Roronrikirake
N na Manga Noria
A karikiira tamara ngaira ataei bwa ti na namakina ae ti onoti. E tangiriira ao e na waekoa ni kabwarai ara bure. E karaoa ana kabanea n tamaroa ni kakoaua bwa ngaira ni kabane ti bane ni kukurei, ao e kamatataa bwa e tangira te kabanea n tamaroa ibukira. I rangin n tangiria.
Ngke I a roko n te koraki onoua, e mate tamau n kabuanibwain te kaa. Ngai ma au utu ti bane n rootaki n te nanokawaki. Iai te bwangabwanga ae korakora n ara utu. Tamau ngaia te aomata ae i onimakinna, temanna ae I nakoina ngkana iai au kanganga. Irarikin are kakaean buokau imwiin matena, I kariaia te un ao te maraki bwa e na teimatoa n riki. I iangoia n te kabane bwa bon ana bure te Atua. I katoka au wareware ni booki aika tabu ao karaoan au tataro. I ti nakon te taromauri bukina bwa e tangirau Tinau bwa n na karaoia. I kataia ni kararoaai ma Tamau are i Karawa.
Imwiina ao I nakon aia kaembwa Ataeinnaine n te moantai. I tangiria ni kaitibo ma raoraou aika a boou, ma I teimatoa n aki wareki booki aika tabu. N te kabanea n tairiki, ao ti karaoa ara bootaki ni kaoti koaua. I namakina te bwai ae I tuai man namakinna n te tai ae maan: te Tamnei. I kariaia ataeinnaine aika teirake ni kaota aia koaua, ma I teimatoa n tekateka bukina bwa I taku bwa akea Irou. N te tai ae aki maan ao I namakina te kan teirake. I kauka wiiu, n aki ataia bwa tera ae n na taekinna. Ngaia are I taekina bwa I rangin ni kakatonga ibukin aia kaembwa Ataeinnaine. Imwiina ao I taekinna bwa I ataia bwa Iesu Kristo e mate ibukiu ao Tamau are i Karawa e tangirai ao te Ekaretia e boni koaua.
I kaonaki ma te rau ae kamimi. Te kakaitau nakon te atatai aei I kona n taekinna bwa n na manga kaitibo ma tamau ibukin Ana Mwakuri ni Kamaiu te Tia Kamaiu ao te Mangauti.