Taian Burubeeri ao ana Boki Moomon
Suellen S. Weiler, Georgia, USA
Ririki aika a tia n nako ara utu a mwaing man te tabo ae tatabetabe, te aono ae onrake kaaina, nakon te tabo ae uarereke, te tabo ni bwaibwai teuana itinanikun te kawa ae uarereke. N uakaan mangaia bon te onaroka ni burubeeri ae aki tabeakinaki, ao rinanoia raoraon te tia bwaibwai, ti karekea te kariaiakaki ni kini uaan ni kabane uaan taian burubeeri ake ti tangiri.
Inanon moaningabong tabeua ni katoa wiiki n te tiamwa anne ti karin taian bwaketi ao baeki inanon te kaa ao ni kabanea ara tai ae kakukurei n ikoikoti taian burubeeri. Te moaningabong teuana natira te mwaane ae te bina, Hyrum, e taraa n akea nanona ni kan raonira. E kakoaua bwa ti a tia ni kiniki taian burubeeri nako ao bon te kabane tai ni manga nako riki. Ai kubanakora ngaia ni kunei burubeeri aika a koro mwaitia. E mwaiti aika a bwarikoriko n taabo ake e tarariaoi nako, ao tabeua mai buakon taian beeri aika a karewerewe a riki iaon te mwaanga are e kakoaua bwa e a tia n tuoi mai mwaaina.
N te tai naba anne, taani kairiri ibukia te roronrikirake n te uoote a kakaewenakoia ara ataei aika tebwi tabun aia ririki bwa a na wareka ana Boki Moomon imwaain teiraken te reirei n te Aokati anne. Natira a uota te kakaewenako anne nakon te mweenga, ao ara uutu a motinnanoia bwa a na reita aia konabwai.
N te tai ae waekoa e a bane warekan ana Boki Moomon ngke ara Aokati 2005 Ensign e roko, ma ana kakaewenako Beretitenti Gordon B. Hinckley (1910–2008) ni wareka ana Boki Moomon ae bwanin imwaain tokin te ririki. Hyrum ao tarina ae Joseph a kukurei—n taku bwa ti a tia n ongeaba iroun te burabeti! Imwiina tariia ma mwaaneia ake a ikawai, Seth ao Bethany, a kauringiia bwa Beretitenti Hinckley e a tia ni bubutira bwa ti na manga warekia riki, n aki ongeia bwa mwaitira te tai are ti a tia ni kaman karaoia.
“Bwa ibukin tera?” A titiraki ataeinimwaane. “Ti a tia ni wareki taeka ni kabane, ao tera riki ae e na reiakinaki irarikin ae ti a kaman tia ni warekia?”
Imwiin tabeua te tai ni mabu, temanna e taekina taekan te burubeeri. “Uringnga ngke ti taku bwa ti a tia ni kiniki taian burubeeri ni kabane? Ma ngke ti a manga oki, a mwaiti riki taian burubeeri—n taainako! E aki kakawaki bwa mwaitira te tai ae ti rinanona, e aki kakawaki bwa n ningai, iai n taainako burubeeri man kain te aroka aika a bwarikoriko.”
Ti waekoa n ataia ae iai rekerekena. N ai aron te onaroka ae uaakan ao kainamwarakena ae mwaitin uaana taian burubeeri aika a koro kangkangiia, ana Boki Moomon bon te buoka ni kamwarakean te tamnei ma koaua aika a boou aika a na kuneaki. Ngaia are ti a moana riki warekan ana Boki Moomon teuana riki te tai.
Ngkai I butimwaea ana kakawenako te burabeti, I wareki bwaai n ana Boki Moomon are I a kaman tia ni wareki n te tai ae mwaiti mai mwaaina, ma I noori n anga aika a kakaokoro ke n ota iai ngkai a kaineti nakon bwaai aika a boou ke kakaewenako. I ataia bwa ni katoa te tai are ti wareka iai ana Boki Moomon ma nanora ni koaua, ti kona ni karekei iango aika a boou ao ni kaanira riki nakon te Tia Kamaiu.