Mga kabatan-onan
Siya Akong Makita Pag-usab
Si Papa mihimo kanamong matag usa ka bata nga espesyal. Nagpangga siya kanamo ug dali nga mopasaylo. Gibuhat niya ang tanan sa pagsiguro nga ang matag usa kanamo nalipay, ug giklaro niya nga ang iyang tinguha mao ang pinakamaayo alang sa matag usa kanamo. Siya pinangga ko kaayo.
Sa naa ko sa grade six, namatay ang akong papa sa aksidente sa sakyanan. Ang akong pamilya ug ako hilabihan kasubo. Dihay dakong pagkahaw-ang sa among pamilya. Si Papa maoy akong dangpanan, ang tawo nga akong kaadtoan kon duna koy mga problema. Imbis mangita og tabang, akong gitugutan nga magpabilin kanako ang kapungot ug kasakit. Sa katapusan mihukom ko nga sayop kadto sa Dios. Mihunong ko sa pagbasa sa mga kasulatan ug sa pag-ampo. Misimba lang ko tungod kay gusto man ni Mama. Gusto kong magpalayo gikan sa akong Langitnong Amahan.
Dayon miapil ko sa kamping sa Young Women sa unang higayon. Ganahan kong makighimamat og bag-ong mga higala, apan wala gihapon ko magbasa sa akong mga kasulatan. Sa katapusan nga gabii, duna kami miting sa pagpamatuod. Duna koy pagbati nga wala nako batia dugay na: ang Espiritu. Nakadayeg ko sa mga babaye nga mibarug sa paghatag sa ilang mga pagpamatuod, apan pabilin kong naglingkod tungod kay sa akong hunahuna ako walay pagpamatuod. Sa kalit lang akong gibati nga kinahanglan kong mobarug. Akong gibuka ang akong ba-ba, naglibug unsay isulti. Busa miingon ko nga nalipay ko sa kamping sa Young Women. Dayon namatngunan na lang nako nga miingon ko nga nahibalo kong si Jesukristo namatay alang kanako ug ang akong Langitnong Amahan nagpangga kanako ug ang Simbahan tinuod.
Napuno ko sa talagsaon nga kalinaw. Salamat kay tungod niini nga kasinatian makaingon ko nga nahibalo ko nga akong makita pag-usab ang akong papa tungod sa Pag-ula ug Pagkabanhaw sa Manluluwas.