Elder Stanley G. Ellis
Sa Seventy
Si Elder Stanley Gareld Ellis nasayud nga walay makapamatuod sa pagka-anaa sa Dios sa siyentipekong paagi, apan sa Harvard University iyang nakat-unan nga iyang mapamatud-an nga adunay Dios pinaagi sa pagsulay sa Iyang mga saad. Tunga-tunga sa iyang unang tuig sa eskwela, nahutdan siya og kwarta ug nagtrabaho aron makabayad sa iyang mga galastuhan. Bisan siya nagduha-duha nga makabayad sa ikapulo ug mataplan ang kulang, siya mihukom nga “sulayan” ang Ginoo (tan-awa sa Malaquias 3:10).
“Gibayaran nako og una ang ikapulo, ug adunay milagro,” miingon si Elder Ellis, bag-ohay lang nga gitawag gikan sa Ikaduhang Korum sa Seventy ngadto sa Unang Korum. “Nakalahutay ra ko hangtud sa sunod sweldo. Ug kana mahitabo matag duha ka semana sa tibuok semester. Pinaagi sa pagsulay sa Ginoo, nalig-on ang akong pagpamatuod nga Siya tinuod ug Iyang tumanon ang Iyang mga saad.”
Si Elder Ellis natawo ngadto nila ni Stephen ug Hazel Ellis niadtong Enero 1947 sa Burley, Idaho, USA, ug nagdako sa umahan ug ranso. Human sa usa ka tuig sa Harvard siya nagserbisyo sa Brazilian Mission gikan 1966 hangtud 1968. Sa iyang pagbalik, giminyoan niya si Kathryn Kloepfer niadtong Hunyo 1969 sa Templo sa Los Angeles California. Sila ginikanan sa siyam ka mga anak.
Human sa iyang paggradwar sa Harvard, diin iyang naangkon ang bachelor’s degree sa government, iyang naangkon ang law degree gikan sa Brigham Young University. Si Elder Ellis nagtrabaho sa tax planning ug nahimong chief executive officer sa usa ka financial consulting company.
Sa wala pa iyang calling sa Unang Korum sa Seventy, si Elder Ellis nagserbisyo sa kapangulohan sa North America Southwest Area, Brazil North Area, Brazil Area, ug sa Boundary and Leadership Change Committee. Gikan 1999 hangtud 2002 siya nagserbisyo isip presidente sa Brazil São Paulo North Mission. Siya nakaserbisyo usab isip stake president, magtatambag sa stake presidency, high councilor, magtatambag sa bishopric, presidente sa elders quorum, ug presidente sa ward ug stake Young Men.