga magtudlo kita pinaagi sa ehemplo ug dakong gugma.”
Ang mga magtatambag sa kinatibuk-ang kapangulohan sa Young Women, Mary N. Cook ug Ann M. Dibb, namulong sa importansya nga “makapangulo ang mga Laurel.” Ang mga magtatambag migamit sa Young Women camp—nga nagsaulog sa ika-100 nga anibersaryo ning tuiga—isip ehemplo sa usa ka oportunidad nga makapangulo ang mga Laurel, apan miingon nga dunay padayong oportunidad alang sa mga lider sa pag-apud-apod sa mga responsibilidad, sa pagpaapil sa batan-ong mga babaye.
Ang mga nagpresentar mi-focus usab sa daghang kapanguhaan—mga website, artikulo, video, manwal, ug sa giusab nga bersyon sa Alang sa Kalig-on sa mga Kabatan-onan —nga magamit sa mga lider sa pagpangita og mga ideya ug tabang.
Ang Leadership Training Library usa sa mga focus sa miting sa Sunday School auxiliary leadership training nga gihimo niadtong Marso 28. Ang Sunday School, Primary, Relief Society, ug mga organisasyon sa Young Women tanan mipahigayon og linawas nga mga sesyon sa pagbansay ug pinaagi sab sa Internet sa wala pa ang kinatibuk-ang komperensya sa Abril. Ang organisasyon sa Young Men mohimo sa ilang training karong Mayo 10.