Carole M. Stephens
Unang Magtatambag sa Kinatibuk-ang Kapanguloahn sa Relief Society
Si Carole Manzel Stephens nagtahud kanunay sa sagrado ug balaang mga butang. Kana nga pagtahud nagsugod sa gamay pa siya, dihang na-seal ang iyang pamilya sa templo human nakabig ang iyang mama sa ebanghelyo.
“Wala ko kasabut sa tanang nanghitabo,” miingon ang bag-ong magtatambag sa kinatibuk-ang kapangulohan sa Relief Society. “Apan nahibalo ko nga espesyal kini. Dako na ako sa paghinumdom nga ang templo sagrado nga dapit.”
Natawo pagka Marso 1957 kang Carl L. ug Forest Manzel, si Sister Stephens ang ikatulo sa siyam ka anak ug nagtubo sa Ogden, Utah, USA. Lab-as sa iyang panumduman ang ehemplo sa iyang mga ginikanan sa pagserbisyo, sakripisyo, ug unsay kahulugan nga unahon gayud ang pamilya ug ang Simbahan.
“Ang ebanghelyo mao gayud ang tanan alang kanila, ug ilang gipakita kanamo ang ehemplo kon unsa ang sama kang Kristo nga pagserbisyo,” miingon siya. “Gitudlo nila kon unsay ipasabut sa pagserbisyo—unsaon gayud sa pagserbisyo.”
Samtang nagserbisyo ang iyang ginikanan sa lain-laing kapasidad, ilakip nila ang ilang mga anak. Kadto ang panahon nga napalambo nila ang paghigalaay sa usag usa—butang nga gipaningkamutan niya ug ni Martin “Marty” Stephens, iyang bana, nga mahimo ngadto sa ilang unom ka anak.
Siya ug si Marty nagkita samtang nag-eskwela sa Weber State University sa Ogden, Utah, diin nagtuon siya og early childhood education. Naminyo sila niadtong Abril 1976 sa Templo sa Logan Utah. Miingon si Sister Stephens nga siya ug iyang bana talagsaong “mangkasangga” sulod sa katuigan kay nagsinuportahay sila sa lain-laing buluhaton, lakip sa iyang mga calling isip Relief Society president sa ward ug sa stake, magtatambag, ug magtutudlo; presidente sa Young Women; magtatambag sa Primary sa ward, magtutudlo, ug lider sa Cub Scout; magtutudlo sa seminary; ug Church-service missionary.
“Bisan sa ka-busy, among nakaplagan ang hingpit nga kalipay,” miingon siya. “Among gilakip among mga anak ug mga apo sa among pagserbisyo. Tungod niana, among napalambo ang lig-ong relasyon sa pamilya samtang nag-inalagaray kami.”