Kauban nga Mag-istoryahanay
Ania ang pipila ka mga sugyot sa pagpahigayon og “panahon sa pag-istoryahanay” sa inyong pamilya.
-
Hangyoa ang inyong ginikanan sa paggahin og pipila ka minuto matag adlaw nga mag-istoryahanay ang inyong pamilya. Kini mahimong atol sa pagpangaon o sa piho nga oras sa adlaw.
-
Siguradoa nga ang tanan makapuli-puli sa pag-istorya ug pagpaminaw. Ang tanan iapil!
-
Pagmatinahuron sa mga opinyon sa mga sakop sa pamilya. Siguradoa nga ang tanan mobati nga ang iyang gisulti importante.
Mga Dula sa Pag-istoryahanay
Nanginahanglan og pipila ka mga ideya alang sa panahon sa pag-istoryahanay? Sulayi kini nga mga dula:
Beanbag Toss: Kon ang inyong pamilya daghang sakop o naglisud sa pagpuli-puli, gamit og beanbag aron mahibaloan kon kinsang turno nga mosulti. Human og sulti sa tawo nga may beanbag, ipasa ang beanbag sa laing sakop sa pamilya aron siya may higayon nga makasulti.
Tig-interbyu: Pagtinagurha ug pagpuli-puli nga magpakaaron-ingnon nga mga tig-interbyu. Paghunahuna og pipila ka mga pangutana alang sa inyong paris ug dayon pangutan-a siya. Gani mahimo kamong mogamit og tinuod nga mikropono o sound recorder alang sa mga interbyu.
Unsa ang Inyong Buhaton? Pagpuli-puli sa pagpangutana sa inyong pamilya sa lain-laing mga pangutana nga nagsugod og “Unsa ang inyong buhaton … ?” Pipila sa mga ehemplo mao ang “Unsa ang inyong buhaton kon kamo mawala?” ug “Unsa ang inyong buhaton kon makaadto mo sa bisan asa nga dapit sa kalibutan?”
Mga Tabang alang sa mga Ginikanan: Paggahin og Panahon sa Tagsa-tagsa
Bisan kon makalingaw nga mag-istorya isip pamilya, importante usab alang sa mga ginikanan ug mga bata nga mogahin og panahon sa tagsa-tagsa. Pahimusli ang mga higayon sa adlaw sa tinagsa-tagsa nga pakig-istorya sa inyong mga anak. Dapita ang usa ka bata sa pagtabang kaninyo sa pagkompleto sa buluhaton sa balay, mokuyog ninyo sa pagpamalit, o makig-istorya kaninyo sa inyong kwarto sulod sa pipila ka minuto. Bisan pipila lang ka mubong panahon makahatag na og makahuluganon nga pag-istoryahanay.