Akong Gibati nga Kinahanglan Kong Moadto
Aldo Fabio Moracca, Nevada, USA
Duha og tunga ka tuig human sa akong bunyag didto sa Buenos Aires, Argentina, ang mga pulong sa usa ka mga elder nga mitudlo kanako sa gihapon akong madungog: “Nahibalo ko nga ikaw usa ka misyonaryo.” Usab akong nahinumduman ang puno sa gahum nga tubag nga akong nadawat dihang nag-ampo ko kon ang pagbati nga mitisok sa akong kasingkasing tinuod ba gayud. Sa edad nga 20, nahibalo ko nga kinahanglan kong mangandam alang sa misyon.
Apan unsaon man nako sa pagkahimong misyonaryo? Dili ako sama sa daw anghel nga batan-ong mga lalaki kinsa mitudlo kanako sa ebanghelyo. Ug unsaon man nako pagbiya ang akong trabaho? Asa man ko puyo inig pauli nako? Lisud kaayo ang pagpangita sa dapit nga akong gipuy-an, bisan tuod og gamay ra kini nga kwarto luyo sa laing balay.
Sa akong pagpauli usa ka gabii, kini nga mga pagbati ug mga pagduha-duha naa na sab sa akong hunahuna. Dihang miabut ko, akong gisulayan ang paghimo og desisyon. Mihukom ko nga moluhod ug mohalad sa pag-ampo alang sa tabang. Sa akong pagbuhat niini, duna koy kusog nga impresyon nga kinahanglan kong makigkita ni Leandro, usa ka higala nga naghatag nakog kalig-on sa mga panahon sa kasubo.
Apan ang pagpamata kaniya sa tungang gabii mipugong sa akong hunahuna. Nahibalo ko nga momata siya og sayo aron motrabaho, ug dili ko mosulay sa pagpanuktok sa pultahan nianang orasa. Nanlimbasug ko batok niana nga hunahuna apan padayon ang pagbati sa impresyon sa pakigkita kaniya. Sa gihapon, gipili nakong ibaliwala kini.
Hinoon, mihukom kong maglakaw-lakaw sa eskina alang sa preskong hangin. Dihang akong nahinumduman nga nabiyaan nakong abli ang pultahan, milakaw ko pauli. Sa akong pagsulod, akong nakita si Leandro nga naglingkod sa akong kwarto. Ang Espiritu mikunsad kanako, ug daw dili ko kaginhawa. Uban sa tingog nga daw natuk-an tungod sa emosyon, nangutana ko niya, “Unsay imong gibuhat dinhi?”
“Wala ko kahibalo,” miingon siya. “Gibati lamang nako nga kinahanglan kong makigkita nimo.”
Gisultihan nako siya mahitungod sa akong mga pagduha-duha mahitungod sa pagmisyon. Mihatag siya sa iyang pagpamatuod ngari kanako ug miawhag kanako. Dayon gitabangan ko niya sa pagkompleto sa akong mga papeles sa misyon, nga akong gihatag sa akong bishop sa pagkasunod nga adlaw. Duha ka bulan human niadto akong nadawat ang akong tawag ngadto sa Argentina Salta Mission.
Nahibalo ko nga ang akong higala mao ang instrumento sa mga kamot sa Ginoo nianang gabhiona, ug sa tibuok nakong kasingkasing nahibalo ko nga ang Langitnong Amahan maminaw ug motubag sa mga pag-ampo nga gipamulong uban sa sinsero nga kasingkasing ug sa tinuoray nga katuyoan.